ಸೌದಿ ಏರ್ಲೈನ್ಸ್ ವಿಮಾನದಲ್ಲಿ ಪೈಲಟ್ ಹೃದಯಾಘಾತದಿಂದ ಸಾವು
Update: 2016-03-04 23:42 IST
ರಿಯಾದ್, ಮಾ.4: ಬಿಶ ನಗರದಿಂದ ರಿಯಾದ್ಗೆ ತೆರಳುತ್ತಿದ್ದ ಸೌದಿ ಅರೇಬಿಯನ್ ಏರ್ಲೈನ್ಸ್ನ ವಿಮಾನವೊಂದರ ಪೈಲಟ್ ವಿಮಾನ ಹಾರಾಟ ನಡೆಸುತ್ತಿರುವಾಗಲೇ ಹೃದಯಾಘಾತದಿಂದ ಸೋಮವಾರ ಮೃತಪಟ್ಟಿದ್ದಾರೆಂದು ಏರ್ಲೈನ್ಸ್ ಮಾಹಿತಿ ನೀಡಿದೆ.
ವಲೀದ್ ಅಲ್-ಮುಹಮ್ಮದ್ ಎಂಬ ಹೆಸರಿನ ಪೈಲಟ್ ಎಸ್ವಿ 1734 ವಿಮಾನವನ್ನು ಕಿಂಗ್ ಖಾಲಿದ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಇಳಿಸುವ ಮೊದಲೇ ಹೃದಯಾಘಾತಕ್ಕೊಳಗಾದಾಗ ಸಹ ಪೈಲಟ್ ರಾಮಿ ಬೆನ್ ಘಾಝಿ ಕೂಡಲೇ ವಿಮಾನದ ನಿಯಂತ್ರಣವನ್ನು ತಮ್ಮ ಕೈಯಲ್ಲಿ ತೆಗೆದುಕೊಂಡರು. ನಂತರ ವಿಮಾನ ನಿಲ್ದಾಣಕ್ಕೆ ಕರೆ ಮಾಡಿ ವಿಮಾನ ಕೆಳಗಿಳಿಯುತ್ತಿದ್ದಂತೆಯೇ ಆ್ಯಂಬುಲೆನ್ಸ್ ಸಿದ್ಧವಾಗಿಟ್ಟುಕೊಳ್ಳುವಂತೆ ತಿಳಿಸಿದರು.
ವಿಮಾನ ಕೆಳಗಿಳಿಯುತ್ತಿದ್ದಂತೆ ಅಲ್ಲಿ ಕಾದು ನಿಂತಿದ್ದ ವೈದ್ಯರು ವಿಮಾನ ಪ್ರವೇಶಿಸಿ ಪೈಲಟ್ನನ್ನು ಪರೀಕ್ಷಿಸಿ ಆತ ಮೃತಪಟ್ಟಿದ್ದಾನೆಂದು ಘೋಷಿಸಿದರು.