ಹುಬ್ಬಳ್ಳಿ: ಮೈದುನನಿಂದ ಅತ್ತಿಗೆಯ ಕೊಲೆ

ಹುಬ್ಬಳ್ಳಿ: ಅಣ್ಣ-ತಮ್ಮಂದಿರ ಜಗಳ ಬಿಡಿಸಲು ಹೋದ ಅತ್ತಿಗೆಯನ್ನು ಮೈದುನ ಚಾಕುವಿನಿಂದ ಇರಿದು ಕೊಲೆಗೈದ ಘಟನೆ ಹುಬ್ಬಳ್ಳಿಯ ಎಸ್.ಎಂ.ಕೃಷ್ಣ ನಗರದಲ್ಲಿ ನಡೆದಿರುವುದು ವರದಿಯಾಗಿದೆ.

ಸಾದಿಕ್ ಎಂಬವರ ಪತ್ನಿ ಸಾಝಿಯಾ ಬಾನು ಕೊಲೆಯಾದವರು. ಸಾದಿಕ್ ಅವರ ತಮ್ಮ ನಾಸಿರ್ ಕೊಲೆ ಆರೋಪಿ ಎಂದು ತಿಳಿದುಬಂದಿದೆ.

ಸಾದಿಕ್ ಮತ್ತು ನಾಸಿರ್ ಮಧ್ಯೆ ಅದ್ಯಾವುದೋ ವಿಚಾರವಾಗಿ ಜಗಳ ನಡೆದಿದೆ. ಇದು ವಿಪರೀತಕ್ಕೆ ತಿರುಗಿದ್ದು, ನಾಸಿರ್ ಹರಿತವಾದ ಚಾಕುವಿನಿಂದ ಸಾದಿಕ್ ಮೇಲೆ ದಾಳಿಗೆ ಯತ್ನಿಸಿದ್ದಾನೆ. ಈ ವೇಳೆ ಜಗಳ ಬಿಡಿಸಲು ಮಧ್ಯಪ್ರವೇಶಿಸಿದ ಸಾಝಿಯಾರ ಕುತ್ತಿಗೆಯನ್ನು ನಾಸಿರ್ ಚಾಕುವಿನಿಂದ ಸೀಳಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಗಂಭೀರವಾಗಿ ಗಾಯಗೊಂಡಿದ್ದ ಸಾಝಿಯಾರನ್ನು ತಕ್ಷಣ ಸ್ಥಳೀಯರು ಹುಬ್ಬಳ್ಳಿ ಕಿಮ್ಸ್ ಆಸ್ಪತ್ರೆಗೆ ದಾಖಲಿಸಿದರೂ ಅಷ್ಟರಲ್ಲಿ ಅವರು ಕೊನೆಯುಸಿರೆಳೆದಿದ್ದರು ಎಂದು ತಿಳಿದುಬಂದಿದೆ.

ಈ ಬಗ್ಗೆ ಹುಬ್ಬಳ್ಳಿಯ ಕಸಬಾಪೇಟ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.