ಕನಿಷ್ಟ ಕೂಲಿ ಸಮರ್ಪಕವಾಗಿ ಜಾರಿಗೆ ಆಗ್ರಹಿಸಿ ಸಿಐಟಿಯುನಿಂದ ಕಾರ್ಕಳ ಶಾಸಕರಿಗೆ ಮನವಿ

ಕಾರ್ಕಳ, ಸೆ.30: ಕರ್ನಾಟಕ ಸರಕಾರ ತಡೆ ಹಿಡಿದ ಕನಿಷ್ಟ ಕೂಲಿಯನ್ನು ಕೂಡಲೇ ಸಮರ್ಪಕವಾಗಿ ಜಾರಿ ಸಹಿತ ಹಲವು ಪ್ರಮುಖ ಬೇಡಿಕೆಗಳನ್ನು ಈಡೇರಿಸುವಂತೆ ಒತ್ತಾಯಿಸಿ ಸಿಐಟಿಯು ಕಾರ್ಕಳ ವಲಯ ಸಂಚಾಲನಾ ಸಮಿತಿಯ ವತಿಯಿಂದ ಬುಧವಾರ ಕಾರ್ಕಳ ಶಾಸಕ ಸುನೀಲ್ ಕುಮಾರ್ ಅವರ ಅಪ್ತ ಕಾರ್ಯದರ್ಶಿ ಪ್ರಮೀತ್ ಮೂಲಕ ಮನವಿ ನೀಡಿ ವಿಧಾನಸಭೆಯಲ್ಲಿ ಚರ್ಚಿಸಲು ಒತ್ತಾಯಿಸಲಾಯಿತು.

ಕೇಂದ್ರ ಬಿಜೆಪಿ ನೇತೃತ್ವದಲ್ಲಿ ಸರಕಾರವು ಜಾರಿಗೊಳಿಸಿರುವ ನಾಲ್ಕು ಕಾರ್ಮಿಕ ಸಂಹಿತೆಗಳಿಗೆ ರಾಜ್ಯ ಸರಕಾರ ಅಗತ್ಯ ಇರುವ ತಿದ್ದುಪಡಿ ತಂದ ನಂತರ ರಾಜ್ಯದಲ್ಲಿ ನಿಯಮಾವಳಿಗಳನ್ನು ರೂಪಿಸಬೇಕು. ಪರಿಷ್ಕೃತ ಕನಿಷ್ಟ ವೇತನ ತಡೆ ಹಿಡಿದು, ಸಮಿತಿ ರಚನೆ ಮಾಡಿರುವುದನ್ನು ಖಂಡಿಸಿ, ಕೂಡಲೇ ಕನಿಷ್ಠ ವೇತನ ಜಾರಿ ಮಾಡಬೇಕು. ಪ್ಲಾಂಟೇಷನ್, ಬೀಡಿ, ಗಾರ್ಮೆಂಟ್ಸ್, ಹಮಾಲಿ ಕಾರ್ಮಿಕರನ್ನು ಹೊಸ ಕನಿಷ್ಠ ವೇತನ ಅಧಿಸೂಚನೆಯಲ್ಲಿ ಸೇರಿಸಬೇಕು.

ಅಸಂಘಟಿತ ಕಾರ್ಮಿಕರಿಗೆ ಸಾಮಾಜಿಕ ಭದ್ರತೆ ಒದಗಿಸಬೇಕು. ಸ್ಕೀಂ ನೌಕರರ ಖಾಯಂಮಾತಿ ಮತ್ತು ಕನಿಷ್ಟ ವೇತನ ವ್ಯಾಪ್ತಿಗೆ ತರಬೇಕು. ಅಲ್ಲಿಯ ವರೆಗೆ ರಾಜ್ಯದಲ್ಲಿ ಕಾಂಗ್ರೆಸ್ ಸರಕಾರ ಅಧಿಕಾರಿಕ್ಕೆ ಬರುವಾಗ ಕೊಟ್ಟಿರುವ ಅಶ್ವಾಸನೆಯಂತೆ ಬಿಸಿಯೂಟದವರಿಗೆ 7 ಸಾವಿರ ರೂ., ಆಶಾ ಕಾರ್ಯ ಕರ್ತರಿಗೆ 10 ಸಾವಿರ ರೂ., ಅಂಗನವಾಡಿ ನೌಕರರಿಗೆ 15 ಸಾವಿರ ರೂ. ಬಾಕಿ ನೀಡಬೇಕು. ಗುತ್ತಿಗೆ, ಹೊರ ಗುತ್ತಿಗೆ ಪದ್ದತಿ ರದ್ದು ಮಾಡಬೇಕು ಹಾಗೂ ಖಾಯಂಗೊಳಿಲು ಅಗತ್ಯವಾದ ಕನ್ಫಮೆಂಟ್ ಸ್ಟೇಟಸ್ ಕಾಯಿದೆ ಜಾರಿಗೆ ತರಬೇಕು. ಸರಕಾರದಡಿ ದುಡಿಯುವ ನೌಕರರಿಗೆ ಕೆಸಿಎಸ್‌ಆರ್ ರೂಲ್ಸ್‌ಗೆ ತಿದ್ದುಪಡಿ ಮಾಡಬೇಕು.

ಇಎಸ್‌ಐ, ಪಿಎಫ್, ಗ್ರಾಚ್ಯುಟಿ, ಬೋನಸ್ ಸೌಲಭ್ಯಗಳನ್ನು ಪಡೆಯಲು ಇರುವ ಮಿತಿಗಳನ್ನು ರದ್ದುಗೊಳಿಸಬೇಕು. ರೈತರ ಭೂಸ್ವಾಧೀನ ಪ್ರಕ್ರಿಯೆ ಕೈಬಿಡಬೇಕು ಮತ್ತು ರೈತ ಕೃಷಿ ಉತ್ಪನ್ನಗಳಿಗೆ ಯೋಗ್ಯ ಬೆಂಬಲ ಬೆಲೆ ನಿಗದಿಪಡಿ ಸಬೇಕು. ಆಹಾರ, ಆರೋಗ್ಯ, ಶಿಕ್ಷಣದ ಸೇವೆಗಳ ಗುಣಮಟ್ಟ ಹೆಚ್ಚಿಸಿ ಮತ್ತು ಈ ಸೇವೆಗಳ ಖಾಸಗೀಕರಣ ನಿಲ್ಲಿ ಬೇಕು. ವಿದ್ಯುತ್, ಸಾರಿಗೆ ಸಂಸ್ಥೆಗಳನ್ನೊಳಗೊಂಡು ಯಾವುದೇ ಸಾರ್ವಜನಿಕ ಕೈಗಾರಿಕೆಗಳ ಖಾಸಗೀಕರಣ ಮಾಡಬಾರದು. ವಸತಿ ರಹಿತ ಕಾರ್ಮಿಕರಿಗೆ ವಸತಿ ನೀಡಬೇಕು. ಬಿಪಿಎಲ್ ಕಾರ್ಡ್ ಪಡೆಯಲು ಆದಾಯ ಮಿತಿಯನ್ನು ಹೆಚ್ಚಿಸಬೇಕು ಎಂದು ಮನವಿಯಲ್ಲಿ ಒತ್ತಾಯಿಸಲಾಗಿದೆ.

ನಿಯೋಗದಲ್ಲಿ ಸಿಐಟಿಯು ಕಾರ್ಕಳ ತಾಲೂಕು ಸಂಚಾಲಕ ಸುನೀತಾ ಶೆಟ್ಟಿ, ಸಹಸಂಚಾಲಕರಾದ ಶೇಖರ್ ಕುಲಾಲ್, ಲೆಮಿನಾ ಫೌಂಢ್ರೀಸ್ ನಿಟ್ಟೆ ಯೂನಿಯನ್ ಅಧ್ಯಕ್ಷ ಮೋಹನ್‌ಚಂದ್ರ, ಪ್ರಧಾನ ಕಾರ್ಯದರ್ಶಿ ನಾಗೇಶ್, ಮುಖಂಡರಾದ ಸುಧಾಕರ್, ರವಿ ಕುಂಟಾಡಿ, ಕಾರ್ಕಳ ತಾಲೂಕು ಕಟ್ಟಡ ಸಂಘದ ಮುಖಂಡರಾದ ನಾಗೇಶ್, ಪುಷ್ಪ, ಹರೀಶ್ ಮಾಂಟ್ರಡಿ, ಸಂದೇಶ್ ಆಚಾರ್ಯ, ಕಾರ್ಕಳ ತಾಲೂಕು ಬೀಡಿ ಕಾರ್ಮಿಕರ ಸಂಘದ ಮುಖಂಡರಾದ ಸುಮತಿ, ಶ್ರೀಮತಿ, ಶಕುಂತಲಾ, ಜಯಂತಿ, ಪುಷ್ಪವತಿ, ಜಾನವಿ ಉಪಸ್ಥಿತರಿದ್ದರು.