ಉಡುಪಿ ಜಿಲ್ಲೆಯಲ್ಲಿ 131 ಮತಗಟ್ಟೆಗಳ ಹೆಚ್ಚಳ; 1243ಕ್ಕೆ ಏರಿಕೆ

ಉಡುಪಿ, ಆ.6: ಉಡುಪಿ ಜಿಲ್ಲೆಯಲ್ಲಿರುವ ಮತಗಟ್ಟೆಗಳನ್ನು ಸಂಖ್ಯೆಯನ್ನು ಹೆಚ್ಚಿಸಲು ನಿರ್ಧರಿಸಲಾಗಿದೆ. ಜಿಲ್ಲೆಯ ಐದು ವಿಧಾನಸಭಾ ಕ್ಷೇತ್ರಗಳಲ್ಲಿ ಒಟ್ಟು 131 ಮತಗಟ್ಟೆಗಳ ಹೆಚ್ಚಳವಾಗಲಿದ್ದು, ಇದರಿಂದ ಜಿಲ್ಲೆಯಲ್ಲಿರುವ ಮತ ಗಟ್ಟೆಗಳ ಸಂಖ್ಯೆ 1112ರಿಂದ 1243ಕ್ಕೇರಲಿದೆ ಎಂದು ಜಿಲ್ಲಾಧಿಕಾರಿ ತಿಳಿಸಿದರು.

ಮಣಿಪಾಲದ ಜಿಲ್ಲಾಧಿಕಾರಿ ಕಚೇರಿ ಸಭಾಂಗಣದಲ್ಲಿ ಬುಧವಾರ ಎಸ್‌ಐಆರ್‌ಗೆ ಸಂಬಂಧಿಸಿದಂತೆ ಮಾಹಿತಿ ಹಂಚಿಕೊಳ್ಳಲು ಕರೆಯಲಾದ ಮಾನ್ಯತೆ ಪಡೆದ ವಿವಿಧ ರಾಜಕೀಯ ಪಕ್ಷಗಳ ಪ್ರತಿನಿಧಿಗಳ ಸಭೆಯಲ್ಲಿ ಅವರು ಈ ವಿಷಯವನ್ನು ಪ್ರಕಟಿಸಿದರು.

ಜಿಲ್ಲೆಯ ಐದು ವಿಧಾನಸಭಾ ಕ್ಷೇತ್ರಗಳಲ್ಲಿ 1,200ಕ್ಕಿಂತ ಹೆಚ್ಚು ಮತದಾರರನ್ನು ಹೊಂದಿರುವ ಮತಗಟ್ಟೆಗಳನ್ನು ಗುರುತಿಸಿ, ನೂತನ ಮತಗಟ್ಟೆಗಳ ಸ್ಥಾಪನೆ ಹಾಗೂ ಮತಗಟ್ಟೆಗಳ ಪುನರ್ವಿಂಗಡಣೆಯ ಕರಡು ಪ್ರಸ್ತಾವದ ಕುರಿತು ಅವರು ಚರ್ಚಿಸಿದರು.

ಜಿಲ್ಲೆಯಲ್ಲಿ ಒಟ್ಟು 131 ಮತಗಟ್ಟೆಗಳನ್ನು ವಿಧಾನಸಭಾ ಕ್ಷೇತ್ರವಾರು ಹೆಚ್ಚುವರಿಯಾಗಿ ಸ್ಥಾಪಿಸಲು ಚುನಾವಣಾ ಆಯೋಗಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗುವುದು ಎಂದು ಅವರು ತಿಳಿಸಿದ್ದು, ಇದಕ್ಕೆ ಸಭೆಯಲ್ಲಿದ್ದ ಎಲ್ಲಾ ರಾಜಕೀಯ ಪಕ್ಷಗಳ ಪ್ರತಿನಿಧಿಗಳು ತಮ್ಮ ಒಪ್ಪಿಗೆಯನ್ನು ಸೂಚಿಸಿದರು.

ವಿಧಾನಸಭಾ ಕ್ಷೇತ್ರವಾರು ಹೆಚ್ಚಳವಾಗುವ ಮತಗಟ್ಟೆಗಳ ವಿವರ ಹೀಗಿದೆ.

ಬೈಂದೂರು: 246 (ಈಗಿರುವ ಮತಗಟ್ಟೆ), 48 (ಹೊಸ ಮತಗಟ್ಟೆಗಳ ಸೇರ್ಪಡೆ) ಒಟ್ಟು 294. ಕುಂದಾಪುರ: 222 (ಈಗಿರುವ ಮತಗಟ್ಟೆ), 16 (ಹೊಸ ಮತಗಟ್ಟೆಗಳ ಸೇರ್ಪಡೆ) ಒಟ್ಟು 238. ಉಡುಪಿ: 226 (ಈಗಿರುವ ಮತಗಟ್ಟೆ), 20 (ಹೊಸ ಮತಗಟ್ಟೆಗಳ ಸೇರ್ಪಡೆ) ಒಟ್ಟು 246. ಕಾಪು: 209 (ಈಗಿರುವ ಮತಗಟ್ಟೆ), 22 (ಹೊಸ ಮತಗಟ್ಟೆಗಳ ಸೇರ್ಪಡೆ) ಒಟ್ಟು 231. ಕಾರ್ಕಳ: 209 (ಈಗಿರುವ ಮತಗಟ್ಟೆ), 25 (ಹೊಸ ಮತಗಟ್ಟೆಗಳ ಸೇರ್ಪಡೆ) ಒಟ್ಟು 234. ಜಿಲ್ಲೆಯಲ್ಲಿ ಒಟ್ಟು: 1112 (ಈಗಿರುವ ಮತಗಟ್ಟೆ), 131 (ಹೊಸ ಮತಗಟ್ಟೆಗಳ ಸೇರ್ಪಡೆ) ಒಟ್ಟು 1243.