ಡಿಡಿಪಿಐ ಕಾಯಿದೆಯ ಸೆಕ್ಷನ್ 44(3) ಅನ್ನು ರದ್ದುಗೊಳಿಸುವಂತೆ INDIA ಮೈತ್ರಿಕೂಟದ 130ಕ್ಕೂ ಅಧಿಕ ಸಂಸದರಿಂದ ಕೇಂದ್ರ ಪ್ರಸಾರ ಖಾತೆ ಸಚಿವರಿಗೆ ಪತ್ರ
Update: 2025-04-13 16:42 IST
Photo credit: thewire.in( cdredit: thewire.in)
ಹೊಸದಿಲ್ಲಿ : RTI ಕಾನೂನನ್ನು ತಿದ್ದುಪಡಿ ಮಾಡುವ ಮತ್ತು ತೀವ್ರವಾಗಿ ದುರ್ಬಲಗೊಳಿಸುವ ಡಿಜಿಟಲ್ ವೈಯಕ್ತಿಕ ಡೇಟಾ ಸಂರಕ್ಷಣಾ ಕಾಯಿದೆ(DPDP)ಯ ಸೆಕ್ಷನ್ 44(3) ಅನ್ನು ರದ್ದುಗೊಳಿಸುವಂತೆ ಆಗ್ರಹಿಸಿ INDIA ಮೈತ್ರಿಕೂಟದ 130ಕ್ಕೂ ಅಧಿಕ ಸಂಸದರು ಭಾರತದ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ಅಶ್ವಿನಿ ವೈಷ್ಣವ್ ಅವರಿಗೆ ಪತ್ರ ಬರೆದಿದ್ದಾರೆ.
ಖ್ಯಾತ ವಕೀಲ, ಸಾಮಾಜಿಕ ಕಾರ್ಯಕರ್ತ ಪ್ರಶಾಂತ್ ಭೂಷಣ್ ಈ ಕುರಿತ ಪತ್ರವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.
ಜನರ ಮಾಹಿತಿ ಹಕ್ಕನ್ನು ಕಸಿದುಕೊಳ್ಳುವುದಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ಸರಕಾರ ಅಗತ್ಯ ಕ್ರಮಗಳನ್ನು ತೆಗೆದುಕೊಳ್ಳುತ್ತದೆ ಎಂದು ನಾವು ಭಾವಿಸುತ್ತೇವೆ. ಈ ತಿದ್ದುಪಡಿಯು RTI ಕಾಯಿದೆಯ ಅಡಿಯಲ್ಲಿ ನಿರ್ಣಾಯಕ ಮಾಹಿತಿಯನ್ನು ಪಡೆಯುವ ಜನರ ಹಕ್ಕನ್ನು ದುರ್ಬಲಗೊಳಿಸುವ ಗಂಭೀರ ಅಪಾಯವನ್ನು ಉಂಟುಮಾಡುತ್ತದೆ ಎಂದು ಪತ್ರದಲ್ಲಿ ಉಲ್ಲೇಖಿಸಲಾಗಿದೆ.
RTI ಕಾಯಿದೆಯ ಸೆಕ್ಷನ್ 8(1)(j) ಗೆ ತಿದ್ದುಪಡಿ ಮಾಡಿ DPDP ಕಾಯಿದೆಯ ಸೆಕ್ಷನ್ 44(3)ನ್ನು ಪರಿಚಯಿಸಲಾಗಿದೆ. ಇದು ಎಲ್ಲಾ ವೈಯಕ್ತಿಕ ಮಾಹಿತಿಯನ್ನು ಬಹಿರಂಗಪಡಿಸುವಿಕೆಯಿಂದ ವಿನಾಯಿತಿ ನೀಡಲು ಪ್ರಯತ್ನಿಸುತ್ತದೆ. ಈ ಮೊದಲು, ವೈಯಕ್ತಿಕ ಮಾಹಿತಿಯು ಸಾರ್ವಜನಿಕ ಚಟುವಟಿಕೆ ಅಥವಾ ಹಿತಾಸಕ್ತಿಗೆ ಸಂಬಂಧಿಸದಿದ್ದರೆ ಅಥವಾ ಅದರ ಬಹಿರಂಗಪಡಿಸುವಿಕೆಯು ಗೌಪ್ಯತೆಯ ಅನಗತ್ಯ ಆಕ್ರಮಣವನ್ನು ಉಂಟುಮಾಡುವುದಿದ್ದರೆ ಮಾತ್ರ ತಡೆ ಹಿಡಿಯಬಹುದಿತ್ತು.
DPDP ಕಾಯಿದೆಯ ಮೂಲಕ ಮಾಡಿದ ತಿದ್ದುಪಡಿಗಳು RTI ಕಾಯಿದೆಯನ್ನು ತೀವ್ರವಾಗಿ ದುರ್ಬಲಗೊಳಿಸುತ್ತವೆ ಮತ್ತು ಮಾಹಿತಿಯು ನಾಗರಿಕರ ಮೂಲಭೂತ ಹಕ್ಕಿನ ಮೇಲೆ ದುಷ್ಪರಿಣಾಮ ಬೀರುತ್ತದೆ. ಗೌಪ್ಯತೆ ಮತ್ತು ದತ್ತಾಂಶ ರಕ್ಷಣೆ ಕುರಿತ ಕಾನೂನು ಚೌಕಟ್ಟು RTI ಕಾಯಿದೆಗೆ ಪೂರಕವಾಗಿರಬೇಕು ಮತ್ತು ಯಾವುದೇ ರೀತಿಯಲ್ಲಿ ಆರ್ಟಿಐ ಕಾಯಿದೆಯನ್ನು ದುರ್ಬಲಗೊಳಿಸುವುದಿಲ್ಲ ಎಂದು ನಾವು ನಂಬುತ್ತೇವೆ ಎಂದು ಪತ್ರದಲ್ಲಿ ಹೇಳಲಾಗಿದೆ.