ವಿಶ್ವಕಪ್: ಬಾಂಗ್ಲಾ ವಿರುದ್ಧ 229 ಕ್ಕೆ ಆಲೌಟ್ ಆದ ನೆದರ್ಲ್ಯಾಂಡ್ಸ್

ಕಲ್ಕತ್ತಾ: ಇಲ್ಲಿನ ಈಡನ್ ಗಾರ್ಡನ್ ಅಂತರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಐಸಿಸಿ ಏಕದಿನ ವಿಶ್ವಕಪ್ ಕ್ರಿಕೆಟ್ ಟೂರ್ನಿಯಲ್ಲಿ ನೆದರ್ಲ್ಯಾಂಡ್ಸ್ ತಂಡ ಬಾಂಗ್ಲಾದೇಶ ಗೆಲುವಿಗೆ 230 ರನ್ ಗುರಿ ನೀಡಿದೆ.

ಪಂದ್ಯದಲ್ಲಿ ಟಾಸ್ ಗೆದ್ದ ನೆದರ್ಲ್ಯಾಂಡ್ಸ್ ತಂಡ ಬ್ಯಾಟಿಂಗ್ ಆಯ್ದುಕೊಂಡಿತು. ಇತ್ತ ಬ್ಯಾಟಿಂಗ್ ಇಳಿದ ಡಚ್ ತಂಡಕ್ಕೆ ಉತ್ತಮ ಆರಂಭ ದೊರಯಲಿಲ್ಲ. ಕೇವಲ 4 ರನ್ ಗಳಿಸುವಾಗಲೇ ತಂಡದ ಇಬ್ಬರು ಆರಂಭಿಕರು ಪೆವಿಲಿಯನ್ ಸೇರಿದ್ದರು. ವಿಕ್ರಮಜಿತ್ ಸಿಂಗ್ 3 ರನ್ ಗಳಿಸಿದರೆ ಮಾಕ್ಸ್ ಒ’ಡೌಡ್ ಶೂನ್ಯಕ್ಕೆ ಶರೀಫುಲ್ ಇಸ್ಲಾಂ ಬೌಲಿಂಗ್ ನಲ್ಲಿ ವಿಕೆಟ್ ಒಪ್ಪಿಸಿದರು. ವೆಸ್ಲಿ ಬ್ಯಾರಸಿ 41 ರನ್ ಬಾರಿಸಿ ಬಾಂಗ್ಲಾ ಬೌಲಿಂಗ್ ಎದುರಿಸುವ ಪ್ರಯತ್ನ ಮಾಡಿದರಾದರೂ ಅವರು ಹೆಚ್ಚು ಸಮಯ ಮುಂದುಯವರಿಸಲಾಗಳಿಲ್ಲ. ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಬಂದ ಕಾಲಿನ್ ಅಕೆರ್ಮಾನ್ ಕೇವಲ 15 ರನ್ ಬಾರಿಸಿ ಮತ್ತೊಮ್ಮೆ ನಿರಾಸೆ ಮೂಡಿಸಿದರು. ತಂಡ ಅಲ್ಪ ಮೊತ್ತ ಕ್ಕೆ ಕುಸಿಯುದನ್ನು ತಪ್ಪಿಸುವಲ್ಲಿ ಜವಾಬ್ದಾರಿಯುತ ಜೊತೆಯಾಟ ನಿರ್ವಹಿಸಿದ ಸ್ಕಾಟ್ ಎಡ್ವಡ್ಸ್ ಹಾಗೂ ಸೈಬ್ರಾಂಡ್ ಜೋಡಿ 78 ರನ್ ಜೊತೆಯಾಟ ನೀಡಿದರು. ನಾಯಕ ಸ್ಕಾಟ್ ಎಡ್ವಡ್ಸ್ 6 ಬೌಂಡರಿ ಸಹಿತ 68 ರನ್ ಗಳಿಸಿ ತಂಡದ ಪರ ಏಕೈಕ ಅರ್ಧಶತಕ ಸಿಡಿಸಿದರೆ. ಸೈಬ್ರಾಂಡ್ 35 ರನ್ ಗಳಿಸಿ ಮಹದಿ ಹಸನ್ ಬೌಲಿಂಗ್ ನಲ್ಲಿ ಎಲ್ ಬಿ ಡಬ್ಲೂ ಆದರು. ಕಡೇ ಗಳಿಗೆಯಲ್ಲಿ ಸ್ಟೋಟಕ ಬ್ಯಾಟ್ ಬೀಸಿದ ವಾನ್ ಬೀಕ್ 23 ರನ್ ಬಾರಿಸಿ ತಂಡದ ಮೊತ್ತ ಇನ್ನೂರರ ಗಡಿ ದಾಟುವಂತೆ ಮಾಡಿದರು. ಬಾಸ್ ಡೆ ಲೀಡೆ 17, ಶರಿಝ್ ಅಹ್ಮದ್ 6, ಆರ್ಯನ್ ದತ್ 9 ರನ್ ಗಳಿಸಿದರು.

ಬಾಂಗ್ಲಾದೇಶ ಪರ ಮುಸ್ತಫಿಝುರ್ ರಹ್ಮಾನ್, ಶರೀಫುಲ್ ಇಸ್ಲಾಂ, ತಸ್ಕಿನ್ ಅಹ್ಮದ್, ಹಾಗೂ ಮಹೆದಿ ತಲಾ 2 ವಿಕೆಟ್ ಪಡೆದುಕೊಂಡರೆ ನಾಯಕ ಶಾಕಿಬ್ ಒಂದು ವಿಕೆಟ್ ಪಡೆದುಕೊಂಡರು.