ಅಮೆರಿಕದಿಂದಲೂ ಚೀನಾದ ವಾಯುಕ್ಷೇತ್ರದಲ್ಲಿ ಬಲೂನುಗಳ ಹಾರಾಟ: ಚೀನಾದ ಪ್ರತ್ಯಾರೋಪ

ಬೀಜಿಂಗ್,ಫೆ.13:  ತನ್ನ ಅನುಮತಿಯಿಲ್ಲದೆ ಕಳೆದ ವರ್ಷ ತನ್ನ ವಾಯುಸೀಮೆಯನ್ನು  ಉಲ್ಲಂಘಿಸಿ, ಅಮೆರಿಕದ 10 ಬಲೂನುಗಳು ಹಾರಾಟ ನಡೆಸಿರುವುದಾಗಿ ಚೀನಾ ಸೋಮವಾರ ತಿಳಿಸಿದೆ. ಜಗತ್ತಿನಾದ್ಯಂತ ಚೀನಾದ ಬೇಹುಗಾರಿಕೆ ಬಲೂನುಗಳು ಕಾರ್ಯನಿರ್ವಹಿಸುತ್ತಿವೆಯೆಂದು ಆಮೆರಿಕದ ಆಪಾದಿಸಿರುವ ಬೆನ್ನಲ್ಲೇ ಬೀಜಿಂಗ್ ಈ ಪ್ರತ್ಯಾರೋಪ ಮಾಡಿದೆ.

ಚೀನಾದ ವಿದೇಶಾಂಗ  ಇಲಾಖೆಯ ವಕ್ತಾರ ವಾಂಗ್‌ವೆನ್ ಬಿನ್ ಸೋಮವಾರ ಬೀಜಿಂಗ್‌ನಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಾ ‘‘ಇತರ ದೇಶಗಳ ವಾಯುಕ್ಷೇತ್ರವನ್ನು ಅಮೆರಿಕದ ಬಲೂನುಗಳು ಅಕ್ರಮವಾಗಿ ಪ್ರವೇಶಿಸುವುದು ಸರ್ವೇ ಸಾಮಾನ್ಯವಾಗಿಬಿಟ್ಟಿದೆ . ಕಳೆದ ವರ್ಷದಿಂದೀಚೆಗೆ ಅಮೆರಿಕದ ದೀರ್ಘ ಎತ್ತರಹಾರಾಟ ಸಾಮರ್ಥ್ಯದ ಬಲೂನುಗಳು ಚೀನಾದ ವಾಯು ಕ್ಷೇತ್ರವನ್ನು ಅನುಮತಿಯಿಲ್ಲದೆ 10 ಸಲ ಪ್ರವೇಶಿಸಿತ್ತು’’ ಎಂದು ಆರೋಪಿಸಿದ್ದಾರೆ.

ಆದರೆ ತಥಾಕಥಿತ ಅಮೆರಿಕದ ಬಲೂನುಗಳ ಬಗ್ಗೆ ಚೀನಾವು ಯಾವ ಕ್ರಮವನ್ನು ಕೈಗೊಂಡಿದೆ ಅಥವಾ ಅವುಗಳಿಗೆ ಸರಕಾರಿ ಅಥವಾ ಸೇನಾ ನಂಟುಗಳಿವೆಯೇ ಎಂಬ ಆರೋಪಗಳ ಬಗ್ಗೆ ಅಮೆರಿಕದ ವಿದೇಶಾಂಗ ಇಲಾಖೆಯ ವಕ್ತಾರ ವಾಂಗ್‌ವೆನ್ ಬಿನ್ ಯಾವುದೇ ವಿವರಗಳನ್ನು ನೀಡಲು ನಿರಾಕರಿಸಿದ್ದಾರೆ.

 ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರ ವಾಂಗ್ ವೆನ್‌ಬಿನ್ ಯಾವುದೇ ವಿವರಗಳನ್ನು ನೀಡಿಲ್ಲ.

ಅಲಾಸ್ಕದಿಂದ ದಕ್ಷಿಣ ಕರೋಲಿನಾ ಕರಾವಳಿಗೆ ಹಾದು ಬಂದ ಚೀನಾದ ಶಂಕಿತ ಬೇಹುಗಾರಿಕಾ ಬಲೂನನ್ನು ಅಮೆರಿಕ ಹೊಡೆದುರುಳಿಸಿತ್ತು. ಆದರೆ ಚೀನಾವು ಈ ಬಲೂನನ್ನು ಹವಾಮಾನ  ಸಂಶೋಧನೆಯ ಉದ್ದೇಶಗಳಿಗಾಗಿ ಹಾರಿಸಿರುವುದಾಗಿ ಹೇಳಿಕೊಂಡಿತ್ತು.

ಚೀನಾದ ಶಂಕಿತ ಬೇಹುಗಾರಿಕಾ ಬಲೂನು ಪತ್ತೆಯಾದ ಘಟನೆಯ ಬಳಿಕ ಅಮೆರಿಕ-ಚೀನಾ ಬಾಂಧವ್ಯ ಇನ್ನಷ್ಟು ಹದಗೆಟ್ಟಿದೆ. ಈ ಘಟನೆಯ ಆನಂತರ ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಆ್ಯಂಟನಿ ಬ್ಲಿಂಕೆನ್ ಅವರು ತನ್ನ ಯೋಜಿತ ಬೀಜಿಂಗ್ ಪ್ರವಾಸವನ್ನು ರದ್ದುಪಡಿಸಿದ್ದರು.

ಚೀನಾದ  ಬಲೂನಿನ ಸೆನ್ಸರ್‌ಗಳನ್ನು ಪತ್ತೆಹಚ್ಚಿದ ಅಮೆರಿಕ ಸೇನೆ

ದಕ್ಷಿಣ ಕರೋಲಿನಾದ ಸಾಗರಪ್ರದೇಶದಲ್ಲಿ ಫೆಬ್ರವರಿ 4ರಂದು  ತಾನು ಹೊಡೆದುರುಳಿಸಿರುವ ಶಂಕಿತ ಚೀನಿ ಬೇಹುಗಾರಿಕಾ ಬಲೂನಿನಿಂದ ನಿರ್ಣಾಯಕವಾದ ಇಲೆಕ್ಟ್ರಾನಿಕ್ ಸೆನ್ಸರ್‌ಗಳನ್ನು ತಾನು ಪತ್ತೆಹಚ್ಚಿರುವುದಾಗಿ ಅಮೆರಿಕ ಸೇನೆಯು ಸೋಮವಾರ ತಿಳಿಸಿದೆ. ಈ ಸೆನ್ಸರ್‌ಗಳನ್ನು  ಬೇಹುಗಾರಿಕಾ ಮಾಹಿತಿ ಸಂಗ್ರಹಕ್ಕಾಗಿ ಬಳಸಿರುವ ಸಾಧ್ಯತೆಯಿದೆಯೆಂದು   ಅದು ಹೇಳಿದೆ.

ಈ ಬಲೂನನ್ನು ಅಮೆರಿಕ ಸೇನೆಯು  ಫೈಟರ್ ಜೆಟ್ ಮೂಲಕ ದಕ್ಷಿಣ ಕರೋಲಿನಾದ ಸಮುದ್ರಪ್ರದೇಶದಲ್ಲಿ ಹೊಡೆದುರುಳಿಸಿತ್ತು.

‘‘ ಬಲೂನು ಪತನಗೊಂಡ ಸಮುದ್ರಪ್ರದೇಶದಿಂದ ಕೆಲವು ಮಹತ್ವದ ಅವಶೇಷಗಳನ್ನು ಪತ್ತೆಹಚ್ಚಲು  ನಾವಿಕ ಸಿಬ್ಬಂದಿ ಸಫಲರಾಗಿದ್ದಾರೆ. ಈ ಬಲೂನಿನಲ್ಲಿದ್ದ  ಪ್ರಮುಖ ಸೆನ್ಸರ್ ಹಾಗೂ ಇಲೆಕ್ಟ್ರಾನಿಕ್ಸ್ ಉಪಕರಣಗಳ ತುಣುಕುಗಳನ್ನು ಗುರುತಿಸಲಾಗಿದೆ’’ ಎಂದು ಅಮೆರಿಕ ಸೇನೆಯ ಉತ್ತರ ಕಮಾಂಡ್ ಸೋಮವಾರ ಹೇಳಿಕೆಯೊಂದರಲ್ಲಿ ತಿಳಿಸಿದೆ.

ಚೀನಾದ  ಈ ಬಲೂನು ಅಮೆರಿಕ ಹಾಗೂ ಕೆನಡದಲ್ಲಿ  ಸುಮಾರು ಒಂದು ವಾರದವರೆಗೆ ಹಾರಾಟ ನಡೆಸಿತ್ತು. ಆನಂತರ ಅಮೆರಿಕ ಅಧ್ಯಕ್ಷ ಜೋಬೈಡೆನ್, ಅದನ್ನು  ಹೊಡೆದುರುಳಿಸುವಂತೆ ಅಮೆರಿಕ ಸೇನೆಗೆ ಆದೇಶ ನೀಡಿದ್ದರು.