ಪಿಎಂ ಕೇರ್ಸ್ ಫಂಡ್‌ 3 ವರ್ಷಗಳಲ್ಲಿ ಪಡೆದ ವಿದೇಶಿ ದೇಣಿಗೆ ಎಷ್ಟು ಕೋಟಿ ರೂ. ಗೊತ್ತೇ?

ಹೊಸದಿಲ್ಲಿ: ಕಳೆದ ಮೂರು ವರ್ಷಗಳಲ್ಲಿ ಪಿಎಂ ಕೇರ್ಸ್‌ ಫಂಡ್‌ ರೂ. 535.44 ಕೋಟಿ ವಿದೇಶಿ ದೇಣಿಗೆ ಪಡೆದಿದೆ ಎಂದು ಅಧಿಕೃತ ದಾಖಲೆಗಳಿಂದ ತಿಳಿದು ಬಂದಿದೆ.

ಕೋವಿಡ್‌ ಸಾಂಕ್ರಾಮಿಕದ ಹಿನ್ನೆಲೆಯಲ್ಲಿ 2020 ರಲ್ಲಿ ಆರಂಭಿಸಲಾದ ಈ ಪಿಎಂ ಕೇರ್ಸ್‌ ಫಂಡ್‌ನ ಆಡಿಟ್‌ ಮಾಡಿದ ಸ್ವೀಕೃತಿ ಮತ್ತು ಪಾವತಿ ವಿವರಗಳಿಂದ ತಿಳಿದು ಬಂದಂತೆ ವಿತ್ತ ವರ್ಷ 2019-20 ರಲ್ಲಿ ರೂ. 0.40 ಕೋಟಿ ವಿದೇಶಿ ದೇಣಿಗೆ 2020-21ರಲ್ಲಿ ರೂ. 494.92 ಕೋಟಿ ಹಾಗೂ 2021-22ರಲ್ಲಿ ರೂ. 40.12 ಕೋಟಿ ವಿದೇಶಿ ದೇಣಿಗೆಯನ್ನು ಪಡೆದಿದೆ ಎಂದು indianexpress.com ವರದಿ ಮಾಡಿದೆ.

ಈ ಪಿಎಂ ಕೇರ್ಸ್‌ ಫಂಡ್‌ ತನ್ನ ವಿದೇಶಿ ದೇಣಿಗೆಗಳಿಂದ ವಿತ್ತ ವರ್ಷ 2019-20 ರಿಂದ 2021-22 ತನಕ ರೂ. 24.85 ಕೋಟಿ ಬಡ್ಡಿ ಪಡೆದಿದೆ.

ಈ ನಿಧಿಗೆ ಸ್ವಯಂಪ್ರೇರಿತ ದೇಣಿಗೆ 2019-20 ರಲ್ಲಿ ರೂ 3,075.85 ಕೋಟಿ ಆಗಿದ್ದರೆ 2020-21 ರಲ್ಲಿ ರೂ. 7,183.77 ಕೋಟಿ ಹಾಗೂ 2021-22ರಲ್ಲಿ ರೂ 1,896.76 ಕೋಟಿ ಆಗಿದೆ.

ಒಟ್ಟಾರೆಯಾಗಿ ಪಿಎಂ ಕೇರ್ಸ್‌ ಫಂಡ್‌ 2019-22 ಅವಧಿಯಲ್ಲಿ ರೂ. 12,691.82 ಕೋಟಿ ದೇಣಿಗೆ ಪಡೆದಿದೆ. ಇದರಲ್ಲಿ ರೂ .12,156.39 ಕೋಟಿ ಸ್ವಯಂಪ್ರೇರಿತ ದೇಣಿಗೆ ಆಗಿದ್ದರೆ ರೂ 535.43 ಕೋಟಿ ವಿದೇಶಿ ದೇಣಿಗೆಯಾಗಿದೆ.

ಲಭ್ಯ ವಿವರದಂತೆ ಈ ನಿಧಿಯನ್ನು  ಸರಕಾರಿ ಆಸ್ಪತ್ರೆಗಳಿಗೆ ವೆಂಟಿಲೇಟರ್‌ಗಳನ್ನು ಖರೀದಿಸಲು, ವಲಸಿಗ ಕಾರ್ಮಿಕರ ಕಲ್ಯಾಣಕ್ಕೆ ಎರಡು 500 ಹಾಸಿಗೆಗಳ ತಾತ್ಕಾಲಿಕ ಕೋವಿಡ್‌ ಆಸ್ಪತ್ರೆಗಳಿಗೆ 162 ಪಿಎಸ್‌ಎ ಮೆಡಿಕಲ್‌ ಆಕ್ಸಿಜನ್‌ ಜನರೇಷನ್‌ ಸ್ಥಾಪವರಗಳಿಗೆ ಕೋವಿಡ್‌ ಲಸಿಕೆ ಖರೀದಿಗೆ ಮತ್ತು ಇತರ ಕೋವಿಡ್‌ ಚಿಕಿತ್ಸೆ ಅಗತ್ಯತೆಗಳಿಗೆ ಬಳಸಲಾಗಿದೆ.