ಕೈಗಾರಿಕಾ ತ್ಯಾಜ್ಯಕ್ಕೆ ಬಲಿಯಾದ ಜಲಚರ, ಜಾನುವಾರು

ರಾಯಚೂರು: ತಾಲೂಕಿನ ಯದ್ಲಾಪೂರು ಗ್ರಾಪಂ ವ್ಯಾಪ್ತಿಯ ಗಂಜಳ್ಳಿ ಹಾಗೂ ಹೆಗ್ಗಸನಹಳ್ಳಿ ಗ್ರಾಮದ ಹಳ್ಳಕ್ಕೆ ಸುತ್ತಮುತ್ತಲಿನ ಕಾರ್ಖಾನೆಗಳ ತ್ಯಾಜ್ಯ ನೀರು ಹರಿದು ಹಳ್ಳದಲ್ಲಿದ್ದ ಮೊಸಳೆ, ಮೀನುಗಳು ಹಾಗೂ ಕುರಿಗಳು ಸಾವಿಗೀಡಾಗಿದ್ದು, ಗ್ರಾಮಸ್ಥರಲ್ಲಿ ಆತಂಕ ಮೂಡಿಸಿದೆ.

ರಾಯಚೂರು ತಾಲೂಕಿನ ದೇವಸುಗೂರು, ಶಕ್ತಿನಗರ, ವಡ್ಲೂರು ಗ್ರಾಮದ ಸುತ್ತಮುತ್ತಲು ಅನೇಕ ರಾಸಾಯನಿಕ, ಕೈಗಾರಿಕಾ ಕಾರ್ಖಾನೆಗಳಿದ್ದು, ಕಲುಷಿತ ನೀರು ವೈಜ್ಞಾನಿಕವಾಗಿ ವಿಲೇವಾರಿ ಮಾಡದೆ ಹಳ್ಳ, ಕೃಷ್ಣಾ ನದಿ ಹಾಗೂ ಸಮೀಪದ ಹೊಲಗಳಿಗೆ ಅಕ್ರಮವಾಗಿ ಹರಿಬಿಡಲಾಗುತ್ತಿದೆ. ಇದರಿಂದ ಜಲಚರಗಳು ಹಾಗೂ ಜಾನುವಾರುಗಳು ಮೃತಪಡುತ್ತಿದ್ದು, ಜತೆಗೆ ಬೆಳೆಗಳೂ ಹಾಳಾಗುತ್ತಿವೆ ಎಂದು ಸ್ಥಳೀಯ ಗ್ರಾಮಸ್ಥರು ಆರೋಪ ಮಾಡಿದ್ದಾರೆ.

ಎರಡು ದಿನಗಳು ಹಿಂದಷ್ಟೇ ಸುರಿದ ಮಳೆಯಿಂದಾಗಿ ಗಂಜಳ್ಳಿ ಹಳ್ಳ ತುಂಬಿ ಹರಿದಿದ್ದು, ಕಾರ್ಖಾನೆಗಳ ರಸಾಯನಿಕ ಮಿಶ್ರಿತ ತ್ಯಾಜ್ಯ ನೀರು ಹಳ್ಳಕ್ಕೆ ಹರಿಬಿಟ್ಟ ಪರಿಣಾಮ ಮೊಸಳೆ, ಮೇಯಲು ಹೋಗಿದ್ದ ಎರಡು ಕುರಿಗಳು ಹಾಗೂ ನೂರಾರು ಮೀನುಗಳು ಸತ್ತಿವೆ. ಇದರಿಂದ ಗ್ರಾಮಸ್ಥರು ಮೂಗು ಮುಚ್ಚಿಕೊಂಡು ಓಡಾಡುವಂತಾಗಿತ್ತು. ಅನೇಕ ವರ್ಷಗಳಿಂದ ಇಲ್ಲಿನ ಶಿಲ್ಪಾ ಕಂಪನಿ, ರೈಕೆಮ್ ಹಾಗೂ ಸ್ಥಳೀಯ ಕಾರ್ಖಾನೆಗಳು ವೈಜ್ಞಾನಿಕವಾಗಿ ತ್ಯಾಜ್ಯ ವಿಲೇವಾರಿ ಮಾಡದೆ ಟ್ಯಾಂಕರ್ ಮೂಲಕ ನೀರನ್ನು ರಾತ್ರಿಯ ವೇಳೆ ಹಳ್ಳಕ್ಕೆ, ಜಮೀನುಗಳಿಗೆ ಹರಿಬಿಡುತ್ತಿವೆ. ಪ್ರಶ್ನೆ ಮಾಡಿದವರ ಮೇಲೆ ಗುಂಡಾಗಳಿಂದ ಬೆದರಿಕೆ, ಧಮ್ಕಿ ಹಾಕಲಾಗುತ್ತಿದೆ. ಪರಿಸರ ಹಾಗೂ ಮಾಲಿನ್ಯ ನಿಯಂತ್ರಣ ಮಂಡಳಿಗೆ ಅನೇಕ ಬಾರಿ ದೂರು ನೀಡಿದರೂ ಪ್ರಯೋಜನವಾಗಿಲ್ಲ. ಸ್ಥಳೀಯ ಪೊಲೀಸ್ ಠಾಣೆಗೂ ದೂರು ನೀಡಿದರೂ ಯಾರೂ ಕ್ಯಾರೆ ಮಾಡುತ್ತಿಲ್ಲ ಎಂದು ಗ್ರಾಮಸ್ಥರು ಗಂಭೀರ ಆರೋಪ ಮಾಡಿದ್ದಾರೆ.

ಬಹುತೇಕ ಆಂಧ್ರಪ್ರದೇಶ, ತೆಲಂಗಾಣ ಹಾಗೂ ಹೊರ ರಾಜ್ಯದ ಉದ್ಯಮಿಗಳು ಇಲ್ಲಿಯೇ ಬಂದು ಕಾರ್ಖಾನೆ ಸ್ಥಾಪಿಸುತ್ತಿದ್ದಾರೆ. ಇಲ್ಲಿನ ಆಡಳಿತ ವ್ಯವಸ್ಥೆ, ಜನಪ್ರತಿನಿಧಿಗಳ ಮೌನ ಸಮ್ಮತಿ, ಪ್ರಶ್ನೆ ಮಾಡದ ಜನರ ಮುಗ್ಧತೆಯುಂದಾಗಿ ರಾಯಚೂರು ಕೈಗಾರಿಕಾ ಪ್ರದೇಶ ಅವರಿಗೆ ಹೇಳಿ ಮಾಡಿಸಿದಂತಾಗಿದೆ. ಇಲ್ಲಿನ ಜಾಗ, ನೀರು, ನೈಸರ್ಗಿಕ ಸಂಪನ್ಮೂಲಗಳ ಪಡೆದರೂ ಸ್ಥಳೀಯರಿಗೆ ಉದ್ಯೋಗ ನೀಡದೆ ಅನ್ಯ ರಾಜ್ಯದವರನ್ನೇ ನೇಮಿಸಿಕೊಂಡಿದ್ದಾರೆ. ಈಗ ಸ್ಥಳೀಯರಿಗೆ ಕಲುಷಿತ ನೀರು, ಕಲುಷಿತ ಗಾಳಿ(ವಾಯು) ಉಚಿತವಾಗಿ ನೀಡುತ್ತಿದ್ದಾರೆ.