ಅರಮನೆ ಮೈದಾನದಲ್ಲಿ ‘ಜೆನ್ ಝೀ’ ತಲೆಮಾರು: ‘ವಿಂಟೇಜ್’ ವಾಹನಗಳ ಮುಖಾಮುಖಿ

ಬೆಂಗಳೂರು, ನ.14: ಇವತ್ತಿನ ‘ಜೆನ್ ಝೀ’ ತಲೆಮಾರಿನ ಕಾಲಘಟ್ಟದ ನಡುವೆ ಶತಮಾನಗಳಷ್ಟು ಹಳೆಯದಾದ ‘ವಿಂಟೇಜ್’ ವಾಹನಗಳ ಶ್ರೀಮಂತ ಪರಂಪರೆಯನ್ನು ಪರಿಚಯಿಸುವ ನಿಟ್ಟಿನಲ್ಲಿ ರಾಜಧಾನಿ ಬೆಂಗಳೂರಿನ ಅರಮನೆ ಮೈದಾನದಲ್ಲಿ ಗತಕಾಲದ ಅಪರೂಪದ ಕಾರು-ಬೈಕುಗಳ ಜಗತ್ತು ಅನಾವರಣಗೊಂಡಿದೆ.

ನಗರದ ಅರಮನೆ ಮೈದಾನದ ತ್ರಿಪುರವಾಸಿನ ಗೇಟ್‌ನಲ್ಲಿ ‘ಟ್ರೈಯೂನ್ ಎಕ್ಸಿಬಿಟರ್ಸ್’ ವತಿಯಿಂದ ನ.14ರಿಂದ 16ರವರೆಗೆ ಮೂರು ದಿನಗಳ ಕಾಲ ವಿಂಟೇಜ್ ವಾಹನಗಳ ಪ್ರದರ್ಶನ ನಡೆಯುತ್ತಿದ್ದು, ಹಳೆಯ ಕಾಲದ ಜೊತೆಗಿನ ಅದ್ಭುತ ಪಯಣವನ್ನು ಸಿಲಿಕಾನ್ ಸಿಟಿಯ ಜನರ ಮುಂದೆ ತಂದು ನಿಲ್ಲಿಸಲಾಗಿದೆ.

‘ಪಯಣ’ದೊಂದಿಗಿನ ಪಯಣ ಅದ್ಬುತ..! :

ಈ ಪ್ರದರ್ಶನದಲ್ಲಿ ಮೈಸೂರಿನ ‘ಪಯಣ’ ವಸ್ತು ಸಂಗ್ರಹಾಲಯವು ಈಗಲೂ ಸುಸ್ಥಿಯಲ್ಲಿರುವ ಶತಮಾನಕ್ಕೂ ಹಳೆಯ ಕಾರುಗಳ ವೈವಿಧ್ಯಮಯ ಲೋಕವನ್ನು ಸಾರ್ವಜನಿಕರ ವೀಕ್ಷಣೆಗೆ ತೆರೆದಿಟ್ಟಿದೆ. ಸಾಮಾನ್ಯವಾಗಿ ದೇವಾಲಯ, ಸ್ಮಾರಕ, ಹಸ್ತಪ್ರತಿಗಳಲ್ಲಿ ಮೂಡಿಬರುವ ನಮ್ಮ ಪರಂಪರೆ ಇಲ್ಲಿನ ವಸ್ತುಸಂಗ್ರಹಾಲಯದಲ್ಲಿ ಅಭಿವ್ಯಕ್ತಿಯಾಗುವ ಮೂಲಕ ಎಲ್ಲರ ಗಮನ ಸೆಳೆಯುತ್ತಿದೆ.

ಇಲ್ಲಿ ಪ್ರದರ್ಶನಕ್ಕಿರುವ ಪ್ರತಿಯೊಂದು ಕಾರುಗಳೂ ಸಹ ಉತ್ತಮವಾಗಿ ಸಂರಕ್ಷಿಸಲ್ಪಟ್ಟಿವೆ. ಕೇವಲ ಕಾರುಗಳ ಇತಿಹಾಸ ಮಾತ್ರವಲ್ಲದೆ ನಾವೀನ್ಯತೆ, ಕರಕುಶಲತೆ ಮತ್ತು ಸೌಂದರ್ಯದ ನಿರಂತರ ಅನ್ವೇಷಣೆಯನ್ನು ತೆರೆದಿಟ್ಟಿದೆ. ವಾಹನ ವಿನ್ಯಾಸದ ವಿಕಾಸ ಮತ್ತು ಉದ್ಯಮವನ್ನು ರೂಪಿಸಿದ ಪ್ರಮುಖ ಕ್ಷಣಗಳನ್ನು ನೋಡಿ ಅರ್ಥಮಾಡಿಕೊಳ್ಳಬಹುದಾಗಿದೆ. ಸುಮಾರು ಹತ್ತು ಗತಕಾಲದ ಅಪರೂಪದ ಕಾರುಗಳನ್ನು ಇಲ್ಲಿನ ಪ್ರದರ್ಶನಕ್ಕೆ ಇಡಲಾಗಿದೆ. ನಮ್ಮ ಮ್ಯೂಸಿಯಂ ಸಂಗ್ರಹಕ್ಕಿಂತ ಹೆಚ್ಚಾಗಿ ಶೈಕ್ಷಣಿಕ ಪ್ರವಾಸದಂತೆ ಗೋಚರಿಸುತ್ತದೆ. ಇಲ್ಲಿನ ಪ್ರತಿಯೊಂದು ಕಾರು ಒಂದು ಕಥೆಯನ್ನು ಹೇಳುತ್ತದೆ ಎನ್ನುತ್ತಾರೆ ಪಯಣ ವಸ್ತು ಸಂಗ್ರಹಾಲಯ ವ್ಯವಸ್ಥಾಪಕರು.

ಗಮನ ಸೆಳೆದ ‘ಕ್ಲಬ್ ಕ್ಯಾಂರ್ಸ್‌ :

ಪ್ರದರ್ಶನದಲ್ಲಿ ಕ್ಲಬ್ ಕ್ಯಾಂರ್ಸ್‌ ವಾಹನ ಹೆಚ್ಚು ವೀಕ್ಷಕರ ಗಮನ ಸೆಳೆಯಿತು. ಇದು ಭಾರತದಲ್ಲಿ ಆಧುನಿಕ ಕಾರವಾನ್ ಜೀವನ ಶೈಲಿಗೆ ಹೇಳಿ ಮಾಡಿಸಿದಂತಿರುವ ಕ್ಲಬ್ ಕ್ಯಾಂರ್ಸ್‌ ವಾಹನವಾಗಿದ್ದು, ಪ್ರಯಾಣದಲ್ಲಿ ಹೆಚ್ಚಿನ ಸಾಹಸ ಬಯಸುವವರಿಗೆಂದೇ ವಿನ್ಯಾಸಗೊಳಿಸಲಾಗಿದೆ. ಬೆಟ್ಟಗಳನ್ನು ಅನ್ವೇಷಿಸುವವರಿಗೆ, ಹಿನ್ನೀರಿನಲ್ಲಿ ಸವಾರಿ ಮಾಡುವವರಿಗೆ ಈ ವಾಹನ ಹೆಚ್ಚಿನ ಅನುಕೂಲವಾಗಿದೆ. ಈ ವಾಹನದಲ್ಲಿ ಅಡುಗೆಮನೆ, ಶೌಚಾಲಯ, ಮಲಗುವ ರೂಮ್‌ಗಳು, ಕ್ಯಾಬಿನ್, ಟಿವಿ, ರೇಡಿಯೋ ಸೇರಿದಂತೆ ಹಲವು ವ್ಯವಸ್ಥೆಗಳಿದ್ದು, ಸವಾರರಿಗೆ ಲಕ್ಸುರಿ ಮನೆಯಂಥಹ ಭಾವನೆ ಮೂಡುವಂತೆ ವಿನ್ಯಾಸ ಮಾಡಲಾಗಿದೆ.

ಸಾವಿಗೂ ಸವಾಲೆಸೆಯುವ ಬೈಕ್ ರೈಡಿಂಗ್ :

ಸಾವಿಗೂ ಸವಾಲೆಸೆಯುವ ಸಾಹಸಮಯ ಬೈಕ್ ರೈಡಿಂಗ್ ಪ್ರದರ್ಶನ ನೋಡುಗರನ್ನು ಹೆಚ್ಚು ಆಕರ್ಷಿಸಿತು. 20 ವರ್ಷಗಳ ಅನುಭವ-ಜಾಣ್ಮೆ-ಉಕ್ಕಿನ ಹೃದಯದ ಕಲಿಗಳಿಂದ ನಡೆದ ಈ ಸಾಹಸ ಪ್ರದರ್ಶನವು ಯುವಜನತೆಯನ್ನು ಮನಸೂರೆಗೊಳಿಸಿತು.