ರಾಜಸ್ಥಾನದ ಏಕೈಕ ಗಿರಿಧಾಮ ಮೌಂಟ್ ಅಬು ಆಗಲಿದೆ ‘ಅಬು ರಾಜ್’; ಮರುನಾಮಕರಣವನ್ನು ಹೋಟೆಲ್, ವ್ಯಾಪಾರಿ ಸಂಘಗಳು ವಿರೋಧಿಸುತ್ತಿರುವುದೇಕೆ?

ಕಳೆದ ವಾರ ರಾಜಸ್ಥಾನದ ಮುಖ್ಯಮಂತ್ರಿ ಭಜನ್ ಲಾಲ್ ಶರ್ಮಾ ಅವರು ಮೌಂಟ್ ಅಬುವನ್ನು ‘ಅಬು ರಾಜ್’ ಎಂದು ಮರುನಾಮಕರಣ ಮಾಡುವುದಾಗಿ ಘೋಷಿಸಿದರು. 2023ರ ಡಿಸೆಂಬರ್‌ನಲ್ಲಿ ಬಿಜೆಪಿ ರಾಜಸ್ಥಾನದಲ್ಲಿ ಅಧಿಕಾರಕ್ಕೆ ಬಂದ ನಂತರ, ಪಶ್ಚಿಮ ರಾಜಸ್ಥಾನದಲ್ಲಿರುವ ರಾಜ್ಯದ ಏಕೈಕ ಗಿರಿಧಾಮದ ಧಾರ್ಮಿಕ ಸ್ವರೂಪವನ್ನು ರಕ್ಷಿಸುವ ಬೇಡಿಕೆ ಹೆಚ್ಚುತ್ತಿದೆ.

ಅದೇ ವೇಳೆ, ಸ್ಥಳೀಯ ಹೋಟೆಲ್‌ಗಳು ಮತ್ತು ವ್ಯಾಪಾರ ಸಂಸ್ಥೆಗಳು ಈ ಬದಲಾವಣೆಗಳು ಈ ಪ್ರದೇಶಕ್ಕೆ ಹಾನಿಯಾಗಬಹುದು ಎಂಬ ಚಿಂತೆಯನ್ನು ವ್ಯಕ್ತಪಡಿಸಿವೆ. ಹೆಸರು ಬದಲಾವಣೆ ಜೊತೆಗೆ ಮದ್ಯ ಮತ್ತು ಮಾಂಸ ನಿಷೇಧಿಸಿದರೆ, ಪ್ರವಾಸಿಗರು ಇಷ್ಟಪಡುವ ಮೋಜಿನ, ಉತ್ಸಾಹಭರಿತ ವಾತಾವರಣ ಇಲ್ಲವಾಗುತ್ತದೆ ಎಂದು ಅವರು ಹೇಳಿದ್ದಾರೆ. ಇದರಿಂದ ಜನಪ್ರಿಯ ರಜಾ ತಾಣವಾಗಿರುವ ಸ್ಥಳವು ಶಾಂತ ವಾತಾವರಣದ ಧಾರ್ಮಿಕ ತಾಣವಾಗಿ ಬದಲಾಗಬಹುದು. ಪರಿಣಾಮವಾಗಿ ಸಂದರ್ಶಕರ ಸಂಖ್ಯೆ ಕಡಿಮೆಯಾಗುವುದರಿಂದ ವ್ಯಾಪಾರಕ್ಕೂ ಹೊಡೆತ ಬೀಳಬಹುದು ಎಂದು ವ್ಯಾಪಾರಿಗಳು ಆತಂಕ ವ್ಯಕ್ತಪಡಿಸಿದ್ದಾರೆ.

ಮೌಂಟ್ ಅಬುಗೆ ಸಂಬಂಧಿಸಿದ ಧಾರ್ಮಿಕ ಭಾವನೆಗಳ ವಿಚಾರ ಹೊಸದಲ್ಲ. 1959ರಲ್ಲಿ ಆಗಿನ ಫುಲೇರಾ ಶಾಸಕ ಪಿ.ಕೆ. ಚೌಧರಿ ಅವರು ಮೌಂಟ್ ಅಬುವಿನಲ್ಲಿ ಮದ್ಯ ನಿಷೇಧವನ್ನು ತೆಗೆದುಹಾಕಲು ಸರ್ಕಾರ ಯೋಜಿಸುತ್ತಿದೆಯೇ ಎಂದು ವಿಧಾನಸಭೆಯಲ್ಲಿ ಪ್ರಶ್ನಿಸಿದ್ದರು. ಅದಕ್ಕೆ ಉತ್ತರಿಸಿದ ಹಣಕಾಸು ಸಚಿವ ಹರಿ ಭಾವು ಉಪಾಧ್ಯಾಯ ಅವರು ಅಂತಹ ಯಾವುದೇ ಯೋಜನೆಗಳಿಲ್ಲ ಎಂದು ತಿಳಿಸಿದ್ದರು.

ಮುಖ್ಯಮಂತ್ರಿ ಹೇಳಿದ್ದೇನು?

ಫೆಬ್ರವರಿ 27ರಂದು ವಿಧಾನಸಭೆಯಲ್ಲಿ ಬಜೆಟ್ ಚರ್ಚೆಗೆ ಉತ್ತರಿಸಿದ ಸಿಎಂ ಶರ್ಮಾ, “ಅಭಿವೃದ್ಧಿಯನ್ನು ಮುಂದುವರಿಸುವುದರ ಜೊತೆಗೆ ನಮ್ಮ ಪರಂಪರೆಯನ್ನು ಸಂರಕ್ಷಿಸಲು ನಾವು ಬದ್ಧರಾಗಿದ್ದೇವೆ. ಸಾರ್ವಜನಿಕರ ಭಾವನೆಗೆ ಸ್ಪಂದಿಸಿ ಮೌಂಟ್ ಅಬುವನ್ನು ‘ಅಬು ರಾಜ್’ ಎಂದು ಮರುನಾಮಕರಣ ಮಾಡಲಾಗುವುದು. ಜಹಾಜ್‌ಪುರವನ್ನು ‘ಯಜ್ಞಪುರ’ ಎಂದು ಮತ್ತು ಕಮಾನ್ ಅನ್ನು ‘ಕಾಮವನ್’ ಎಂದು ಮರುನಾಮಕರಣ ಮಾಡಲಾಗುವುದು,” ಎಂದು ಘೋಷಿಸಿದ್ದರು.

ಮುಖ್ಯಮಂತ್ರಿ ಕಚೇರಿ ಕನಿಷ್ಠ 2024ರ ಅಂತ್ಯದಿಂದಲೇ ಈ ಕ್ರಮವನ್ನು ಪರಿಗಣಿಸುತ್ತಿತ್ತು. ಏಪ್ರಿಲ್ 2025ರಲ್ಲಿ ಸ್ಥಳೀಯ ಸಂಸ್ಥೆಯೊಂದು ಮೌಂಟ್ ಅಬು ಪುರಸಭೆ ಆಯುಕ್ತರಿಗೆ ಪತ್ರ ಬರೆದು, ಅದನ್ನು ‘ಅಬುರಾಜ್ ತೀರ್ಥ’ ಎಂದು ಮರುನಾಮಕರಣ ಮಾಡುವುದಕ್ಕೂ ಹಾಗೂ ಮಾಂಸ ಮತ್ತು ಮದ್ಯದ ಮುಕ್ತ ಸೇವನೆಯನ್ನು ನಿಷೇಧಿಸುವುದಕ್ಕೂ ಸಂಬಂಧಿಸಿದ ಅಭಿಪ್ರಾಯಗಳನ್ನು ಕೋರಿತ್ತು. ಈ ಕುರಿತು ಸಿಎಂ ಇಲಾಖೆಗೆ ಬರೆದ ಪತ್ರಗಳನ್ನೂ ಅದರಲ್ಲಿ ಉಲ್ಲೇಖಿಸಲಾಗಿದೆ.

ಬಿಜೆಪಿಯ ಬೇಡಿಕೆಗಳೇನು?

ಕಳೆದ ತಿಂಗಳು ರಾಜ್ಯ ಸಚಿವ ಒಟಾರಾಮ್ ದೇವಸಿ ಅವರು ರಾಜ್ಯ ಬಜೆಟ್‌ಗೆ ಮುಂಚಿತವಾಗಿ ಸಿಎಂ ಶರ್ಮಾ ಅವರಿಗೆ ಪತ್ರ ಬರೆದು, ಸಿರೋಹಿ ಜಿಲ್ಲೆ ಸೇರಿದಂತೆ ಇಡೀ ರಾಜ್ಯದ ಬುದ್ಧಿಜೀವಿಗಳು ಕಾಲಕಾಲಕ್ಕೆ ಮಾಡಿದ ವಿನಂತಿಗಳನ್ನು ಗಮನದಲ್ಲಿಟ್ಟುಕೊಂಡು ಮೌಂಟ್ ಅಬುವಿನ ಹೆಸರನ್ನು ಮರುನಾಮಕರಣ ಮಾಡುವಂತೆ ಒತ್ತಾಯಿಸಿದ್ದರು.

ದೇವಸಿ ಅವರು ಮೌಂಟ್ ಅಬುವಿನ ಪಕ್ಕದಲ್ಲಿರುವ ಸಿರೋಹಿ ವಿಧಾನಸಭಾ ಕ್ಷೇತ್ರದ ಶಾಸಕರಾಗಿದ್ದಾರೆ. “ಮೌಂಟ್ ಅಬು ಪ್ರಾಚೀನ ಕಾಲದಿಂದಲೂ ಸನಾತನ ಧರ್ಮದ ನಂಬಿಕೆಯ ಕೇಂದ್ರವಾಗಿದೆ. ಅನೇಕ ಋಷಿಗಳು ಮತ್ತು ಸಂತರು ಇಲ್ಲಿ ತಪಸ್ಸು ಮಾಡಿದ್ದರು. ಅನೇಕ ಐತಿಹಾಸಿಕ ಹಾಗೂ ಪ್ರಾಚೀನ ದೇವಾಲಯಗಳು ಮತ್ತು ವಿಶ್ವಮಟ್ಟದ ಪ್ರವಾಸಿ ತಾಣಗಳು ಇಲ್ಲಿವೆ. ಪ್ರಪಂಚದಾದ್ಯಂತದ ಭಕ್ತರು ಇಲ್ಲಿಗೆ ಬರುತ್ತಾರೆ. ಮೊದಲು ಈ ಸ್ಥಳದ ಹೆಸರು ‘ಅಬುರಾಜ್ ತೀರ್ಥ’ ಆಗಿತ್ತು. ಆದರೆ ಆಗಿನ ಆಡಳಿತ ಸರ್ಕಾರವು ಅದರ ಹೆಸರನ್ನು ‘ಮೌಂಟ್ ಅಬು’ ಎಂದು ಬದಲಾಯಿಸಿತು,” ಎಂದು ಅವರು ಹೇಳಿದ್ದಾರೆ.

“ಪ್ರಸ್ತುತ, ತೆರೆದ ಸ್ಥಳಗಳಲ್ಲಿ ಮಾಂಸದ ಅಂಗಡಿಗಳು ಹಾಗೂ ಸಾರ್ವಜನಿಕವಾಗಿ ಮದ್ಯ ಸೇವಿಸುವ ದೃಶ್ಯಗಳು ಭಕ್ತರನ್ನು ನೊಂದಿಸುತ್ತವೆ,” ಎಂದೂ ದೇವಸಿ ಅಭಿಪ್ರಾಯಪಟ್ಟಿದ್ದಾರೆ.

ಇದರ ಮೊದಲು ಪೋಕರನ್ ಶಾಸಕ ಹಾಗೂ ಬಿಜೆಪಿ ನಾಯಕ ಮಹಾಂತ್ ಪ್ರತಾಪ್ ಪುರಿ ಅವರು ಕಳೆದ ವರ್ಷ ಮಾರ್ಚ್‌ನಲ್ಲಿ ವಿಧಾನಸಭೆಯಲ್ಲಿ ಇದೇ ರೀತಿಯ ಬೇಡಿಕೆಗಳನ್ನು ಮಂಡಿಸಿದ್ದರು.

“ಅಬು ರಾಜ್ ಒಂದು ಕಾಲದಲ್ಲಿ ಪ್ರಮುಖ ತೀರ್ಥಯಾತ್ರಾ ಕೇಂದ್ರವಾಗಿತ್ತು. ಭಾರತದೆಲ್ಲೆಡೆ ಇರುವ ತೀರ್ಥಕ್ಷೇತ್ರಗಳಿಗೆ ಭೇಟಿ ನೀಡಲು ಸಾಧ್ಯವಾಗದಿದ್ದರೆ, ಅದರ ಬದಲು ಅಬು ರಾಜ್‌ಗೆ ಭೇಟಿ ನೀಡಬಹುದೆಂದು ಹೇಳಲಾಗುತ್ತಿತ್ತು. ಇದು ಎಲ್ಲಾ ದೇವರು-ದೇವತೆಗಳ ವಾಸಸ್ಥಾನವಾಗಿದೆ. ಆದರೆ ಈಗ ಅಬು ರಾಜ್ ಪರ್ವತಗಳಲ್ಲಿ ಎಲ್ಲೆಡೆ ಒಡೆದ ಮದ್ಯದ ಬಾಟಲಿಗಳು ಕಾಣಿಸುತ್ತವೆ. ಇದು ವನ್ಯಜೀವಿಗಳಿಗೆ ಗಾಯವನ್ನುಂಟುಮಾಡುತ್ತದೆ. ಆದ್ದರಿಂದ ಅಬು ರಾಜ್‌ನಲ್ಲಿ ಸಾರ್ವಜನಿಕವಾಗಿ ಮದ್ಯಪಾನವನ್ನು ನಿಷೇಧಿಸಬೇಕು. ಇದು ಧಾರ್ಮಿಕ ನಗರವಾಗಿರುವುದರಿಂದ ಮಾಂಸ ಹಾಗೂ ಮಾಂಸದ ಅಂಗಡಿಗಳನ್ನು ಸಂಪೂರ್ಣವಾಗಿ ನಿಷೇಧಿಸಬೇಕು,” ಎಂದು ಪುರಿ ಹೇಳಿದ್ದಾರೆ.

ಬಿಜೆಪಿಯ ಹೊರತಾಗಿ ಕರ್ಣಿ ಸೇನೆಯಂತಹ ಹಲವು ಸಂಘಟನೆಗಳೂ ಹೆಸರು ಬದಲಾವಣೆಗೆ ಒತ್ತಾಯಿಸಿದ್ದವು. ವಿರೋಧ ಪಕ್ಷ ಕಾಂಗ್ರೆಸ್ ಈ ವಿಷಯದಲ್ಲಿ ಬಹುತೇಕ ಮೌನವಾಗಿದ್ದರೂ, ಸಿರೋಹಿಯ ಮಾಜಿ ಕಾಂಗ್ರೆಸ್ ಶಾಸಕ ಹಾಗೂ ಅಶೋಕ್ ಗೆಹ್ಲೋಟ್ ಅವರ ಮುಖ್ಯಮಂತ್ರಿ ಅವಧಿಯಲ್ಲಿ ಸಲಹೆಗಾರರಾಗಿದ್ದ ಸನ್ಯಾಮ್ ಲೋಧಾ ಈ ಕ್ರಮವನ್ನು ಸ್ವಾಗತಿಸಿದ್ದಾರೆ.

ಸಿಎಂ ಶರ್ಮಾ ಹಾಗೂ ಅಧಿಕಾರಿಗಳಿಗೆ ಧನ್ಯವಾದ ಅರ್ಪಿಸಿದ ಲೋಧಾ, “ಅಬು ರಾಜ್ ಮಾರ್ವಾರ್ ಭೂಮಿಯ ಪ್ರತಿಯೊಬ್ಬರ ದನಿ. ಅಬುವಿನ ಭೂಮಿ ಪ್ರಾಚೀನ ಕಾಲದಿಂದಲೂ ಸಂತರು ಹಾಗೂ ಮಹಾನ್ ಆತ್ಮಗಳ ತಪಸ್ಸಿನಿಂದ ಪವಿತ್ರವಾಗಿದೆ. ಇಲ್ಲಿ ಪ್ರತಿಯೊಂದು ಕಣವೂ ಶಂಕರನೊಂದಿಗೆ ಪ್ರತಿಧ್ವನಿಸುತ್ತದೆ,” ಎಂದು ಹೇಳಿದ್ದಾರೆ.

ಸ್ಥಳೀಯ ಹೋಟೆಲ್ ಮತ್ತು ವ್ಯಾಪಾರ ಸಂಘಗಳು ಏನು ಹೇಳುತ್ತಿವೆ?

ಕಳೆದ ವರ್ಷ ಸ್ಥಳೀಯ ಸಂಸ್ಥೆಯ ಪತ್ರ ಸಾರ್ವಜನಿಕವಾದ ನಂತರ, ಹೋಟೆಲ್‌ಗಳು, ವ್ಯಾಪಾರಿಗಳು, ಸ್ಥಳೀಯ ವ್ಯವಹಾರ ಸಂಸ್ಥೆಗಳು ಹಾಗೂ ಜಾತಿ ಸಂಘಟನೆಗಳು ಸೇರಿ ಸುಮಾರು 23 ಸಂಘಗಳು ಈ ಕ್ರಮವನ್ನು ವಿರೋಧಿಸಿ ಮುಖ್ಯಮಂತ್ರಿಗೆ ಪತ್ರ ಬರೆದಿದ್ದವು.

ಮರುನಾಮಕರಣವನ್ನು ಟೀಕಿಸಿದ ಮೌಂಟ್ ಅಬು ಹೋಟೆಲ್ ಅಸೋಸಿಯೇಷನ್ (MAHA) ಕಾರ್ಯದರ್ಶಿ ಸೌರಭ್ ಗಂಗಾಡಿಯಾ, “ಕೆಲವರನ್ನು ಸಂತೋಷಪಡಿಸಲು ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಇದರ ಅಗತ್ಯವಿರಲಿಲ್ಲ. ಹೆಸರನ್ನು ಮಾತ್ರ ಬದಲಾಯಿಸಲಾಗಿದೆ, ಉಳಿದ ಎಲ್ಲವೂ ಹಾಗೆಯೇ ಇದೆ. ಈ ಕ್ರಮ ದೂರದೃಷ್ಟಿಯಿಲ್ಲದ, ಅಪಕ್ವ ಹಾಗೂ ಆತುರದ ನಿರ್ಧಾರವಾಗಿದೆ. ಸರ್ಕಾರ ಮರುನಾಮಕರಣ ಮಾಡಲು ಬಯಸಿದರೆ, ಮೊದಲು ಇದನ್ನು ಧಾರ್ಮಿಕ ತಾಣವಾಗಿ ಅಭಿವೃದ್ಧಿಪಡಿಸಬೇಕಾಗಿತ್ತು,” ಎಂದು ಹೇಳಿದ್ದಾರೆ.

ಮದ್ಯ ಮತ್ತು ಮಾಂಸದ ಮೇಲಿನ ಸಂಭಾವ್ಯ ನಿರ್ಬಂಧಗಳ ಕುರಿತು ಮಾತನಾಡಿದ ಅವರು, “ಅದು ಜಾರಿಯಾದರೆ ಇದು ಪ್ರವಾಸಿ ತಾಣವಾಗಿ ಉಳಿಯುವುದಿಲ್ಲ. ಕೇವಲ ಧಾರ್ಮಿಕ ಪ್ರವಾಸೋದ್ಯಮ ಮಾತ್ರ ಉಳಿಯುತ್ತದೆ. ಜನರು ಬಂದು ದರ್ಶನ ಮಾಡಿ ಹೋಗುತ್ತಾರೆ; ಆದರೆ ಇಲ್ಲಿ ರಾತ್ರಿಯಿಡೀ ಉಳಿಯುವುದಿಲ್ಲ,” ಎಂದು ಹೇಳಿದ್ದಾರೆ.

ಮೌಂಟ್ ಅಬುಗೆ ಪ್ರತಿ ವರ್ಷ ಸುಮಾರು 30-35 ಲಕ್ಷ ಪ್ರವಾಸಿಗರು ಭೇಟಿ ನೀಡುತ್ತಾರೆ. ಇವರಲ್ಲಿ ಶೇಕಡಾ 80 ಕ್ಕಿಂತ ಹೆಚ್ಚು ಮಂದಿ ಮದ್ಯ ನಿಷೇಧಿತ ರಾಜ್ಯವಾದ ಗುಜರಾತ್‌ನಿಂದ ಬರುವವರಾಗಿದ್ದಾರೆ.

ಹೋಟೆಲ್ ಅಸೋಸಿಯೇಷನ್ ಆಫ್ ಮೌಂಟ್ ಅಬು (HAMA) ಅಧ್ಯಕ್ಷ ಯೂಸುಫ್ ಖಾನ್ ಅವರ ಪ್ರಕಾರ, “ಮೌಂಟ್ ಅಬುಗೆ ವರ್ಷಕ್ಕೆ ಸುಮಾರು 30-40 ಲಕ್ಷ ಪ್ರವಾಸಿಗರು ಬರುತ್ತಾರೆ. ಹೆಸರು ಬದಲಾವಣೆಯಿಂದ ಹೆಚ್ಚಿನ ವ್ಯತ್ಯಾಸವಾಗುವುದಿಲ್ಲ. ಆದರೆ ಮದ್ಯ ಮತ್ತು ಮಾಂಸ ನಿಷೇಧಿಸಿದರೆ ಸಮಸ್ಯೆಯಾಗುತ್ತದೆ. ಇಲ್ಲಿ ವರ್ಷಕ್ಕೆ ಸುಮಾರು ₹100 ಕೋಟಿ ಮೌಲ್ಯದ ಮದ್ಯ ಮಾರಾಟವಾಗುತ್ತದೆ. ಇದರಿಂದ ಸರ್ಕಾರಕ್ಕೂ ಆದಾಯ ನಷ್ಟವಾಗುತ್ತದೆ.” ಅವರ ಸಂಘವು ಸುಮಾರು 120 ಹೋಟೆಲ್‌ಗಳನ್ನು ಪ್ರತಿನಿಧಿಸುತ್ತದೆ.

ಖಾನ್ ಅವರ ಪ್ರಕಾರ, ಪ್ರವಾಸಿಗರ ಸಂಖ್ಯೆ ಈಗಾಗಲೇ ಕಡಿಮೆಯಾಗುತ್ತಿದೆ. “ಆಡಳಿತ ಮೊದಲು ಮೌಂಟ್ ಅಬುವಿನ ಅಭಿವೃದ್ಧಿಗೆ ಒತ್ತು ನೀಡಬೇಕು. ಪಾರ್ಕಿಂಗ್ ಸೇರಿದಂತೆ ಮೂಲಭೂತ ಸೌಲಭ್ಯಗಳ ಕೊರತೆಯಿಂದಾಗಿ 2024 ಮತ್ತು 2025ರಲ್ಲಿ ಪ್ರವಾಸಿಗರ ಸಂಖ್ಯೆ ಇಳಿಕೆಯಾಗಿದೆ. ಪ್ರವಾಸಿಗರು ಕುಂಭಾಲ್‌ಗಢ, ಉದಯಪುರ ಮತ್ತು ಚಳಿಗಾಲದಲ್ಲಿ ಜೈಸಲ್ಮೇರ್‌ನಂತಹ ಇತರ ತಾಣಗಳನ್ನು ಆರಿಸುತ್ತಿದ್ದಾರೆ,” ಎಂದು ಅವರು ಹೇಳಿದ್ದಾರೆ.

ಮೌಂಟ್ ಅಬುವಿನ ಹೆಸರಿನ ಹಿಂದೆ

ಬ್ರಿಟಿಷ್ ಮಿಲಿಟರಿ ಅಧಿಕಾರಿ ಜೇಮ್ಸ್ ಟಾಡ್ ತಮ್ಮ Annals and Antiquities of Rajasthan ಕೃತಿಯಲ್ಲಿ ಮೌಂಟ್ ಅಬುವನ್ನು “Olympus of Rajasthan” ಎಂದು ಕರೆದಿದ್ದಾರೆ. ರಾಜ್ಯ ಸರ್ಕಾರದ ಪ್ರಕಾರ, ಪುರಾಣಗಳಲ್ಲಿ ಇದನ್ನು “ಅರ್ಭುದಾರಣ್ಯ” ಅಥವಾ “ಅರ್ಭುದ ಅರಣ್ಯ” ಎಂದು ಕರೆಯಲಾಗುತ್ತಿತ್ತು. ವಿಶ್ವಾಮಿತ್ರನೊಂದಿಗೆ ಭಿನ್ನಾಭಿಪ್ರಾಯದ ನಂತರ ಋಷಿ ವಸಿಷ್ಠರು ಇಲ್ಲಿ ಆಶ್ರಯ ಪಡೆದಿದ್ದರು ಎಂಬ ನಂಬಿಕೆಯಿದೆ.

ಮೌಂಟ್ ಅಬುಗೆ ಸಂಬಂಧಿಸಿದ ಜನಪ್ರಿಯ ಪುರಾಣದಲ್ಲಿ ಅರ್ಭುದ ಎಂಬ ಸರ್ಪ ಶಿವನ ವಾಹನವಾದ ನಂದಿಯ ಜೀವವನ್ನು ಉಳಿಸಿದ ಕಥೆಯೂ ಉಲ್ಲೇಖವಾಗುತ್ತದೆ. “ಮೌಂಟ್ ಅಬು” ಎಂಬ ಹೆಸರು ಅದರ ಮೂಲ ಹೆಸರಿನ ಅರ್ಧಭಾಗವಾಗಿದ್ದು, ಅರ್ಭುದ ಎಂಬ ಪದದಿಂದಲೇ “ಅಬು” ಎಂಬ ಹೆಸರು ಬಂದಿದೆ ಎಂದು ಹೇಳಲಾಗುತ್ತದೆ.

ಭೂಮಿಯ ಮೇಲಿನ ಧರ್ಮವನ್ನು ರಕ್ಷಿಸಲು ದೇವರುಗಳ ಮೊರೆ ಹೋಗಿ ವಸಿಷ್ಠ ಋಷಿ ಈ ಪರ್ವತ ಶ್ರೇಣಿಯ ಶಿಖರದಲ್ಲಿ ಯಜ್ಞ ನಡೆಸಿದರು ಎಂಬ ನಂಬಿಕೆಯಿದೆ. ಅವರ ಪ್ರಾರ್ಥನೆಗೆ ಯಜ್ಞಕುಂಡದಿಂದ ಹೊರಬಂದ ಯುವಕನೇ ಅಗ್ನಿವಂಶ ರಾಜಪೂತರ ಮೊದಲ ಪೂರ್ವಜ ಎಂಬ ಕಥೆಯೂ ಪ್ರಚಲಿತದಲ್ಲಿದೆ.

ಮೌಂಟ್ ಅಬುವಿನಲ್ಲಿ ಅನೇಕ ದೇವಾಲಯಗಳಿವೆ. ಅರಾವಳಿ ಪರ್ವತಶ್ರೇಣಿಯ ಅತ್ಯುನ್ನತ ಶಿಖರವಾದ ಗುರು ಶಿಖರದಲ್ಲಿ ದೈವಿಕ ತ್ರಿಮೂರ್ತಿಗಳ (ಬ್ರಹ್ಮ, ವಿಷ್ಣು ಮತ್ತು ಶಿವ) ಅವತಾರವೆಂದು ಪೂಜಿಸಲ್ಪಡುವ ಗುರು ದತ್ತಾತ್ರೇಯ ದೇವಾಲಯವಿದೆ. ಈ ದೇವಾಲಯವನ್ನು 14ನೇ ಶತಮಾನದಲ್ಲಿ ನಿರ್ಮಿಸಲಾಗಿದೆ ಎಂದು ಹೇಳಲಾಗುತ್ತದೆ. ಪ್ರಮುಖ ಜೈನ ದೇವಾಲಯಗಳಲ್ಲಿ ದಿಲ್ವಾರ ಜೈನ ದೇವಾಲಯವೂ ಸೇರಿದೆ. ವಿಶ್ವದ ಅತ್ಯುತ್ತಮ ದೇವಾಲಯಗಳಲ್ಲೊಂದೆಂದು ಪರಿಗಣಿಸಲ್ಪಡುವ ಇದನ್ನು 11ನೇ ಮತ್ತು 13ನೇ ಶತಮಾನಗಳ ನಡುವೆ ನಿರ್ಮಿಸಲಾಗಿದೆ.