ದಿಲ್ಲಿ-3, ಸಿಕ್ಕಿಂ-1: ರಾಜ್ಯ ಸಭೆಯ 4 ಸ್ಥಾನಗಳಿಗೆ ಜ. 19ರಂದು ಚುನಾವಣೆ

ಹೊಸದಿಲ್ಲಿ: ದಿಲ್ಲಿ 3 ಹಾಗೂ ಸಿಕ್ಕಿಂ 1 ಸೇರಿದಂತೆ ಒಟ್ಟು 4 ರಾಜ್ಯ ಸಭಾ ಸ್ಥಾನಗಳಿಗೆ ಜನವರಿ 19ರಂದು ಚುನಾವಣೆ ನಡೆಯಿಲಿದೆ ಎಂದು ಚುನಾವಣಾ ಆಯೋಗ ಶುಕ್ರವಾರ ತಿಳಿಸಿದೆ.

ಸಂಜಯ್ ಸಿಂಗ್, ಸುಶೀಲ್ ಕುಮಾರ್ ಗುಪ್ತಾ ಹಾಗೂ ನಾರಾಯಣ ದಾಸ್ ಗುಪ್ತಾ (ಎಲ್ಲರೂ ಆಮ್ ಆದ್ಮಿ ಪಕ್ಷ) ಅವರ 6 ವರ್ಷಗಳ ಅಧಿಕಾರಾವಧಿ ಜನವರಿ 27ರಂದು ಅಂತ್ಯಗೊಳ್ಳಲಿದೆ. ಹಿಶೇಯ್ ಲಚುಂಗ್ಪಾ (ಸಿಕ್ಕಿಂ ಡೆಮಾಕ್ರೆಟಿಕ್ ಫ್ರಂಟ್) ಅವರ ಅವಧಿ ಫೆಬ್ರವರಿ 23ರಂದು ಕೊನೆಗೊಳ್ಳಲಿದೆ.

ರಾಜ್ಯ ಸಭೆಯಲ್ಲಿ ಖಾಲಿ ಇರುವ ನಾಲ್ಕು ಸ್ಥಾನಗಳಿಗೆ ಜನವರಿ 19ರಂದು ಚುನಾವಣೆ ನಡೆಯಲಿದೆ. ಅಧಿಸೂಚನೆ ಹೊರಡಿಸುವುದರೊಂದಿಗೆ ಜನವರಿ 2ರಿಂದ ನಾಮಪತ್ರ ಸಲ್ಲಿಕೆ ಪ್ರಕ್ರಿಯೆ ಆರಂಭವಾಗಲಿದೆ. ಜನವರಿ 9 ನಾಮಪತ್ರ ಸಲ್ಲಿಸಲು ಕೊನೆಯ ದಿನಾಂಕ ಎಂದು ಚುನಾವಣಾ ಆಯೋಗ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.