ದಾಖಲೆಯ 29ನೇ ಬಾರಿ ಎವರೆಸ್ಟ್ ಪರ್ವತವೇರಿದ ನೇಪಾಳದ ಪರ್ವತಾರೋಹಿ ಕಮಿರಿತ ಶೆರ್ಪ

ಕಠ್ಮಂಡು: `ಎವರೆಸ್ಟ್ ಮ್ಯಾನ್' ಎಂದೇ ಹೆಸರಾದ ನೇಪಾಳದ ಕಮಿರಿತ ಶೆರ್ಪ ರವಿವಾರ 29ನೇ ಬಾರಿ ವಿಶ್ವದ ಅತೀ ಎತ್ತರದ ಶಿಖರ ಎವರೆಸ್ಟ್ ಪರ್ವತವನ್ನು ಏರುವ ಮೂಲಕ ತನ್ನದೇ ದಾಖಲೆಯನ್ನು ತಿದ್ದಿ ಬರೆದಿದ್ದಾರೆ.

ಪರ್ವತಾರೋಹಿ ಮತ್ತು ಗೈಡ್ ಆಗಿರುವ 54 ವರ್ಷದ ಶೆರ್ಪ ಕಳೆದ ವರ್ಷ 8848.86 ಮೀಟರ್ ಎತ್ತರದ ಎವರೆಸ್ಟ್ ಅನ್ನು ಒಂದೇ ವಾರದಲ್ಲಿ ಎರಡು ಬಾರಿ ಏರಿದ್ದು ಇದು 28ನೇ ಬಾರಿಯ ಎವರೆಸ್ಟ್ ಆರೋಹಣವಾಗಿದೆ. ಈ ಬಾರಿಯೂ ಒಂದೇ ವಾರದಲ್ಲಿ ಎರಡು ವಾರಿ ಏರುವ ಯೋಜನೆಯಿದೆ ಎಂದವರು ಹೇಳಿದ್ದಾರೆ. `ರವಿವಾರ ಬೆಳಿಗ್ಗೆ 7:25(ಸ್ಥಳೀಯ ಕಾಲಮಾನ)ಕ್ಕೆ ಕಮಿರಿತ ಶೆರ್ಪ ಸಾಗರ್‍ಮಾತ ಪರ್ವತದ ಶಿಖರಕ್ಕೆ ತಮ್ಮ ತಂಡವನ್ನು ಯಶಸ್ವಿಯಾಗಿ ಮುನ್ನಡೆಸಿದ್ದು ಅವರಿಗೆ ಮತ್ತು ತಂಡಕ್ಕೆ ಅಭಿನಂದನೆಗಳು' ಎಂದು ನೇಪಾಳದ ಪ್ರವಾಸೋದ್ಯಮ ಇಲಾಖೆ ಟ್ವೀಟ್(ಎಕ್ಸ್) ಮಾಡಿದೆ. ಎವರೆಸ್ಟ್ ಪರ್ವತಕ್ಕೆ ನೇಪಾಳದಲ್ಲಿ ಸಾಗರ್‍ಮಾತ ಶಿಖರ ಎಂಬ ಹೆಸರಿದೆ. ನೇಪಾಳದೆ ಮತ್ತೊಬ್ಬ ಪರ್ವತಾರೋಹಿ ಪಸಂಗ್ ದವಾ ಶೆರ್ಪ ಎವರೆಸ್ಟ್ ಶಿಖರವನ್ನು 27 ಬಾರಿ ಏರಿದ್ದ ದಾಖಲೆಯನ್ನು ಕಳೆದ ವರ್ಷ ಕಮಿರಿತ ಶೆರ್ಪ ಮುರಿದು ಹೊಸ ದಾಖಲೆ ಬರೆದಿದ್ದರು.