ಉತ್ತರ ಪ್ರದೇಶ: ಸ್ನೇಹಿತನೊಂದಿಗೆ ಸೇರಿ ಪತಿಯ ಹತ್ಯೆ; ಬ್ರಿಟನ್ ಮೂಲದ ಸಿಖ್ ಮಹಿಳೆಗೆ ಮರಣದಂಡನೆ

ಲಕ್ನೋ: ಸ್ನೇಹಿತನ ನೆರವಿನೊಂದಿಗೆ ಅನಿವಾಸಿ ಭಾರತೀಯ ಪತಿಯನ್ನು ಏಳು ವರ್ಷಗಳ ಹಿಂದೆ ಹತ್ಯೆ ಮಾಡಿದ ಆರೋಪದಲ್ಲಿ ಬ್ರಿಟನ್ ಮೂಲದ ಸಿಕ್ಖ್ ಮಹಿಳೆ ರಣದೀಪ್ ಕೌರ್ ಎಂಬಾಕೆಗೆ ಉತ್ತರ ಪ್ರದೇಶದ ಶಹಾಜಹಾನ್ಪುರ ನ್ಯಾಯಾಲಯ ಮರಣ ದಂಡನೆ ಶಿಕ್ಷೆ ವಿಧಿಸಿದೆ.

ಆಕೆಯ ಸ್ನೇಹಿತ ಹಾಗೂ ಸಹವರ್ತಿ ಗುರುಪ್ರೀತ್ ಎಂಬಾತನಿಗೆ ಜೀವಾವಧಿ ಶಿಕ್ಷೆ ಹಾಗೂ 3 ಲಕ್ಷ ರೂಪಾಯಿ ದಂಡ ವಿಧಿಸಿ ನ್ಯಾಯಾಲಯ ತೀರ್ಪು ನೀಡಿದೆ.

ಸುಖಜೀತ್ ಸಿಂಗ್ (34) ಮಕ್ಕಳಾದ ಅರ್ಜುನ್ ಮತ್ತು ಆರ್ಯನ್ ಜತೆ ನಿದ್ದೆ ಮಾಡುತ್ತಿದ್ದಾಗ ಕೌರ್ ಹಾಗೂ ಗುರುಪ್ರೀತ್, ಸುಖಜೀತ್ ನನ್ನು ಹತ್ಯೆ ಮಾಡಿದ್ದು ಸಾಬೀತಾಗಿದೆ ಎಂದು ಹೆಚ್ಚುವರಿ ಜಿಲ್ಲಾ ಸರ್ಕಾರಿ ಅಭಿಯೋಜಕ ಶ್ರೀಪಾಲ್ ವರ್ಮಾ ಹೇಳಿದ್ದಾರೆ. ತಾಯಿ ನಮ್ಮ ತಂದೆಯನ್ನು ದಿಂಬಿನಿಂದ ಉಸಿರುಗಟ್ಟಿಸಿ, ಬಳಿಕ ಗುರುಪ್ರೀತ್, ತಲೆಗೆ ಸುತ್ತಿಗೆಯಿಂದ ಹೊಡೆದು ಸಾಯಿಸಿದ್ದಾಗಿ ಮಗ ಅರ್ಜುನ್ ನ್ಯಾಯಾಲಯದಲ್ಲಿ ಹೇಳಿಕೆ ನೀಡಿದ್ದ. ಬಳಿಕ ಗುರುಪ್ರೀತ್ ತನ್ನ ಜೇಬಿನಿಂದ ಚಾಕು ತೆಗೆದು ಕೊಟ್ಟಿದ್ದು ಕೌರ್, ತನ್ನ ಪತಿಯ ಕುತ್ತಿಗೆ ಸೀಳಿದಳು ಎಂದು ಅರ್ಜುನ್ ಸಾಕ್ಷ್ಯ ನುಡಿದದ್ದನ್ನು ವರ್ಮಾ ಉಲ್ಲೇಖಿಸಿದ್ದಾರೆ.

2016ರ ಆಗಸ್ಟ್ ನಲ್ಲಿ ಸುಖಜೀತ್, ಅವರ ಪತ್ನಿ, ಮಕ್ಕಳಾದ ಅರ್ಜುನ್ ಹಾಗೂ ಆರ್ಯನ್ ತಮ್ಮ ತವರೂರಿಗೆ ಭೇಟಿ ನೀಡಿದ್ದರು. ಪಂಜಾಬ್ ಮೂಲದ ಅನಿವಾಸಿ ಭಾರತೀಯ ಗುರುಪ್ರೀತ್ ಕೂಡಾ ಜತೆಗಿದ್ದ. 2016ರ ಸೆಪ್ಟೆಂಬರ್ 2ರಂದು ಸುಖಜೀತ್ ಹತ್ಯೆಯಾಗಿರುವುದು ಕಂಡುಬಂದಿತ್ತು.

ಪತಿಯ ಕುಟುಂಬದವರು ನನ್ನನ್ನು ಈ ಪ್ರಕರಣದಲ್ಲಿ ಸಿಲುಕಿಸಿದ್ದಾರೆ ಎಂದು ಶಿಕ್ಷೆಗೆ ಒಳಗಾಗಿರುವ ಕೌರ್ ಪ್ರತಿಕ್ರಿಯಿಸಿದ್ದು, ಇದರ ವಿರುದ್ಧ ಮೇಲ್ಮನವಿ ಸಲ್ಲಿಸುವುದಾಗಿ ಹೇಳಿದ್ದಾರೆ. ಪತಿ ತಮ್ಮ ಇಡೀ ಆಸ್ತಿಯನ್ನು ಮಾರಾಟ ಮಾಡಿ ಇಂಗ್ಲೆಂಡಿಗೆ ತೆರಳಲು ಮುಂದಾಗಿದ್ದರು. ಆದ್ದರಿಂದ ಕುಟುಂಬದ ಸದಸ್ಯರೇ ಹತ್ಯೆಮಾಡಿ ಈ ಪ್ರಕರಣದಲ್ಲಿ ತಪ್ಪಾಗಿ ನನ್ನನ್ನು ಸಿಲುಕಿಸಿದ್ದಾರೆ ಎಂದು ಕೌರ್ ಆಪಾದಿಸಿದ್ದಾಗಿ ಜೈಲು ಅಧಿಕಾರಿಗಳು ಹೇಳಿದ್ದಾರೆ.