ಡೆಂಗ್ಯು ಜ್ವರ: ಆರಂಭಿಕ ಚಿಹ್ನೆಗಳು ಮತ್ತು ಎಚ್ಚರಿಕೆ ಚಿಹ್ನೆಗಳ ನಡುವೆ ವ್ಯತ್ಯಾಸವೇನು?

ತೀವ್ರ ಜ್ವರ, ದೇಹದ ನೋವು, ತಲೆನೋವು, ದೌರ್ಬಲ್ಯ, ಕಣ್ಣುಗಳ ಹಿಂದೆ ನೋವು, ವಾಕರಿಕೆ ಮತ್ತು ಚರ್ಮದ ದದ್ದುಗಳು ಮೊದಲ ಕೆಲವು ದಿನಗಳಲ್ಲಿ ಸಾಮಾನ್ಯವಾಗಿ ವರದಿಯಾಗುತ್ತವೆ.

ಸೋಂಕಿತ ಈಡಿಸ್ ಸೊಳ್ಳೆಗಳ ಕಡಿತದ ಮೂಲಕ ಹರಡುವ ಡೆಂಗ್ಯು ಜ್ವರವು ಮಳೆಗಾಲ ಮತ್ತು ಮಳೆಗಾಲದ ನಂತರದ ಅವಧಿಯಲ್ಲಿ ಕಂಡುಬರುವ ಸೊಳ್ಳೆಗಳಿಂದ ಹರಡುವ ಸಾಮಾನ್ಯ ಕಾಯಿಲೆ. ಈ ರೋಗ ಸಾಮಾನ್ಯವಾಗಿ ವೈರಲ್ ಸೋಂಕಿನಂತೆಯೇ ಇರುವ ಲಕ್ಷಣಗಳೊಂದಿಗೆ ಪ್ರಾರಂಭವಾಗುತ್ತದೆ.

ತೀವ್ರ ಜ್ವರ, ದೇಹದ ನೋವು, ತಲೆನೋವು, ದೌರ್ಬಲ್ಯ, ಕಣ್ಣುಗಳ ಹಿಂದೆ ನೋವು, ವಾಕರಿಕೆ ಮತ್ತು ಚರ್ಮದ ದದ್ದುಗಳು ಮೊದಲ ಕೆಲವು ದಿನಗಳಲ್ಲಿ ಸಾಮಾನ್ಯವಾಗಿ ವರದಿಯಾಗುತ್ತವೆ. ಈ ರೋಗ ಲಕ್ಷಣಗಳು ಬಹುತೇಕ ಸೀಸನಲ್ ಸೋಂಕುಗಳಿಗೆ ಹೋಲುವ ಕಾರಣ ಆರಂಭಿಕ ಹಂತದಲ್ಲಿ ಜನರು ನಿರ್ಲಕ್ಷ್ಯ ಮಾಡುತ್ತಾರೆ.

ಗುರುಗ್ರಾಮ್‌ನ ಫೋರ್ಟಿಸ್ ಮೆಮೋರಿಯಲ್ ರೀಸರ್ಚ್ ಇನ್‌ಸ್ಟಿಟ್ಯೂಟ್‌ನ ಹಿರಿಯ ಸಲಹೆಗಾರರಾದ ಡಾ. ನೇಹಾ ರಸ್ತೋಗಿ ಅವರ ಪ್ರಕಾರ, ಬಹುತೇಕ ಡೆಂಗ್ಯು ರೋಗಿಗಳು ಸರಿಯಾದ ವಿಶ್ರಾಂತಿ, ಹೈಡ್ರೇಶನ್ ಮತ್ತು ಸಕಾಲಿಕ ವೈದ್ಯಕೀಯ ಆರೈಕೆಯೊಂದಿಗೆ ಚೆನ್ನಾಗಿ ಚೇತರಿಸಿಕೊಳ್ಳುತ್ತಾರೆ. ಎಚ್ಚರಿಕೆ ಚಿಹ್ನೆಗಳನ್ನು ನಿರ್ಲಕ್ಷಿಸಿದರೆ ಅಪಾಯಕಾರಿಯಾಗಿ ಪರಿಣಮಿಸಬಹುದು. ಡೆಂಗ್ಯು ಇದ್ದಾಗ ಜ್ವರ ಸುಧಾರಿಸುತ್ತದೆ ಎಂದಾದಾಗ ಸ್ಥಿತಿ ಇನ್ನಷ್ಟು ಹದಗೆಡಬಹುದು. ಸಾಮಾನ್ಯವಾಗಿ ಜ್ವರ ಬಂದ ನಾಲ್ಕನೇ ಮತ್ತು ಏಳನೇ ದಿನದ ನಡುವೆ ರೋಗಿಗಳು ಗಂಭೀರ ಸ್ಥಿತಿಗೆ ಪ್ರವೇಶಿಸಬಹುದು.

ಡೆಂಗ್ಯುವಿನ ಆರಂಭಿಕ ಚಿಹ್ನೆಗಳು

ಡೆಂಗ್ಯು ಮುಖ್ಯವಾಗಿ ಜ್ವರ ರೀತಿಯ ರೋಗ ಲಕ್ಷಣವನ್ನೇ ಹೊಂದಿರುತ್ತದೆ. ಹಠಾತ್ ಜ್ವರ ಸಾಮಾನ್ಯವಾಗಿ ಮೊದಲ ಲಕ್ಷಣವಾಗಿದೆ. ತೀವ್ರವಾದ ದೇಹದ ನೋವು, ಕೀಲು ನೋವು, ತಲೆನೋವು ಮತ್ತು ಕಣ್ಣುಗಳ ಹಿಂದೆ ನೋವು ಕಾಣಿಸಬಹುದು. ಕೆಲವು ಮಂದಿ ವಾಕರಿಕೆ, ವಾಂತಿ, ಆಯಾಸ ಅಥವಾ ಸೌಮ್ಯವಾದ ಚರ್ಮದ ದದ್ದುಗಳನ್ನು ಸಹ ಅನುಭವಿಸಬಹುದು.

ಈ ರೋಗ ಲಕ್ಷಣಗಳು ರೋಗಿಗಳಿಗೆ ತೀವ್ರ ಅನನುಕೂಲತೆ ಉಂಟು ಮಾಡಬಹುದು. ಆದರೆ ಅವುಗಳನ್ನು ಸಾಮಾನ್ಯವಾಗಿ ಮನೆಯಲ್ಲಿ ವೈದ್ಯಕೀಯ ಸಲಹೆ, ಸಾಕಷ್ಟು ದ್ರವಾಹಾರ ಸೇವನೆ ಮತ್ತು ಸರಿಯಾದ ವಿಶ್ರಾಂತಿಯೊಂದಿಗೆ ಸರಿಪಡಿಸಬಹುದು. ವೈದ್ಯರು ಸಾಮಾನ್ಯವಾಗಿ ಹೈಡ್ರೇಟೆಡ್ ಆಗಿರಲು, ದೇಹದ ಉಷ್ಣತೆಯನ್ನು ಮೇಲ್ವಿಚಾರಣೆ ಮಾಡಲು ಮತ್ತು ಸ್ವಯಂ-ಔಷಧಿ ಸೇವನೆ ಮಾಡಬಾರದು ಎಂದು ಶಿಫಾರಸು ಮಾಡಿದ್ದಾರೆ. ಮುಖ್ಯವಾಗಿ ರಕ್ತಸ್ರಾವದ ಅಪಾಯ ಹೆಚ್ಚಿಸುವ ನೋವು ನಿವಾರಕಗಳನ್ನು ಬಳಸಬಾರದು.

ಡೆಂಗ್ಯು ಗಂಭೀರ ಹಂತಕ್ಕೆ ಪ್ರವೇಶಿಸುವುದು ಯಾವಾಗ?

ಜ್ವರ ಕಡಿಮೆಯಾಗಿದೆ ಎಂದರೆ ಚೇತರಿಸಿಕೊಳ್ಳಲಾಗಿದೆ ಎನ್ನುವುದು ಡೆಂಗ್ಯು ಬಗ್ಗೆ ಇರುವ ದೊಡ್ಡ ತಪ್ಪುಕಲ್ಪನೆ. ಜ್ವರ ಕಡಿಮೆಯಾಗುತ್ತಲೇ ವೈದ್ಯರು ಹೆಚ್ಚು ಜಾಗರೂಕರಾಗುತ್ತಾರೆ. ಈ ಸ್ಥಿತಿ ರೋಗದ ನಾಲ್ಕನೇ ಮತ್ತು ಏಳನೇ ದಿನದಂದು ಬೆಳೆಯುತ್ತದೆ. ಈ ಸಮಯದಲ್ಲಿ ರಕ್ತನಾಳಗಳು ದ್ರವವನ್ನು ಸೋರಿಕೆ ಮಾಡಲು ಪ್ರಾರಂಭಿಸಬಹುದು. ಅದರಿಂದ ರಕ್ತದೊತ್ತಡ ಮತ್ತು ಅಂಗಗಳ ಕಾರ್ಯನಿರ್ವಹಣೆಯ ಮೇಲೆ ಪರಿಣಾಮವಾಗಬಹುದು.

ಪ್ಲೇಟ್ಲೆಟ್‌ಗಳ ಎಣಿಕೆ ಕಡಿಮೆಯಾದ ತಕ್ಷಣ ರೋಗಿ ತೀವ್ರವಾಗಿ ಅಸ್ವಸ್ಥನಾಗದೆ ಇದ್ದರೂ, ಹದಗೆಡುತ್ತಿರುವ ರೋಗ ಲಕ್ಷಣಗಳೊಂದಿಗೆ ಹಠಾತ್ ಪ್ಲೇಟ್ಲೆಟ್‌ಗಳ ಕುಸಿತ ತೀವ್ರ ಡೆಂಗ್ಯು ರೋಗಕ್ಕೆ ಕಾರಣವಾಗಬಹುದು. ಈ ಸ್ಥಿತಿಯಲ್ಲಿ ಪ್ಲೇಟ್ಲೆಟ್ ಮಟ್ಟ, ಹೈಡ್ರೇಶನ್ ಸ್ಥಿತಿ, ಮೂತ್ರ ವಿಸರ್ಜನೆ ಮತ್ತು ಒಟ್ಟು ವೈದ್ಯಕೀಯ ಸ್ಥಿತಿಯನ್ನು ಎಚ್ಚರಿಕೆಯಿಂದ ಮೇಲ್ವಿಚಾರಣೆ ಮಾಡುವ ಅಗತ್ಯವಿರುತ್ತದೆ.

ಅಲಕ್ಷಿಸಬಾರದ ಎಚ್ಚರಿಕೆ ಸೂಚನೆಗಳು ಯಾವುವು?

ಕೆಲವು ರೋಗ ಲಕ್ಷಣಗಳಿಗೆ ತಕ್ಷಣದ ವೈದ್ಯಕೀಯ ಆರೈಕೆ ಅಗತ್ಯವಿರುತ್ತದೆ. ನಿರಂತರ ವಾಂತಿ ಅನಾರೋಗ್ಯ ಮುಂದುವರಿಯುವ ಎಚ್ಚರಿಕೆ ಚಿಹ್ನೆಯಾಗಿದೆ. ತೀವ್ರವಾದ ಹೊಟ್ಟೆ ನೋವನ್ನು ನಿರ್ಲಕ್ಷಿಸಬಾರದು. ಕೆಲವು ರೋಗಿಗಳು ನಿದ್ರಾಹೀನತೆ, ಗೊಂದಲ, ಪ್ರಕ್ಷುಬ್ಧತೆ ಅಥವಾ ದುರ್ಬಲತೆಯನ್ನು ಅನುಭವಿಸಬಹುದು.

ಒಸಡುಗಳು ಅಥವಾ ಮೂಗಿನಿಂದ ರಕ್ತಸ್ರಾವ, ವಾಂತಿಯಲ್ಲಿ ರಕ್ತ ಅಥವಾ ಕಪ್ಪು ಮಲ ಸೇರಿದಂತೆ ರಕ್ತಸ್ರಾವದ ಲಕ್ಷಣಗಳು ಡೆಂಗ್ಯುವಿನ ಹೆಚ್ಚು ತೀವ್ರ ರೂಪವನ್ನು ಸೂಚಿಸುತ್ತವೆ. ಎದೆ ಮತ್ತು ಹೊಟ್ಟೆಯಲ್ಲಿ ದ್ರವ ಶೇಖರಣೆಯಿಂದ ಉಸಿರಾಟದ ತೊಂದರೆ ಉಂಟಾಗಬಹುದು. ಈ ಎಚ್ಚರಿಕೆ ಚಿಹ್ನೆಗಳು ರೋಗ ಅಪಾಯಕಾರಿ ಹಂತ ಪ್ರವೇಶಿಸಿರುವುದನ್ನು ಸೂಚಿಸುತ್ತವೆ.

ಡೆಂಗ್ಯು ಜೀವಕ್ಕೆ ಮಾರಕವಾಗುವ ಚಿಹ್ನೆಗಳು

ಹೆಮರಾಜಿಕ್ ಜ್ವರ ಮತ್ತು ಡೆಂಗ್ಯು ಶಾಕ್ ಸಿಂಡ್ರೋಮ್‌ನಂತಹ ಗಂಭೀರ ಸಮಸ್ಯೆಗಳು ಮಾರಕ ಡೆಂಗ್ಯು ಚಿಹ್ನೆಗಳಾಗಿವೆ. ಈ ಸ್ಥಿತಿಯಲ್ಲಿ ರೋಗಿಗಳು ಆಂತರಿಕ ರಕ್ತಸ್ರಾವ, ತೀವ್ರ ದ್ರವ ಸೋರಿಕೆ, ಅಂಗಾಂಗ ಹಾನಿ ಅಥವಾ ರಕ್ತದೊತ್ತಡದಲ್ಲಿ ಹಠಾತ್ ಕುಸಿತವನ್ನು ಅನುಭವಿಸಬಹುದು.

ರಕ್ತದೊತ್ತಡ ತೀವ್ರವಾಗಿ ಕಡಿಮೆಯಾದಾಗ ದೇಹವು ಸಾಕಷ್ಟು ಆಮ್ಲಜನಕ-ಭರಿತ ರಕ್ತವನ್ನು ಪಡೆಯದಿರಬಹುದು. ಇದು ಆಘಾತಕ್ಕೆ ಕಾರಣವಾಗಬಹುದು. ಚಿಕಿತ್ಸೆ ವಿಳಂಬವಾದರೆ ಡೆಂಗ್ಯು ಜೀವಕ್ಕೆ ಅಪಾಯಕಾರಿಯಾಗುವ ಹಂತ ತಲುಪಬಹುದು. ಡೆಂಗ್ಯು ಗಂಭೀರವಾದಾಗ ಆಸ್ಪತ್ರೆಯ ಆರೈಕೆ ಅಗತ್ಯ.