ಶೀಘ್ರವೇ ಮುಂಬೈಗೆ ತೆರಳುತ್ತೇವೆ: ಬಂಡಾಯ ಶಾಸಕ ಏಕನಾಥ್ ಶಿಂಧೆ ಘೋಷಣೆ

ಗುವಾಹಟಿ: ಶೀಘ್ರವೇ ಮುಂಬೈಗೆ ಹೋಗಿ ಬಾಳಾಸಾಹೇಬ್ ಠಾಕ್ರೆ ಅವರ ಪರಂಪರೆಯನ್ನು ಮುಂದಕ್ಕೆ ಕೊಂಡೊಯ್ಯುವುದಾಗಿ ಶಿವಸೇನೆ  ಬಂಡಾಯ ನಾಯಕ  ಏಕನಾಥ್ ಶಿಂಧೆ ಇಂದು ಘೋಷಿಸಿದರು.

ತಾವು ಹಾಗೂ  ಇತರ ಬಂಡುಕೋರರು ಒಂದು ವಾರದಿಂದ ತಂಗಿರುವ ಗುವಾಹಟಿಯ ಹೋಟೆಲ್‌ನ ಹೊರಗೆ ಸುದ್ದಿಗಾರರೊಂದಿಗೆ ಮಾತನಾಡುತ್ತಾ ಶಿಂಧೆ ಈ ಘೋಷಣೆ ಮಾಡಿದರು.

"ಗುವಾಹಟಿಯಲ್ಲಿ ನನ್ನೊಂದಿಗೆ 50 ಜನರಿದ್ದಾರೆ.  ಅವರು ತಮ್ಮ ಸ್ವಂತ ಇಚ್ಛೆಯಿಂದ ಹಾಗೂ  ಹಿಂದುತ್ವಕ್ಕಾಗಿ ಬಂದಿದ್ದಾರೆ. ನಾವೆಲ್ಲರೂ ಶೀಘ್ರದಲ್ಲೇ ಮುಂಬೈಗೆ ಹೋಗುತ್ತೇವೆ" ಎಂದು ಶಿಂಧೆ ಸುದ್ದಿಗಾರರಿಗೆ ತಿಳಿಸಿದರು.

ಶಿಂಧೆ ಅವರು ಅಧಿಕಾರದ ಹಕ್ಕು ಸಾಧಿಸಲು  ಮುಂಬೈ ಅಥವಾ ದಿಲ್ಲಿಗೆ ತೆರಳಬಹುದು . ಅವರು ಕಳೆದ ವಾರ ಗುಜರಾತ್‌ನಲ್ಲಿ ಬಿಜೆಪಿಯ ಉನ್ನತ ನಾಯಕರನ್ನು ಭೇಟಿಯಾಗಿದ್ದರು.

ನಿನ್ನೆ ಬಂಡುಕೋರರನ್ನು ಅನರ್ಹಗೊಳಿಸುವ ನೋಟಿಸ್‌ಗೆ ಪ್ರತಿಕ್ರಿಯಿಸಲು ಸುಪ್ರೀಂಕೋರ್ಟ್  ಜುಲೈ 12 ರವರೆಗೆ ಕಾಲಾವಕಾಶ ನೀಡಿತ್ತು.

ಮಹಾರಾಷ್ಟ್ರ ವಿಧಾನಸಭೆಯಲ್ಲಿ ವಿಶ್ವಾಸಮತ ಪರೀಕ್ಷೆಯ ಸಾಧ್ಯತೆಯನ್ನು ಚರ್ಚಿಸಲು  ವಕೀಲರೊಂದಿಗೆ ಶಿಂಧೆ  ಸಮಾಲೋಚಿಸಿದ್ದಾರೆ  ಎಂದು ವರದಿಯಾಗಿದೆ.