ಕೇರಳ: ದೇವಾಲಯ ಪ್ರವೇಶಕ್ಕೆ ನಟಿ ಅಮಲಾ ಪೌಲ್‌ಗೆ ನಿರಾಕರಣೆ; ಆರೋಪ

ತಿರುವನಂತಪುರ, ಜ. 18: ಇಲ್ಲಿನ ತಿರುವೈರನಿಕುಲಂ ಮಹಾದೇವ ದೇವಾಲಯಕ್ಕೆ ತನಗೆ ಪ್ರವೇಶ ನಿರಾಕರಿಸಲಾಗಿದೆ ಎಂದು ದಕ್ಷಿಣ ಭಾರತದ ಜನಪ್ರಿಯ ಚಿತ್ರ ನಟಿ ಅಮಲಾ ಪೌಲ್(Amala Paul) ಆರೋಪಿಸಿದ್ದಾರೆ.

ದೇವಾಲಯದ ಒಳಗೆ ಹಿಂದೂಗಳಿಗೆ ಮಾತ್ರ ಪ್ರವೇಶಕ್ಕೆ ಅವಕಾಶ ಎಂಬ ಕಾರಣ ನೀಡಿ ತನಗೆ ದೇವರ ದರ್ಶನಕ್ಕೆ ಆಡಳಿತ ಮಂಡಳಿ ಅವಕಾಶ ನೀಡಿಲ್ಲ ಎಂದು ಅವರು ಸೋಮವಾರ ಹೇಳಿದ್ದಾರೆ. ದೇವಾಲಯದ ಸಂದರ್ಶಕರ ನೋಂದಣಿ ಪುಸ್ತಕದಲ್ಲಿ ತನ್ನ ಅನುಭವ   ಹಂಚಿಕೊಂಡಿರುವ ಅವರು, ‘‘ಆಕೆ ದೇವತೆಯನ್ನು ನೋಡದೇ ಇದ್ದರೂ ಚೈತನ್ಯವನ್ನು ಅನುಭವಿಸುತ್ತಾಳೆ’’ ಎಂದು ಬರೆದಿದ್ದಾರೆ.

‘‘2023ರಲ್ಲಿ ಕೂಡ ಧಾರ್ಮಿಕ ತಾರತಮ್ಯ ಅಸ್ತಿತ್ವದಲ್ಲಿರುವುದು ತನಗೆ ದುಃಖ ಹಾಗೂ ನಿರಾಶೆ ಉಂಟು ಮಾಡಿದೆ. ಧಾರ್ಮಿಕ ತಾರತಮ್ಯ ಶೀಘ್ರದಲ್ಲಿ ಬದಲಾಗಬಹುದು ಎಂದು ನನಗೆ ಭರವಸೆ ಇದೆ. ನಮ್ಮನ್ನು ಸಮಾನವಾಗಿ ಕಾಣುವ ಸಮಯ ಬರಲಿದೆ’’ ಎಂದು ಅವರು ಹೇಳಿದ್ದಾರೆ. ಆದರೆ, ತಿರುವೈರನಿಕುಲಂ ಮಹಾದೇವ ದೇವಾಲಯದ ಟ್ರಸ್ಟ್, ನಾವು ದೇವಾಲಯದ ಸಂಪ್ರದಾಯವನ್ನು ಮಾತ್ರ ಅನುಸರಿಸಿದ್ದೇವೆ ಎಂದು ಸ್ಪಷ್ಟನೆ ನೀಡಿದ್ದಾರೆ.