ನನ್ನ ಕಂಪೆನಿಗಳು 22 ರಾಜ್ಯಗಳಲ್ಲಿ ಕಾರ್ಯಾಚರಿಸುತ್ತಿದೆ, ಎಲ್ಲವೂ ಬಿಜೆಪಿ ಆಡಳಿತದ ರಾಜ್ಯಗಳೇನಲ್ಲ: ಗೌತಮ್ ಅದಾನಿ
ಹೊಸ ದಿಲ್ಲಿ: ನನ್ನ ಕಂಪನಿಗಳು 22 ರಾಜ್ಯಗಳಲ್ಲಿ ಕಾರ್ಯಾಚರಿಸುತ್ತಿದ್ದು, ಅವೆಲ್ಲವೂ ಬಿಜೆಪಿ ಆಡಳಿತಾರೂಢ ರಾಜ್ಯಗಳಲ್ಲ ಎಂದು ಅದಾನಿ ಸಮೂಹದ ಅಧ್ಯಕ್ಷ ಗೌತಮ್ ಅದಾನಿ ಹೇಳಿದ್ದಾರೆ ಎಂದು India TV ವರದಿ ಮಾಡಿದೆ.
ಇಂಡಿಯಾ ಟವಿಯ 'ಆಪ್ ಕಿ ಅದಾಲತ್' ಮಾತುಕತೆ ಕಾರ್ಯಕ್ರಮದಲ್ಲಿ ಆಯೋಜಿಸಲಾಗಿದ್ದ ಸಂದರ್ಶನದಲ್ಲಿ ಭಾಗವಹಿಸಿ ಮಾತನಾಡಿರುವ ಗೌತಮ್ ಅದಾನಿ, "ನಮಗೆ ಯಾವುದೇ ರಾಜ್ಯ ಸರ್ಕಾರಗಳೊಂದಿಗೆ ಸಮಸ್ಯೆ ಇಲ್ಲ ಎಂಬುದನ್ನು ಸ್ಪಷ್ಟವಾಗಿ ಹೇಳಬಲ್ಲೆ" ಎಂದು ಹೇಳಿದ್ದಾರೆ.
"ನಾವು ಎಡಪಕ್ಷಗಳ ಆಡಳಿತವಿರುವ ಕೇರಳ, ಮಮತಾ ದೀದಿಯ ಆಡಳಿತವಿರುವ ಪಶ್ಚಿಮ ಬಂಗಾಳ, ನವೀನ್ ಪಟ್ನಾಯಕ್‌ರ ಒಡಿಶಾ, ಜಗನ್‌ಮೋಹನ್ ರೆಡ್ಡಿ ಅವರ ಆಂಧ್ರಪ್ರದೇಶ ಹಾಗೂ ಕೆ. ಚಂದ್ರಶೇಖರ್ ರಾವ್ ಆಡಳಿತವಿರುವ ತೆಲಂಗಾಣದಲ್ಲೂ ಕಾರ್ಯಾಚರಿಸುತ್ತಿದ್ದೇವೆ" ಎಂದು ಸ್ಪಷ್ಟಪಡಿಸಿದ್ದಾರೆ.
ಬಿಜೆಪಿಯೊಂದಿಗೆ ನಿಕಟವಾಗಿದ್ದಾರೆ ಎಂಬ ಕಾರಣಕ್ಕೆ ಅದಾನಿ ಸಮೂಹದ ಅಧ್ಯಕ್ಷರಾದ ಗೌತಮ್ ಅದಾನಿ ಕಾಂಗ್ರೆಸ್ ಪಕ್ಷದಿಂದ ತೀವ್ರ ಟೀಕೆಗೆ ಗುರಿಯಾಗಿದ್ದಾರೆ. ಅವರು ಬಂಡವಾಳಸ್ನೇಹಿ ರಾಜಕಾರಣದಲ್ಲಿ ಮುಳುಗಿದ್ದಾರೆ ಎಂದು ಮಲ್ಲಿಕಾರ್ಜುನ ಖರ್ಗೆ ನೇತೃತ್ವದ ಕಾಂಗ್ರೆಸ್ ಪಕ್ಷ ಆಪಾದಿಸಿದೆ.
ಈ ಕುರಿತು ತನಿಖೆ ನಡೆಸಿದ್ದ scroll.in ಸುದ್ದಿ ಸಂಸ್ಥೆಯು, 2014ರಿಂದ (ಬಿಜೆಪಿ ಸರ್ಕಾರ ಅಧಿಕಾರಕ್ಕೆ ಬಂದ ಸಮಯ) 2019ರವರೆಗೆ ಕನಿಷ್ಠ ಲಾಭ ಗಳಿಕೆಯ ಹೊರತಾಗಿಯೂ ಅದಾನಿ ಸಮೂಹ ತನ್ನ ಕಾರ್ಯಾಚರಣೆಯನ್ನು ಗಮನಾರ್ಹವಾಗಿ ವಿಸ್ತರಿಸಿಕೊಂಡಿತ್ತು. ಅಲ್ಲದೆ, ಈ ಅವಧಿಯಲ್ಲಿ ಇತರೆ ಮೂಲಭೂತ ಸೌಕರ್ಯ ಸಂಸ್ಥೆಗಳ ಸಂಪತ್ತಿನ ಪ್ರಮಾಣ ಕುಗ್ಗಿದರೂ, ಅದಾನಿ ಸಮೂಹದ ಸಂಪತ್ತು ಮಾತ್ರ ಹಿಗ್ಗುತ್ತಲೇ ಹೋಗಿರುವುದನ್ನು ಪತ್ತೆ ಹಚ್ಚಿತ್ತು.
ಈ ಕುರಿತು ಸಂದರ್ಶನದಲ್ಲಿ ಪ್ರತಿಕ್ರಿಯಿಸಿರುವ ಗೌತಮ್ ಅದಾನಿ, ನಾನು ಯಾವುದೇ ಬಿಜೆಪಿ ನಾಯಕ ಅಥವಾ ಪ್ರಧಾನ ಮಂತ್ರಿಯಿಂದ ಯಾವುದೇ ವೈಯಕ್ತಿಕ ನೆರವು ಪಡೆದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಇದೇ ಸಂದರ್ಭದಲ್ಲಿ, ನಾನು ನನ್ನ ಜೀವನದಲ್ಲಿ ಮೂರು ತಿರುವುಗಳನ್ನು ಪಡೆದಿದ್ದು, ಈ ಪೈಕಿ ಪಡೆದ ಎರಡು ತಿರುವುಗಳು ಕಾಂಗ್ರೆಸ್ ಆಡಳಿತದ ಅವಧಿಯಲ್ಲಾಗಿತ್ತು ಎಂದೂ ಹೇಳಿದ್ದಾರೆ.
"1985ರಲ್ಲಿ ಮೊದಲ ಬಾರಿಗೆ ರಾಜೀವ್ ಗಾಂಧಿ ಆಡಳಿತದಲ್ಲಿ ಜಾರಿಗೆ ಬಂದ ರಫ್ತು-ಆಮದು ನೀತಿಯು ನಮ್ಮ ಸಂಸ್ಥೆಗೆ ಜಾಗತಿಕ ವಹಿವಾಟು ಸಂಸ್ಥೆಯಾಗುವ ಅವಕಾಶ ನೀಡಿತು. 1991ರಲ್ಲಿ ಎರಡನೆಯ ಬಾರಿಗೆ ಪಿ.ವಿ.ನರಸಿಂಹ ರಾವ್ ಮತ್ತು ಡಾ. ಮನಮೋಹನ್ ಸಿಂಗ್ ಅವರು ಆರ್ಥಿಕ ಉದಾರೀಕರಣ ಜಾರಿಗೆ ತಂದಿದ್ದರಿಂದ ನಾವು ಖಾಸಗಿ-ಸಾರ್ವಜನಿಕ ಸಹಭಾಗಿತ್ವದ ಉದ್ಯಮಗಳಿಗೆ ಪ್ರವೇಶಿಸಿದೆವು. ನಂತರ ಮೂರನೆಯ ಬಾರಿ ನರೇಂದ್ರ ಮೋದಿಯ 12 ವರ್ಷಗಳ ದೀರ್ಘಾವಧಿಯ ಗುಜರಾತ್ ಆಡಳಿತದಲ್ಲಿ ನಮ್ಮ ಉದ್ಯಮ ವಿಸ್ತರಣೆಗೊಂಡಿತು" ಎಂದು 'ಆಪ್ ಕಿ ಅದಾಲತ್' ಸಂದರ್ಶನದಲ್ಲಿ ಪತ್ರಕರ್ತ ರಜತ್ ಶರ್ಮಗೆ ಗೌತಮ್ ಅದಾನಿ ತಿಳಿಸಿದ್ದಾರೆ.
ಆದರೆ, 2013ರವರೆಗೆ ಕೇವಲ ಗುಜರಾತ್‌ಗೆ ಸೀಮಿತವಾಗಿದ್ದ ಅದಾನಿ ಸಮೂಹದ ಸಂಪತ್ತುಗಳು 2019ರ ವೇಳೆಗೆ ದೇಶಾದ್ಯಂತ ವಿಸ್ತರಿಸಿದ್ದವು ಮತ್ತು ಅದಾನಿ ಸಮೂಹವು ಬಹುಬಗೆಯ ಉದ್ಯಮಗಳಿಗೆ ಪದಾರ್ಪಣೆ ಮಾಡಿತು ಎಂದು scroll.in ವಿಸ್ತೃತ ವರದಿ ಮಾಡಿದೆ.