ಅಮೆರಿಕಾಗೆ ತೆರಳಬೇಕಾದವರು ವೀಸಾಗಾಗಿ ಕಾಯಬೇಕಾದ ಅವಧಿ ಒಂದೂವರೆ ವರ್ಷ!

ಹೊಸದಿಲ್ಲಿ; ಅಮೆರಿಕಾಗೆ ತೆರಳಲು ಬಯಸುವವರು ವಿಸಿಟರ್ ವೀಸಾಗೆ (Visitor Visa) 2024 ರ ತನಕ ಕಾಯಬೇಕಾದೀತೆಂಬ ಅಂಶ ಬಹಿರಂಗಗೊಂಡಿದೆ. ಅಮೆರಿಕಾದ ಸ್ಟೇಟ್ ಡಿಪಾರ್ಟ್‍ಮೆಂಟ್ ವೆಬ್‍ಸೈಟ್‍ನಲ್ಲಿ ವೀಸಾಗೆ ಕಾಯುವಿಕೆ ಅವಧಿ ಒಂದೂವರೆ ವರ್ಷ ಎಂದು ಬರೆಯಲಾಗಿದ್ದು, ಇದರಂತೆಯೇ ಆದರೆ ಈಗ ವೀಸಾಗೆ ಅರ್ಜಿ ಸಲ್ಲಿಸಿದವರಿಗೆ ಮಾರ್ಚ್-ಎಪ್ರಿಲ್ 2024 ರಲ್ಲಿ ವೀಸಾ ದೊರೆಯಬಹುದು.

ಹೊಸದಿಲ್ಲಿಯಲ್ಲಿರುವ ಅಮೆರಿಕಾ ಕಾನ್ಸುಲೇಟ್‍ನಲ್ಲಿ ವೀಸಾ ಅಪಾಯಿಂಟ್ಮೆಂಟ್‍ಗಾಗಿ ಸರಾಸರಿ ಕಾಯುವಿಕೆ ಸಮಯ 522 ದಿನಗಳಾದರೆ ಸ್ಟೂಡೆಂಟ್ ವೀಸಾಗಳಿಗೆ ಈ ಅವಧಿ 471 ದಿನಗಳಾಗಿವೆ.

ಮುಂಬೈಯಲ್ಲಾದರೆ, ಅಮೆರಿಕಾ ವೀಸಾ ಅಪಾಯಿಂಟ್ಮೆಂಟ್‍ಗಾಗಿ(Visa Appointment) ಸರಾಸರಿ ಕಾಯುವಿಕೆ ಸಮಯ  517 ದಿನಗಳು ಹಾಗೂ ಸ್ಟೂಡೆಂಟ್ ವೀಸಾಗಾಗಿ 10 ದಿನಗಳಾಗಿವೆ. ದಿಲ್ಲಿಯಲ್ಲಿ ನಾನ್-ಇಮ್ಮಿಗ್ರೆಂಟ್ ವೀಸಾಗಳಿಗೆ (Immigrant Visa) ಕಾಯುವಿಕೆ ಸಮಯ 198 ದಿನಗಳ ಹಾಗೂ ಮುಂಬೈಯಲ್ಲಿ 72 ದಿನಗಳಾಗಿವೆ.

ಚೆನ್ನೈಯಲ್ಲಿ ವಿಸಿಟರ್ ವೀಸಾಗಾಗಿ ಕಾಯುವಿಕೆ ಸಮಯ 557 ದಿನಗಳಾಗಿವೆ ಹಾಗೂ ನಾನ್-ಇಮ್ಮಿಗ್ರೆಂಟ್ ವೀಸಾಗಳಿಗಾಗಿ 185 ದಿನಗಳಾಗಿವೆ. ಹೈದರಾಬಾದ್‍ನಲ್ಲಿ ವಿಸಿಟರ್ ವೀಸಾಗೆ ಕಾಯುವಿಕೆ ಸಮಯ 518 ದಿನಗಳಾಗಿವೆ.

ದೀರ್ಘ ಕಾಯುವಿಕೆ ಅವಧಿ ಬಗ್ಗೆ ಪ್ರತಿಕ್ರಿಯಿಸಿದ ಅಮೆರಿಕಾದ ರಾಯಭಾರ ಕಚೇರಿ, ಈ ಸಮಯವನ್ನು ಕಡಿಮೆ ಮಾಡಲು ಕ್ರಮಕೈಗೊಳ್ಳಲಾಗುತ್ತಿದೆ ಹಾಗೂ ಈ ನಿಟ್ಟಿನಲ್ಲಿ ಹೆಚ್ಚುವರಿ ಸಿಬ್ಬಂದಿಗಳನ್ನು  ನೇಮಕಗೊಳಿಸಲಾಗುತ್ತಿದೆ ಹಾಗೂ ಹೊಸದಾಗಿ ತರಬೇತಿ ಪಡೆದ ಉದ್ಯೋಗಿಗಳು ಭಾರತ ಸಹಿತ ವಿವಿಧ ಕಾನ್ಸುಲೇಟ್‍ಗಳಿಗೆ  ನೇಮಕಗೊಳ್ಳುತ್ತಿದ್ದಾರೆ ಎಂದು ಹೇಳಿದೆ.