ಹಸಿವಿನಿಂದ ಬಳಲುತ್ತಿರುವ ಜನರ ಸಂಖ್ಯೆ 3 ವರ್ಷದಲ್ಲಿ ದ್ವಿಗುಣ: ವಿಶ್ವಸಂಸ್ಥೆ ಕಳವಳ
Update: 2022-10-16 19:00 GMT
ವಿಶ್ವಸಂಸ್ಥೆ, ಅ.16: ವಿಶ್ವದಲ್ಲಿ ಹಸಿವಿನಿಂದ ಬಳಲುತ್ತಿರುವ ಜನರ ಪ್ರಮಾಣ ಹೆಚ್ಚುತ್ತಿರುವುದು ಅತ್ಯಂತ ಕಳವಳದ ವಿಷಯವಾಗಿದ್ದು ಕಳೆದ 3 ವರ್ಷದಲ್ಲಿ ಹಸಿವಿನಿಂದ ಬಳಲುತ್ತಿರುವ ಜನರ ಪ್ರಮಾಣ ದ್ವಿಗುಣಗೊಂಡಿದೆ ಎಂದು ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಅಂಟೋನಿಯೊ ಗುಟೆರಸ್ ಹೇಳಿದ್ದಾರೆ.
ಜಾಗತಿಕ ಮಟ್ಟದಲ್ಲಿ ಹಸಿವೆಯಿಂದ ಬಳಲುತ್ತಿರುವವರ ಸಂಖ್ಯೆ ಏರಿಕೆಯಾಗಲು ಕೊರೋನ ಸಾಂಕ್ರಾಮಿಕ ಹಾಗೂ ಅದರ ನಿಯಂತ್ರಣಕ್ಕೆ ವಿಶ್ವದಾದ್ಯಂತ ವಿಧಿಸಲಾದ ನಿಬರ್ಂಧ ಕ್ರಮಗಳು ಪ್ರಧಾನ ಕಾರಣ ಎಂದು ಹೇಳಲಾಗುತ್ತಿದೆ. ಆದರೆ ಇದೀಗ ಹತಾಶೆಯಿಂದ ನಿರೀಕ್ಷೆ ಮತ್ತು ಕ್ರಿಯಾಶೀಲತೆಯತ್ತ ಮುಂದುವರಿಯುವ ಸಮಯವಾಗಿದೆ. ಪೌಷ್ಟಿಕ ಆಹಾರ ಎಲ್ಲರಿಗೂ ಲಭಿಸುವಂತೆ ಮಾಡಬೇಕಿದೆ ಎಂದು ಗುಟೆರಸ್ ಹೇಳಿದ್ದಾರೆ. ವಿಶ್ವ ಆಹಾರ ದಿನದ ಸಂದರ್ಭ ಗುಟೆರಸ್ ಈ ಸಂದೇಶ ನೀಡಿದ್ದಾರೆ.
ಯಾರನ್ನೂ ಹಿಂದೆ ಬಿಡಬೇಡಿ ಎಂಬುದು 2022ರ ವಿಶ್ವ ಆಹಾರ ದಿನದ ಸಂದೇಶವಾಗಿದೆ. ಜಗತ್ತು ಉತ್ತಮ ವಿಶ್ವದ ನಿರ್ಮಾಣದತ್ತ ಪ್ರಗತಿ ಸಾಧಿಸಿದ್ದರೂ ಹಲವಾರು ಜನರು ಇನ್ನೂ ಹಿಂದುಳಿದಿದ್ದಾರೆ . ಭೂಮಿಯಲ್ಲಿರುವ ಪ್ರತಿಯೊಬ್ಬರಿಗೂ ಆಹಾರ ನೀಡಲು ಸಾಕಾಗುವಷ್ಟು ಆಹಾರವನ್ನು ಇಂದು ಉತ್ಪಾದಿಸಲಾಗುತ್ತಿದ್ದರೂ ಎಲ್ಲರಿಗೂ ಪೌಷ್ಟಿಕಾಂಶದ ಆಹಾರದ ಲಭ್ಯತೆಯ ಸಮಸ್ಯೆಯಿದೆ ಎಂದು ಎಂದು ವಿಶ್ವಸಂಸ್ಥೆ ಹೇಳಿದೆ.
2022ರ ಆಹಾರ ಬಿಕ್ಕಟ್ಟಿನ ಕುರಿತು ಮೇ ತಿಂಗಳಿನಲ್ಲಿ ಬಿಡುಗಡೆಗೊಂಡ ‘ಗ್ಲೋಬಲ್ ನೆಟ್‌ವರ್ಕ್’ನ ವರದಿಯ ಪ್ರಕಾರ, 40 ದೇಶಗಳಲ್ಲಿನ 180 ದಶಕೋಟಿ ಜನತೆ ತಪ್ಪಿಸಲಾಗದ ಆಹಾರ ಅಭದ್ರತೆಯನ್ನು ಎದುರಿಸುತ್ತಿದ್ದಾರೆ. ಇಥಿಯೋಪಿಯಾ, ನೈಜೀರಿಯಾ, ದಕ್ಷಿಣ ಸುಡಾನ್ ಮತ್ತು ಯೆಮನ್ ದೇಶಗಳು ‘ಹಸಿವಿನ ಹಾಟ್‌ಸ್ಪಾಟ್’ ಎಂದು ಗುರುತಿಸಿಕೊಂಡಿವೆ. ಈಜಿಪ್ಟ್‌ನ ಒಟ್ಟು ಆಮದಿನ 85%ದಷ್ಟು ಉಕ್ರೇನ್ ಮತ್ತು ರಶ್ಯದಿಂದ ಬರುವ ಕಾರಣ, ಈ ಎರಡು ದೇಶಗಳ ಮಧ್ಯೆ ನಡೆಯುತ್ತಿರುವ ಯುದ್ಧದಿಂದ ಈಜಿಪ್ಟ್‌ಗೂ ಆಹಾರದ ಸಮಸ್ಯೆ ಎದುರಾಗಿದೆ. ಟ್ಯುನೀಷಿಯಾ ಮತ್ತು ಅಲ್ಜೀರಿಯಾಗಳೂ ತಮ್ಮ ಜನಸಂಖ್ಯೆಯ ಬೇಡಿಕೆಯನ್ನು ಪೂರೈಸಲು ಆಹಾರ ಭದ್ರತೆಯ ಸಮಸ್ಯೆಯೊಂದಿಗೆ ಹೋರಾಡುತ್ತಿದೆ. ಅಫ್ಘಾನ್‌ನಲ್ಲಿ ಆಡಳಿತ ಬದಲಾವಣೆಯಾದಂದಿನಿಂದ ಆಹಾರದ ಬಿಕ್ಕಟ್ಟು ಬಿಗಡಾಯಿಸಿದ್ದು 92%ದಷ್ಟು ಜನತೆಗೆ ಸಾಕಷ್ಟು ಆಹಾರ ದೊರಕುತ್ತಿಲ್ಲ, ಆದರೆ 57%ದಷ್ಟು ಕುಟುಂಬಗಳು ಬಿಕ್ಕಟ್ಟು ನಿಭಾಯಿಸುವ ತಂತ್ರವನ್ನು ಕಂಡುಕೊಳ್ಳಲು ಶಕ್ತವಾಗಿವೆ ಎಂದು ವಿಶ್ವ ಆಹಾರ ಯೋಜನೆ(ಡಬ್ಲ್ಯೂಎಫ್‌ಪಿ)ಯ ಆಹಾರ ಭದ್ರತೆ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ವಿಶ್ವ ಆಹಾರ ದಿನ:
193 ಸದಸ್ಯ ದೇಶಗಳನ್ನು ಹೊಂದಿರುವ ವಿಶ್ವಸಂಸ್ಥೆಯ ಅಂಗಸಂಸ್ಥೆಯಾಗಿ 1945ರಲ್ಲಿ ವಿಶ್ವಸಂಸ್ಥೆಯ ಆಹಾರ ಮತ್ತು ಕೃಷಿ ಸಂಸ್ಥೆ(ಎಫ್‌ಎಕ್ಯು)ಯನ್ನು ಸ್ಥಾಪಿಸಿದ ದಿನವಾದ ಅಕ್ಟೋಬರ್ 16ನ್ನು ವಿಶ್ವ ಆಹಾರ ದಿನವನ್ನಾಗಿ ಆಚರಿಸಲಾಗುತ್ತದೆ. ಈ ದಿನದಂದು ಹಸಿವಿನಿಂದ ಬಳಲುತ್ತಿರುವವರಿಗೆ ಹಾಗೂ ಪೌಷ್ಟಿಕ ಆಹಾರದ ಅಗತ್ಯ ಇರುವವರಿಗೆ ನೆರವನ್ನು ಖಾತರಿಪಡಿಸುವ ಅಗತ್ಯದ ಬಗ್ಗೆ ವಿಶ್ವದಾದ್ಯಂತ ಜಾಗೃತಿ ಕಾರ್ಯಕ್ರಮಗಳನ್ನು ನಡೆಸಲಾಗುತ್ತದೆ.