ಕೀವ್ ಸಮೀಪ 900ಕ್ಕೂ ಅಧಿಕ ಮೃತದೇಹ ಪತ್ತೆ

ಕೀವ್, ಎ.16: ರಶ್ಯ ಸೇನೆಯ ನಿರಂತರ ಆಕ್ರಮಣಕ್ಕೆ ಒಳಗಾಗಿರುವ ಉಕ್ರೇನ್ ರಾಜಧಾನಿ ಕೀವ್ ಸುತ್ತಮುತ್ತಲಿನ ಪ್ರದೇಶದಲ್ಲಿ 900ಕ್ಕೂ ಅಧಿಕ ಮೃತದೇಹ ಪತ್ತೆಯಾಗಿರುವುದಾಗಿ ಉಕ್ರೇನ್ ಅಧಿಕಾರಿಗಳು ಹೇಳಿದ್ದಾರೆ.

ಈ ಪ್ರದೇಶದಿಂದ ರಶ್ಯ ಸೇನೆ ಇತ್ತೀಚೆಗೆ ಹಿಂದೆ ಸರಿದಿದೆ. ಈ ಪ್ರದೇಶದಲ್ಲಿ ರಶ್ಯ ಸೇನೆ ನಾಗರಿಕರನ್ನು ಹತ್ಯೆ ಮಾಡಿದೆ. ಬುಚಾ ನಗರದಲ್ಲೇ ಕನಿಷ್ಟ 350 ಮೃತದೇಹ ಪತ್ತೆಯಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ. ಮೃತದೇಹಗಳು ರಸ್ತೆಯಲ್ಲಿ ಅನಾಥವಾಗಿ ಬಿದ್ದಿದ್ದವು ಅಥವಾ ಅರೆಬರೆ ಹೂತು ಹಾಕಲಾಗಿತ್ತು. ಮೃತಪಟ್ಟವರಲ್ಲಿ 95%ದಷ್ಟು ಮಂದಿ ಗುಂಡಿನ ಗಾಯ ಹೊಂದಿದ್ದರು ಎಂದು ಪೊಲೀಸ್ ಮುಖ್ಯಸ್ಥ ಆ್ಯಂಡ್ರಿಯ್ ನೆಬಿಟೊವ್ ಹೇಳಿದ್ದಾರೆ.

ಕಟ್ಟಡದ ಅವಶೇಷಗಳಡಿ ಇನ್ನಷ್ಟು ಮೃತದೇಹ ಪತ್ತೆಯಾಗುವ ಸಾಧ್ಯತೆಯಿದೆ. ಉಕ್ರೇನ್ ಪರ ನಿಲುವು ಹೊಂದಿರುವವರನ್ನು ರಶ್ಯ ಸೇನೆ ಹುಡುಕಿ ಹುಡುಕಿ ಹತ್ಯೆ ಮಾಡಿದೆ ಎಂದವರು ಹೇಳಿದ್ದಾರೆ.