ತ್ರಿಪುರಾ, ನಾಗಾಲ್ಯಾಂಡ್‌ ನಲ್ಲಿ ಬಿಜೆಪಿಗೆ ಅಧಿಕಾರ: ಮತದಾನೋತ್ತರ ಸಮೀಕ್ಷೆ

ಹೊಸದಿಲ್ಲಿ, ಫೆ. 27: ಬಿಜೆಪಿಯು ತ್ರಿಪುರಾದಲ್ಲಿ ಸುಲಭವಾಗಿ ಬಹುಮತ ಗಳಿಸಲಿದೆ ಮತ್ತು ನಾಗಾಲ್ಯಾಂಡ್ ನಲ್ಲಿ ಬಿಜೆಪಿ ಮಿತ್ರಕೂಟವು ಅಧಿಕಾರಕ್ಕೆ ಬರಲಿದೆ ಎಂದು ಮತದಾನೋತ್ತರ ಸಮೀಕ್ಷೆಗಳು ಊಹಿಸಿವೆ. ಮೇಘಾಲಯದಲ್ಲಿ ಬಿರುಸಿನ ಸ್ಪರ್ಧೆ ಏರ್ಪಟ್ಟಿದ್ದು, ಕೋನ್ರಾಡ್ ಸಂಗ್ಮಾರ ಎನ್ಪಿಪಿ (ನ್ಯಾಶನಲ್ ಪೀಪಲ್ಸ್ ಪಾರ್ಟಿ) ಏಕೈಕ ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮುವ ನಿರೀಕ್ಷೆಯಿದೆ.

ಎರಡು ಮತದಾನೋತ್ತರ ಸಮೀಕ್ಷೆಗಳ ಸಾರದ ಪ್ರಕಾರ, ತ್ರಿಪುರಾದಲ್ಲಿ ಬಿಜೆಪಿಯು 35 ಸ್ಥಾನಗಳನ್ನು ಪಡೆಯಬಹುದಾಗಿದೆ. 60 ಸ್ಥಾನಗಳ ವಿಧಾನಸಭೆಯಲ್ಲಿ ಸರಳ ಬಹುಮತಕ್ಕೆ 31 ಸ್ಥಾನಗಳ ಅಗತ್ಯವಿದೆ. ರಾಜ್ಯವನ್ನು 30 ವರ್ಷಗಳಿಗೂ ಅಧಿಕ ಸಮಯ ಆಳಿದ್ದ ಎಡ ಪಕ್ಷಗಳು ಈ ಬಾರಿ ಕೇವಲ 12 ಸ್ಥಾನಗಳನ್ನು ಗಳಿಸಬಹುದಾಗಿದೆ. ಎಡಪಕ್ಷಗಳ ಮಿತ್ರಪಕ್ಷ ಕಾಂಗ್ರೆಸ್ ಯಾವುದೇ ಸ್ಥಾನವನ್ನು ಗೆಲ್ಲುವ ನಿರೀಕ್ಷೆಯಿಲ್ಲ ಎಂದು ಸಮೀಕ್ಷೆಗಳು ಅಭಿಪ್ರಾಯಪಟ್ಟಿವೆ.

ರಾಜವಂಶದ ಕುಡಿ ಪ್ರದ್ಯೋತ್ ಕಿಶೋರ್ ದೇವವರ್ಮ(Kishore Dev Varma) ಸ್ಥಾಪಿಸಿರುವ ನೂತನ ಪಕ್ಷ ತಿಪ್ರಾ ಮೋತ 12 ಸ್ಥಾನಗಳನ್ನು ಗೆಲ್ಲುವ ಸಾಧ್ಯತೆಯಿದೆ. ನಾಗಾಲ್ಯಾಂಡ್ ನಲ್ಲಿ ಬಿಜೆಪಿ-ಎನ್ಡಿಪಿಪಿ (ನ್ಯಾಶನಲಿಸ್ಟ್ ಡೆಮಾಕ್ರಟಿಕ್ ಪ್ರೊಗ್ರೆಸಿವ್ ಪಾರ್ಟಿ) ಮಿತ್ರಕೂಟವು ಒಟ್ಟು 60 ಸ್ಥಾನಗಳ ಪೈಕಿ 35-43 ಸ್ಥಾನಗಳನ್ನು ಗೆಲ್ಲಬಹುದಾಗಿದೆ ಎಂದು ಝೀನ್ಯೂಸ್-ಮ್ಯಾಟ್ರೈಝ್ ಅಂದಾಜಿಸಿದೆ.

ಮೇಘಾಲಯದಲ್ಲಿ, ಕೋನ್ರಾಡ್ ಸಂಗ್ಮಾರ ಎನ್ಪಿಪಿ 21-26 ಸ್ಥಾನಗಳೊಂದಿಗೆ ಏಕೈಕ ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಬಹುದು ಎಂದು ಝೀನ್ಯೂಸ್-ಮ್ಯಾಟ್ರೈಝ್ ಹೇಳಿದೆ. 2018ರ ಚುನಾವಣೆಯಲ್ಲಿ, ಕೇವಲ 2 ಸ್ಥಾನಗಳನ್ನು ಗೆದ್ದಿದ್ದ ಬಿಜೆಪಿ ಈ ಬಾರಿ 6-11 ಸ್ಥಾನಗಳನ್ನು ಪಡೆಯಬಹುದು ಎಂದು ಅದು ನಿರೀಕ್ಷಿಸಿದೆ. ಹೊಸದಾಗಿ ಪ್ರವೇಶ ಪಡೆದಿರುವ ತೃಣಮೂಲ ಕಾಂಗ್ರೆಸ್ 8-13 ಸ್ಥಾನಗಳನ್ನು ಗಳಿಸಬಹುದಾಗಿದೆ.

ಎಲ್ಲಾ ಮೂರು ರಾಜ್ಯಗಳ ಮತಗಳ ಎಣಿಕೆ ಗುರುವಾರ ನಡೆಯಲಿದೆ.