ಮಧ್ಯಪ್ರದೇಶ: 6000 ಹುದ್ದೆಗಳಿಗೆ 12 ಲಕ್ಷಕ್ಕೂ ಅಧಿಕ ಅರ್ಜಿ

ಭೋಪಾಲ್: ಇಂಜಿನಿಯರ್‌ಗಳು ಮತ್ತು ಡಾಕ್ಟರೇಟ್ ಹೊಂದಿರುವವರು ಸೇರಿದಂತೆ 12 ಲಕ್ಷಕ್ಕೂ ಹೆಚ್ಚು ಅಭ್ಯರ್ಥಿಗಳು ಮಧ್ಯಪ್ರದೇಶದಲ್ಲಿ ಸರಿಸುಮಾರು 6,000 ಪಟ್ವಾರಿ ಹುದ್ದೆಗಳಿಗೆ ಅರ್ಜಿ ಸಲ್ಲಿಸಿದ್ದಾರೆ. ಇದು ರಾಜ್ಯದಲ್ಲಿ ತಲೆದೋರಿರುವ ನಿರುದ್ಯೋಗ ಸಮಸ್ಯೆ ಬಗ್ಗೆ ಕಳವಳ ವ್ಯಕ್ತಪಡಿಸುವಂತೆ ಮಾಡಿದೆ.

ಪಟ್ವಾರಿ ಹುದ್ದೆ ಎಂದರೆ ಭೂ ಕಂದಾಯ ಅಧಿಕಾರಿಯಾಗಿದ್ದು, ಅರ್ಜಿ ಸಲ್ಲಿಸಲು ಪದವಿ ಸಾಕಾಗುತ್ತದೆ. ಆದರೆ, ಇಂಜಿನಿಯರಿಂಗ್, ವಿಜ್ಞಾನ ಮತ್ತು MBA ಪದವೀಧರರಂತಹ ಉನ್ನತ ಪದವಿಗಳನ್ನು ಹೊಂದಿರುವ ಅನೇಕ ಅಭ್ಯರ್ಥಿಗಳು ಈ ಹುದ್ದೆಗಳಿಗೆ ಅರ್ಜಿ ಸಲ್ಲಿಸಿದ್ದಾರೆ.

ಪಟ್ವಾರಿ ಹುದ್ದೆಗಳಿಗೆ ಮಾರ್ಚ್ 15 ರಂದು ಪರೀಕ್ಷೆಯನ್ನು ನಿಗದಿಪಡಿಸಲಾಗಿದ್ದು, ಎರಡು ಅವಧಿಗಳಲ್ಲಿ ನಡೆಯಲಿದೆ. ರಾಜ್ಯವು 2017-18 ರಲ್ಲಿ ಪಟ್ವಾರಿ ಉದ್ಯೋಗಗಳಿಗೆ ಕೊನೆಯ ಬಾರಿ ಪರೀಕ್ಷೆಗಳನ್ನು ನಡೆಸಿತ್ತು. ಈ ವರ್ಷ‌ ಬಂದ 12.79 ಲಕ್ಷ ಅಭ್ಯರ್ಥಿಗಳಲ್ಲಿ 1,000 ಮಂದಿ ಡಾಕ್ಟರೇಟ್, 85,000 ಇಂಜಿನಿಯರಿಂಗ್ ಪದವಿ, 1 ಲಕ್ಷ ಎಂಬಿಎ ಪದವೀಧರರು, ಸುಮಾರು 1.8 ಲಕ್ಷ ಮಂದಿ ಕಲೆ ಮತ್ತು ವಿಜ್ಞಾನದಲ್ಲಿ ಸ್ನಾತಕೋತ್ತರ ಪದವಿ ಪಡೆದವರು ಇದ್ದಾರೆ.