ಚಾಮರಾಜನಗರ ಜಿಲ್ಲೆಯಲ್ಲಿ ಆದಿವಾಸಿ ಗೃಹಭಾಗ್ಯಕ್ಕೆ ದಾಖಲೆಗಳ ಸಂಗ್ರಹ

ಚಾಮರಾಜನಗರ, ಡಿ.8: ಕರ್ನಾಟಕ ತಮಿಳುನಾಡು ಮತ್ತು ಕೇರಳ ರಾಜ್ಯಗಳ ಗಡಿ ಚಾಮರಾಜನಗರ ಜಿಲ್ಲೆಯಲ್ಲಿ ವಾಸ ಮಾಡುತ್ತಿರುವ ಬುಡಕಟ್ಟು ಸಮುದಾಯದ ಸೂರಿಲ್ಲದವರಿಗೆ ವಸತಿ ಸೌಲಭ್ಯ ಕಲ್ಪಿಸಲು ಇದೀಗ ದಾಖಲೆಗಳ ಸಂಗ್ರಹ ಆರಂಭವಾಗಿದೆ.

ಮುಖ್ಯಮಂತ್ರಿ ಆದಿವಾಸಿ ಗೃಹಭಾಗ್ಯ ಎಂಬ ಹೆಸರಿನ ಯೋಜನೆಯಡಿ ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿರುವ ಅರಣ್ಯ ಮತ್ತು ಅರಣ್ಯಾಧಾರಿತ ಸಮುದಾಯಗಳಾದ ಸೋಲಿಗ, ಹಸಲರು, ಗೌಡಲು, ಸಿದ್ಧ್ದಿ, ಕುಡಿಯ, ಮಲೆ ಕುಡಿಯ, ಕಾಡು ಕುರುಬ, ಇರುಳಿಗ, ಬೆಟ್ಟ ಕುರುಬ, ಯರವ, ಪಣಿಯನ್ ಇತ್ಯಾದಿ ಸಮುದಾಯಗಳ 6,856 ವಸತಿರಹಿತ ಕುಟುಂಬಗಳಿಗೆ ಸೌಲಭ್ಯ ಒದಗಿಸಿಕೊಡಲು ಸೆಪ್ಟಂಬರ್‌ನಲ್ಲಿ ನಡೆದಿದ್ದ ಸಚಿವ ಸಂಪುಟ ಸಭೆಯಲ್ಲಿ ತೀರ್ಮಾನಿಸಲಾಗಿತ್ತು. ಈ ಯೋಜನೆಗಾಗಿ 160 ಕೋಟಿ ರೂ.ಅನುದಾನವನ್ನು ಮೀಸಲು ಇಟ್ಟು, ಪ್ರತಿ ಮನೆಯನ್ನು 4.50 ಲಕ್ಷ ರೂ. ವೆಚ್ಚದಲ್ಲಿ ನಿರ್ಮಿಸಲಾಗುವುದು, ಇದೀಗ ಈ ಸೌಲಭ್ಯವನ್ನು ಜಾರಿಗೊಳಿಸುವ ಸಲುವಾಗಿ ರಾಜ್ಯ ಪರಿಶಿಷ್ಟ ವರ್ಗಗಳ ಕಲ್ಯಾಣ ಇಲಾಖೆಯಿಂದ ಚಾಮರಾಜನಗರ ಜಿಲ್ಲೆಯ ಇಲಾಖೆಗೆ ಸೂಚನೆ ಬಂದಿದೆ.

ಚಾಮರಾಜನಗರ ಜಿಲ್ಲೆಯಲ್ಲಿ ವಸತಿ ರಹಿತ ಆದಿವಾಸಿಗಳ ದಾಖಲೆಗಳ ಸಂಗ್ರಹ ಆರಂಭಗೊಂಡಿದೆ. ಭಾಗಶಃ ಅರಣ್ಯ ಪ್ರದೇಶದಿಂದ ಕೂಡಿರುವ ಮತ್ತು ಆದಿವಾಸಿಗಳ ವಾಸಸ್ಥಳ ಗಡಿಜಿಲ್ಲೆ ಚಾಮರಾಜನಗರ. ಇಲ್ಲಿ ಸೋಲಿಗ, ಕಾಡುಕುರುಬ, ಬೆಟ್ಟ ಕುರುಬ ಸಮುದಾಯ ನೆಲೆ ನಿಂತಿದೆ. ಜಿಲ್ಲಾಡಳಿತದಿಂದ ಇವರಲ್ಲಿ ವಸತಿ ರಹಿತರ ಸರ್ವೇ ಮಾಡಿ ಪಟ್ಟಿ

ಮಾಡಲಾಗಿದೆ. ಈಗ ಇವರ ದಾಖಲೆಗಳ ಸಂಗ್ರಹ ಮಾಡಲು ಮಾಹಿತಿಯನ್ನು ಪ್ರಚಾರ ಮಾಡಲಾಗುತ್ತಿದ್ದು, ವಸತಿ ರಹಿತರು ತಾಲೂಕುಗಳಲ್ಲಿರುವ ಪರಿಶಿಷ್ಟ ವರ್ಗಗಳ ಕಲ್ಯಾಣ ಇಲಾಖೆಯಲ್ಲಿ ಅಗತ್ಯ ದಾಖಲೆಗಳನ್ನು ಸಲ್ಲಿಸಬೇಕಾಗಿದೆ.

ವಸತಿರಹಿತ ಆದಿವಾಸಿಗಳು ಅಗತ್ಯ ದಾಖಲೆಗಳನ್ನು ಒದಗಿಸುವ ಮೂಲಕ ಯೋಜನೆಯನ್ನು ಬಳಕೆ ಮಾಡಿಕೊಳ್ಳಲು ಮುಂದಾಗಬೇಕಾಗಿದೆ. ಫಲಾನುಭವಿಗಳು ನೀಡುವ ದಾಖಲೆಗಳಲ್ಲಿ ಈ ಹಿಂದೆ ಬೇರೆ ಯೋಜನೆಯಡಿ ವಸತಿ ಸೌಲಭ್ಯ ಪಡೆಯದೆ ಇರುವುದು ಬಹುಮುಖ್ಯವಾಗಿರುತ್ತದೆ. ಉಳಿದ ಸರಳ ದಾಖಲೆಗಳನ್ನು ಸಲ್ಲಿಸಲು ಹಲವರು ಅನಕ್ಷರಸ್ಥ ರಾಗಿರುವ ಆದಿವಾಸಿಗಳಿಗೆ ಸ್ವಲ್ಪ ತ್ರಾಸವಾಗಬಹುದು. ಈ ಹಿನ್ನೆಲೆಯಲ್ಲಿ ಪರಿಶಿಷ್ಟ ವರ್ಗಗಳ ಕಲ್ಯಾಣ ಇಲಾಖೆ ಅಧಿಕಾರಿಗಳು, ಸಿಬ್ಬಂದಿಯೊಂದಿಗೆ ಸಮುದಾಯದ ಸಂಘಟನೆಗಳ ಸಹಕಾರವನ್ನು ಪಡೆದುಕೊಳ್ಳಲೇಬೇಕಿದೆ. ಜನನ-ಮರಣ ಪ್ರಮಾಣಪತ್ರ, ಆಧಾರ್ ಕಾರ್ಡ್ ಇಲ್ಲದವರಿಗೆ ಸಕಾಲದಲ್ಲಿ ದಾಖಲೆಗಳನ್ನು ಮಾಡಿಸಿಕೊಡಬೇಕಿದೆ.

ಮುರಿದ ಜೋಪಡಿ ಪಾಳು ಬಿದ್ದಂತಿರುವ, ಗೋಡೆ ಬಿರುಕು ಬಿಟ್ಟಿರುವ, ಕಿಟಕಿ, ಬಾಗಿಲುಗಳು ಮುರಿದು ಹೋಗಿರುವ ಮನೆ, ಗುಡಿಸಲುಗಳು, ಜೋಪಡಿಗಳಲ್ಲಿ ಜಿಲ್ಲೆಯ ಆದಿ ವಾಸಿಗಳು ಜೀವನ ನಡೆಸುತ್ತಿದ್ದಾರೆ. ಚಿಕ್ಕ ಮನೆಯಲ್ಲಿ ಹಲವು ಜನರು ವಾಸ ಮಾಡಲಾಗದೆ ಪಕ್ಕದಲ್ಲಿ ಜೋಪಡಿ, ಶೀಟ್‌ಗಳನ್ನು ಕಟ್ಟಿಕೊಂಡಿದ್ದಾರೆ. ಮಳೆ ಬಂದರೆ ಸೋರುವ ಮನೆಗಳು ಅದಿವಾಸಿಗಳ ಶೋಚನಿಯ ಬದುಕಿಗೆ ಹಿಡಿದ ಕನ್ನಡಿಯಾಗಿದೆ.

ಅರಣ್ಯವಾಸಿಗಳ ಸಮಗ್ರ ಸಮೀಕ್ಷೆ :

ಚಾಮರಾಜನಗರ ಜಿಲ್ಲಾಡಳಿತದಿಂದ ಮನೆ ಇಲ್ಲದ ಆದಿವಾಸಿಗಳಿಗೆ ವಸತಿ ಸೌಲಭ್ಯ ಕಲ್ಪಿಸುವುದಕ್ಕಾಗಿ ಈ ಹಿಂದೆ ಸಮೀಕ್ಷೆ ನಡೆಸಲಾಗಿತ್ತು. ಅದರ ಪ್ರಕಾರ, ಚಾಮರಾಜನಗರ ತಾಲೂಕಿನಲ್ಲಿ 810 (ನಿವೇಶನ ಲಭ್ಯವಿದ್ದು, ಮನೆ ಇಲ್ಲದ ಕುಟುಂಬಗಳು-810), ಕೊಳ್ಳೇಗಾಲ ತಾಲೂಕಿನಲ್ಲಿ 1,049 (ನಿವೇಶನ ಲಭ್ಯವಿದ್ದು, ಮನೆ ಇಲ್ಲದ ಕುಟುಂಬ-1,049. ನಿವೇಶನ ಮತ್ತು ಮನೆ ಇಲ್ಲದ ಕುಟುಂಬ ಗಳು-199), ಗುಂಡ್ಲುಪೇಟೆ ತಾಲೂಕಿನಲ್ಲಿ 314 (ನಿವೇಶನ ಲಭ್ಯವಿದ್ದು, ಮನೆ ಇಲ್ಲದ ಕುಟುಂಬ-279, ನಿವೇಶನ ಮತ್ತು ಮನೆ ಇಲ್ಲದ ಕುಟುಂಬಗಳು-35), ಯಳಂದೂರು ತಾಲೂಕಿನಲ್ಲಿ 623 (ನಿವೇಶನ ಲಭ್ಯವಿದ್ದು, ಮನೆ ಇಲ್ಲದ ಕುಟುಂಬಗಳು-623) ಕುಟುಂಬಗಳು ಸೇರಿ ಒಟ್ಟಾರೆ 2,995 ಕುಟುಂಬಗಳಿಗೆ ವಸತಿ ಸೌಲಭ್ಯದ ಅಗತ್ಯವಿರುವುದು ಸರ್ವೇಯಲ್ಲಿ ದಾಖಲಾಗಿದೆ.

ಈ ವರದಿಯನ್ನು ಸರಕಾರಕ್ಕೆ ಸಲ್ಲಿಕೆ ಮಾಡಿ ವಸತಿ ಸೌಲಭ್ಯ ನೀಡಬೇಕೆಂದು ಪ್ರಸ್ತಾವನೆಯನ್ನು ಸಲ್ಲಿಸಲಾಗಿತ್ತು. ಬೇರೆ ಜಿಲ್ಲೆಗಳಲ್ಲೂ ಇರುವ ಅಂದರೆ, ರಾಜ್ಯದಲ್ಲಿ ಒಟ್ಟಾರೆಯಾಗಿ ಇರುವ 6,856 ವಸತಿ ರಹಿತರಿಗೆ ಸೌಲಭ್ಯ ನೀಡುವ ಸಲುವಾಗಿ ಮುಖ್ಯಮಂತ್ರಿ ಆದಿವಾಸಿ ಗೃಹಭಾಗ್ಯ ಯೋಜನೆಯನ್ನು ಜಾರಿಗೆ ತರಲಾಯಿತು. ಈ ಹಿನ್ನೆಲೆಯಲ್ಲಿ ಜಿಲ್ಲೆಯಲ್ಲಿ ನಡೆಸಿರುವ ಸರ್ವೇಯಲ್ಲಿ ಪತ್ತೆಯಾಗಿರುವ 2,995 ವಸತಿ ರಹಿತರ ದಾಖಲೆಗಳನ್ನು ಸಂಗ್ರಹಿಸಲಾಗುತ್ತಿದೆ.