ಬೊಕೊ ಹರಾಂ ಉಗ್ರರಿಂದ 7 ಮಂದಿಯ ಹತ್ಯೆ

ಕಾನೊ (ನೈಜೀರಿಯ), ಜ. 12: ಬೊಕೊ ಹರಾಂ ಭಯೋತ್ಪಾದಕರು ಈಶಾನ್ಯ ನೈಜೀರಿಯದಲ್ಲಿ ಬುಡಕಟ್ಟು ಪಂಗಡಗಳ ಮೇಲೆ ದಾಳಿ ನಡೆಸಿ ಏಳು ಮಂದಿಯನ್ನು ಹತ್ಯೆಗೈದಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಅಡಮಾವ ರಾಜ್ಯದ ಉತ್ತರ ಭಾಗದಲ್ಲಿರುವ ಮಡಗಲಿ ಪಟ್ಟಣದಲ್ಲಿ ರವಿವಾರ ಸಂಜೆ ಭಯೋತ್ಪಾದಕರು ಈ ದಾಳಿ ನಡೆಸಿದ್ದಾರೆ. ಸೇನೆಯು ಭಯೋತ್ಪಾದಕರ ವಿರುದ್ಧ ಪ್ರತಿ ದಾಳಿ ನಡೆಸುತ್ತಿದ್ದರೂ, ಈ ರಾಜ್ಯವನ್ನೇ ಗುರಿಯಿರಿಸಿ ಬೊಕೊ ಹರಾಂ ಉಗ್ರರು ದಾಳಿ ನಡೆಸುತ್ತಿದ್ದಾರೆ.
‘‘ಅವರು ಏಳು ಜನರನ್ನು ಕೊಂದರು ಹಾಗೂ 10 ಮನೆಗಳನ್ನು ಸುಟ್ಟರು’’ ಎಂದು ಮಡಗಲಿ ಸ್ಥಳೀಯಾಡಳಿತ ಸಂಸ್ಥೆಯ ಮಾಜಿ ಅಧ್ಯಕ್ಷ ಮೈನ ಉಲರಮು ತಿಳಿಸಿದರು. ಬಳಿಕ ಸೈನಿಕರು ಉಗ್ರರನ್ನು ಸಮೀಪದ ಕಾಡಿಗಟ್ಟಿದರು ಎಂದರು.