ಹೆಲಿಕಾಪ್ಟರ್ ಗೆ ನೇತುಬಿದ್ದು ಪುಲ್-ಅಪ್ಸ್; ವಿಶ್ವದಾಖಲೆ ಸೃಷ್ಟಿಸಿದ ವ್ಯಕ್ತಿ

ನ್ಯೂಯಾರ್ಕ್, ಆ.6: ನೆದರ್ಲ್ಯಾಂಡಿನ ಸ್ಟ್ಯಾನ್ ಬ್ರೌನಿ ಎಂಬ ವ್ಯಕ್ತಿ ಆಗಸದಲ್ಲಿ ಹಾರಾಟದಲ್ಲಿದ್ದ ಹೆಲಿಕಾಪ್ಟರ್ಗೆ ಜೋತುಬಿದ್ದು ಒಂದು ನಿಮಿಷದಲ್ಲಿ 25 ಪುಲ್-ಅಪ್ಸ್ ಮಾಡುವ ಮೂಲಕ ವಿಶ್ವದಾಖಲೆ ಬರೆದಿರುವುದಾಗಿ ಗಿನ್ನೆಸ್ ವಿಶ್ವದಾಖಲೆ ಸಂಪುಟದ ಹೇಳಿಕೆ ತಿಳಿಸಿದೆ. ಫಿಟ್ನೆಸ್ ಉತ್ಸಾಹಿಯಾಗಿರುವ ಬ್ರೌನಿ ಯೂಟ್ಯೂಬ್ ಚಾನೆಲ್ ಅನ್ನೂ ಹೊಂದಿದ್ದು 2022ರ ಜುಲೈ 6ರಂದು ಬೆಲ್ಜಿಯಂನ ಹೊವೆನೆನ್ ವಿಮಾನನಿಲ್ದಾಣದಲ್ಲಿ ಸಹ ಅಥ್ಲೆಟ್ ಆರ್ಜೆನ್ ಆಲ್ಬರ್ಸ್ ಜತೆ ಈ ಸಾಧನೆ ಮಾಡಿದ್ದಾನೆ. ಇದಕ್ಕಾಗಿ ಇಬ್ಬರೂ ವಾರಗಟ್ಟಲೆ ಸಿದ್ಧತೆ ನಡೆಸಿದ್ದರು ಎಂದು ವರದಿಯಾಗಿದೆ.

ಅರ್ಮೇನಿಯಾದ ರೋಮನ್ ಸಹ್ರಾದ್ಯನ್ 23 ಪುಲ್-ಅಪ್ ನಡೆಸಿದ್ದು ಇದುವರೆಗಿನ ವಿಶ್ವದಾಖಲೆ ಆಗಿತ್ತು. ಜುಲೈ 6ರಂದು ವಿಶ್ವದಾಖಲೆ ಮುರಿಯುವ ಪ್ರಯತ್ನದಲ್ಲಿ ಮೊದಲು ಆರ್ಜೆನ್ ಆಲ್ಬರ್ಸ್ 24 ಪುಲ್-ಅಪ್ಸ್ ತೆಗೆದು ಹೊಸ ದಾಖಲೆ ಬರೆದ. ನಂತರ ಪ್ರಯತ್ನಿಸಿದ ಬ್ರೌನಿ 25 ಪುಲ್ಅಪ್ಸ್ ತೆಗೆದು ಆಲ್ಬರ್ಸ್ ದಾಖಲೆ ಮುರಿದಿದ್ದಾನೆ ಎಂದು ಗಿನ್ನೆಸ್ ವಿಶ್ವದಾಖಲೆ ಸಂಪುಟ ಪ್ರಕಟಿಸಿದೆ. ದಾಖಲೆ ಮುರಿದ ಸಾಧನೆಯ ವೀಡಿಯೊವನ್ನು ಗಿನ್ನೆಸ್ ಸಂಪುಟ ತನ್ನ ಯೂಟ್ಯೂಬ್ ಚಾನೆಲ್ನಲ್ಲಿ ಶೇರ್ ಮಾಡಿಕೊಂಡಿದೆ.