ಇರಾನ್ ಎಂದಿಗೂ ಶರಣಾಗುವುದಿಲ್ಲ: ಇರಾನ್ ನ ಸರ್ವೋಚ್ಛ ನಾಯಕ ಖಾಮಿನೈ

ಟೆಹರಾನ್: “ಇರಾನ್‌ ನ ಶರಣಾಗತಿಯಿಂದ ಮಾತ್ರ ಅಮೆರಿಕ ತೃಪ್ತವಾಗುತ್ತದೆ ಎಂಬ ಸತ್ಯವನ್ನು ಅಮೆರಿಕ ಅಧ್ಯಕ್ಷ ಟ್ರಂಪ್ ಬಹಿರಂಗಪಡಿಸಿದ್ದಾರೆ. ಆದರೆ ಇರಾನ್ ಎಂದಿಗೂ ಶರಣಾಗುವುದಿಲ್ಲ. ನಮ್ಮ ರಾಷ್ಟ್ರವು ಶಕ್ತಿಶಾಲಿಯಾಗಿದೆ”, ಎಂದು ಇರಾನ್ ಸರ್ವೋಚ್ಛ ನಾಯಕ ಅಯತೊಲ್ಲಾ ಆಲಿ ಖಾಮಿನೈ ಹೇಳಿದ್ದಾರೆ ಎಂದು Aljazeera ವರದಿ ಮಾಡಿದೆ.

ಇರಾನ್ ನ ಟೆಲಿವಿಷನ್ ಗೆ ನೀಡಿದ ರೆಕಾರ್ಡೆಡ್ ಸಂದೇಶದಲ್ಲಿ ಖಾಮಿನೈ ಅವರು ಈ ಹೇಳಿಕೆ ನೀಡಿದ್ದಾರೆ. ಟ್ರಂಪ್, ತಮ್ಮ ಭಾಷಣವೊಂದರಲ್ಲಿ ಇರಾನ್ ಶರಣಾಗಬೇಕು ಎಂದು ಹೇಳಿದ್ದರು ಎಂದು ಅವರು ಉಲ್ಲೇಖಿಸಿದ್ದಾರೆ.

ಅಮೆರಿಕದ ನೆಲೆಗಳ ಮೇಲೆ ದಾಳಿ ಮಾಡುವುದು ಒಂದು ದೊಡ್ಡ ಸಾಧನೆ. ಭವಿಷ್ಯದಲ್ಲಿ ನಮ್ಮ ಮೇಲೆ ಬರುವ ಬೆದರಿಕೆಗಳಿಗೆ ಅದೇ ರೀತಿಯ ಪ್ರತ್ಯುತ್ತರ ನೀಡಲಾಗುವುದು. ಭವಿಷ್ಯದಲ್ಲಿ ಇರಾನ್ ನ ವಿರುದ್ಧದ ಯಾವುದೇ ಆಕ್ರಮಣವು ದೊಡ್ಡ ಬೆಲೆಯನ್ನು ತೆರಬೇಕಾಗುತ್ತದೆ ಎಂದು ಖಾಮಿನೈ ಎಚ್ಚರಿಕೆ ನೀಡಿದ್ದಾರೆ.

ಇರಾನ್‌ ನ ಶತ್ರುಗಳು ದಾಳಿ ಮಾಡಲು ಕ್ಷಿಪಣಿಗಳು ಅಥವಾ ನಮ್ಮ ಪರಮಾಣು ಕಾರ್ಯಕ್ರಮದಂತಹ ನೆಪಗಳನ್ನು ಬಳಸುತ್ತಾರೆ. ಆದರೆ ಅವರು ವಾಸ್ತವವಾಗಿ ನಮ್ಮ ಶರಣಾಗತಿ ಬಯಸುತ್ತಿದ್ದಾರೆ. ಯಹೂದಿಗಳ ಆಡಳಿತ ಬಹುತೇಕ ಕುಸಿದು ಬಿದ್ದಿದೆ, ಇಸ್ರೇಲ್ ಪುಡಿ ಪುಡಿಯಾಗಿದೆ ಎಂದು ಇರಾನ್ ನ ಸರ್ವೋಚ್ಛ ನಾಯಕ ಖಾಮಿನೈ ಹೇಳಿದ್ದಾರೆ.

ಅಮೆರಿಕಕ್ಕೆ ಇರಾನ್ ತಪರಾಕಿ ಬಾರಿಸಿದೆ. ಅಮೆರಿಕವು ಮಧ್ಯಪ್ರವೇಶಿಸದಿದ್ದರೆ, ಯಹೂದಿಗಳ ಆಡಳಿತವಿರುವ ಇಸ್ರೇಲ್ ಸಂಪೂರ್ಣವಾಗಿ ನಾಶವಾಗುತ್ತದೆ ಎಂದು ಭಾವಿಸಿದ್ದರಿಂದ ಮಾತ್ರ ಅಮೆರಿಕವು ಯುದ್ಧದಲ್ಲಿ ಮಧ್ಯಪ್ರವೇಶಿಸಿದೆ. ಇಸ್ಲಾಮಿಕ್ ಗಣರಾಜ್ಯ ಇರಾನ್ ನ ದಾಳಿಯಿಂದ ಯಹೂದಿಗಳ ಆಡಳಿತವಿರುವ ಇಸ್ರೇಲ್ ಬಹುತೇಕ ಪುಡಿಪುಡಿಯಾಯಿತು ಎಂದು ಅವರು ವೀಕ್ಷಕರಿಗೆ ತಿಳಿಸಿದ್ದಾರೆ.