ರಾಜೀವ್ ಗಾಂಧಿ ಪ್ರಧಾನಿಯಿದ್ದಾಗ ನಮ್ಮ ಉದ್ದಿಮೆಯ ಪಯಣ ಆರಂಭಗೊಂಡಿತ್ತು: ಗೌತಮ್ ಅದಾನಿ

ಹೊಸದಿಲ್ಲಿ: ತಮ್ಮ ಉದ್ಯಮ ಸಂಸ್ಥೆಯ ಪ್ರಗತಿಯನ್ನು ಯಾವುದೇ ಒಬ್ಬ ರಾಜಕೀಯ ನಾಯಕನ ಜೊತೆಗೆ ಥಳಕು ಹಾಕುವುದು ಸಾಧ್ಯವಿಲ್ಲ ಎಂದು ಅದಾನಿ ಸಮೂಹದ ಮುಖ್ಯಸ್ಥ ಗೌತಮ್ ಅದಾನಿ ಹೇಳುವ ಮೂಲಕ ಪ್ರಧಾನಿ ನರೇಂದ್ರ ಮೋದಿ ಜೊತೆಗೆ ತಮಗಿರುವ ಸಂಬಂಧದಿಂದ ತಾವು ಪ್ರಯೋಜನ ಪಡೆಯುತ್ತಿರುವ ಆರೋಪಗಳನ್ನು ಬಲವಾಗಿ ನಿರಾಕರಿಸಿದ್ದಾರೆ. ಕಾಂಗ್ರೆಸ್ ನಾಯಕ ರಾಜೀವ್ ಗಾಂಧಿ ಪ್ರಧಾನಿಯಾಗಿದ್ದ ವೇಳೆ ಅದಾನಿ ಸಮೂಹದ ಪಯಣ ಆರಂಭಗೊಂಡಿತ್ತು ಎಂದು ಅವರು ಹೇಳಿದರು.

"ಪ್ರಧಾನಿ ಮೋದಿ ಹಾಗೂ ನಾನು ಒಂದೇ ರಾಜ್ಯದವರು. ಆದುದರಿಂದ ನಿರಾಧಾರ ಆರೋಪಗಳಿಗೆ ನಾನು ಸುಲಭವಾಗಿ ತುತ್ತಾಗುತ್ತೇನೆ. ಇಂತಹ ಹೇಳಿಕೆಗಳನ್ನು ನನ್ನ ವಿರುದ್ಧ ನೀಡಲಾಗುತ್ತಿರುವುದು ದುರಾದೃಷ್ಟಕರ," ಎಂದು ಇಂಡಿಯಾ ಟುಡೇಗೆ ನೀಡಿದ ಸಂದರ್ಶನದಲ್ಲಿ ಅವರು ಹೇಳಿದ್ದಾರೆ.

"ಈ ಆರೋಪಗಳು ತಾರತಮ್ಯದಿಂದ ಕೂಡಿದೆ. ಅಲ್ಪಾವಧಿ ದೂರದರ್ಶಕದ ಮೂಲಕ ನಮ್ಮ ಸಂಸ್ಥೆಯ ಯಶಸ್ಸನ್ನು ಅಳೆಯಲಾಗುತ್ತಿದೆ. ರಾಜೀವ್ ಗಾಂಧಿ ಪ್ರಧಾನಿಯಾಗಿದ್ದಾಗ ಹಾಗೂ ಮೊದಲ ಬಾರಿ ಎಕ್ಸಿಮ್ ನೀತಿ ಉದಾರೀಕರಣಗೊಂಡಾಗ ನಮ್ಮ ಸಂಸ್ಥೆಯ ಪಯಣ ಆರಂಭಗೊಂಡಿತ್ತೆಂದು ತಿಳಿದು ಹಲವರಿಗೆ ಅಚ್ಚರಿಯಾಗಬಹುದು. ರಾಜೀವ್ ಗಾಂಧಿ ಅವರಲ್ಲದೇ ಇದ್ದಿದ್ದರೆ ಉದ್ಯಮಿಯಾಗಿ ನನ್ನ ಪಯಣ ಆರಂಭಗೊಳ್ಳುತ್ತಿರಲಿಲ್ಲ," ಎಂದು ಅದಾನಿ ಹೇಳಿದರು.

"1991 ರಲ್ಲಿ ನರಸಿಂಹ ರಾವ್ ಮತ್ತು ಮನಮೋಹನ್ ಸಿಂಗ್ ಅವರು ಅಭೂತಪೂರ್ವ ಆರ್ಥಿಕ ಸುಧಾರಣೆಗಳನ್ನು ಜಾರಿಗೆ ತಂದಾಗ ಹಲವು ಇತರ ಉದ್ಯಮಿಗಳಂತೆ ನಾನು ಕೂಡ ಅದರ ಪ್ರಯೋಜನ ಪಡೆದುಕೊಂಡೆ. ನನ್ನ ಜೀವನದ ಮೂರನೇ ತಿರುವು 1995 ರಲ್ಲಿ ಕೇಶುಭಾಯಿ ಪಟೇಲ್ ಗುಜರಾತ್ ಮುಖ್ಯಮಂತ್ರಿಯಾದಾಗ ದೊರೆಯಿತು, ನಾಲ್ಕನೇ ತಿರುವು 2001 ರಲ್ಲಿ ನರೇಂದ್ರ ಮೋದಿ ಮುಖ್ಯಮಂತ್ರಿಯಾಗಿ ಅಭಿವೃದ್ಧಿಗೆ ಬಹಳಷ್ಟು ಒತ್ತು ನೀಡಿದಾಗ. ಅವರ ನೀತಿಗಳಿಂದಾಗಿ ರಾಜ್ಯದಲ್ಲಿ ಕೈಗಾರಿಕೆಗಳು ಬಹಳಷ್ಟು ಅಭಿವೃದ್ಧಿ ಸಾಧಿಸಿದವು ಹಾಗೂ ಉದ್ಯೋಗಾವಕಾಶಗಳೂ ದೊರೆತವು, ಇಂದು ಅವರ ನಾಯಕತ್ವದಲ್ಲಿ ಭಾರತ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮನ್ನಣೆ ಪಡೆಯುತ್ತಿದೆ," ಎಂದು ಅದಾನಿ ಹೇಳಿಕೊಂಡರು.

ತಾವು ರಿಲಯನ್ಸ್ ಇಂಡಸ್ಟ್ರೀಸ್ ಸ್ಥಾಪಕ ಧೀರೂಭಾಯಿ ಅಂಬಾನಿ ಅವರಿಂದ ಸ್ಫೂರ್ತಿ ಪಡೆದಿರುವುದಾಗಿಯೂ ಗೌತಮ್ ಅದಾನಿ ಹೇಳಿಕೊಂಡರು.

"ನಮ್ಮ ಸಮೂಹದ ಎಲ್ಲಾ ಉದ್ದಿಮೆಗಳನ್ನು ಅರ್ಹ ಸಿಇಒಗಳು ಮುನ್ನಡೆಸುತ್ತಿದ್ದಾರೆ. ದೈನಂದಿನ ಕಾರ್ಯನಿರ್ವಹಣೆಯಲ್ಲಿ ನಾನು ಹಸ್ತಕ್ಷೇಪ ಮಾಡುವುದಿಲ್ಲ, ತಂತ್ರಗಾರಿಕೆ, ಬಂಡವಾಳ ಹೂಡಿಕೆ ಮತ್ತು ಪರಿಶೀಲನೆಯಷ್ಟೇ ನನ್ನ ಕೆಲಸ, ಇದೇ ಕಾರಣದಿಂದ  ಈ ಬೃಹತ್ ಉದ್ಯಮ ಸಂಸ್ಥೆಯನ್ನು ಮುನ್ನಡೆಸುವುದರ ಜೊತೆ ಸಣ್ಣ ಉದ್ದಿಮೆಗಳ ಸ್ಥಾಪನೆ ಹಾಗೂ ಸ್ವಾಧೀನಪಡಿಸಲು ಹೊಸ ಅವಕಾಶಗಳಿಗೆ ನನಗೆ ಸಮಯ ದೊರಕುತ್ತದೆ," ಎಂದು ಅದಾನಿ ಹೇಳಿಕೊಂಡರು.