ಉಡುಪಿ: ಮನೆಗೆ ನುಗ್ಗಿ ಲಕ್ಷಾಂತರ ರೂ. ಮೌಲ್ಯದ ನಗನಗದು ಕಳವು

ಉಡುಪಿ, ಜು.1: ಮನೆಯೊಂದಕ್ಕೆ ನುಗ್ಗಿದ ಕಳ್ಳರು ಲಕ್ಷಾಂತರ ರೂ. ಮೌಲ್ಯದ ನಗ ನಗದು ಕಳವು ಮಾಡಿರುವ ಘಟನೆ 76-ಬಡಗುಬೆಟ್ಟು ಗ್ರಾಮದ ಇಂದಿರಾ ನಗರ ಎಂಬಲ್ಲಿ ಜೂ.30ರಂದು ಬೆಳಗ್ಗೆ ನಡೆದಿದೆ.

ಶ್ರೀಮತಿ ಪೂಜಾತಿ ಎಂಬವರ ಮನೆಯ ಹಿಂಭಾಗದ ಬಾಗಿಲು ಮುರಿದು ಒಳಪ್ರವೇಶಿಸಿದ ಕಳ್ಳರು, ಕೋಣೆಯ ಕಾಪಾಟಿನಲ್ಲಿಟ್ಟಿದ್ದ ಚಿನ್ನದ ಕರಿಮಣಿ ಸರ, ಚಿನ್ನದ ಚೈನ್, ಚಿನ್ನದ ಸಣ್ಣ ನೆಕ್ಲೇಸ್, 4 ಚಿನ್ನದ ಉಂಗುರಗಳು, ಒಂದು ಜೊತೆ ಚಿನ್ನದ ಜುಮುಕಿ ಬೆಂಡೋಲೆ ಹಾಗೂ 15,500ರೂ. ನಗದು ಮತ್ತು ಇನ್ನೊಂದು ಕೋಣೆಯ ಕಾಪಾಟಿನಟ್ಟಿದ್ದ ಚಿನ್ನದ ನೆಕ್ಲೇಸ್, ಎರಡು ಜೊತೆ ಚಿನ್ನದ ಬಳೆ, ಚಿನ್ನದ ಒಂದು ಜೊತೆ ಲೋಲಕ ಬೆಂಡೋಲೆ, ಚಿನ್ನದ ಉಂಗುರ, ನಾಲ್ಕು ಜೊತೆ ಚಿನ್ನದ ಕಿವಿಯೋಲೆಗಳನ್ನು ಕಳವು ಮಾಡಿಕೊಂಡು ಹೋಗಿರುವುದಾಗಿ ದೂರಲಾಗಿದೆ.

ಒಟ್ಟು ಕಳವಾದ 188 ಗ್ರಾಂ ತೂಕದ ಚಿನ್ನಾಭರಣಗಳು ಹಾಗೂ ನಗದು ಮೌಲ್ಯ 8,61,500ರೂ. ಎಂದು ಅಂದಾಜಿಸಲಾಗಿದೆ. ಈ ಬಗ್ಗೆ ಉಡುಪಿ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.