ಭಾರತದಲ್ಲಿ ಶೇ.30 ಚಾಲನಾ ಪರವಾನಿಗೆ ನಕಲಿ: ಗಡ್ಕರಿ

ಹೊಸದಿಲ್ಲಿ, ಮೇ 29: ಭಾರತದಲ್ಲಿ ಪ್ರತಿ ಮೂರರಲ್ಲಿ ಒಂದು ವಾಹನ ಚಾಲನಾ ಪರವಾನಿಗೆ ನಕಲಿಯಾಗಿದೆ. ಬರೋಬ್ಬರಿ 5 ಕೋಟಿಗೂ ಹೆಚ್ಚು ಜನರು ನಕಲಿ ದಾಖಲೆಗಳೊಂದಿಗೆ ರಸ್ತೆಗಳಲ್ಲಿ ವಾಹನ ಚಲಾಯಿಸುತ್ತಿದ್ದಾರೆಂದು ಅಧಿಕೃತ ಮಾಹಿತಿ ತಿಳಿಸಿದೆ.

ಆದರೆ, ಖೋಟಾ ಚಾಲನಾ ಪರವಾನಿಗೆ ಹೊಂದಿರುವವರು ಶೀಘ್ರವೇ ಒಂದು ವರ್ಷದ ವರೆಗೆ ಜೈಲು ಶಿಕ್ಷೆ ಹಾಗೂ ರೂ. 10 ಸಾವಿರದಷ್ಟು ಭಾರೀ ದಂಡ ತೆರಬೇಕಾಗಬಹುದು. ಇದು ಈಗಿರುವ ದಂಡ ಪ್ರಸ್ತಾವ ರೂ. 500 ಹಾಗೂ ಮೂರು ತಿಂಗಳ ಗೃರಿಷ್ಠ ಕಾರಾಗೃಃ ವಾಸಕ್ಕಿಂತ ಅತಿ ಹೆಚ್ಚಾಗಿದೆ.

ಅಪ್ರಾಪ್ತ ವಯಸ್ಕರು ಚಾಲನೆ ಮಾಡುವ ಸಂದರ್ಭದಲ್ಲಿ ವಾಹನದ ಮಾಲಕ ಅಥವಾ ಪಾಲಕರು ಮೂರು ವರ್ಷಗಳ ತನಕ ಜೈಲು ಶಿಕ್ಷೆ ಹಾಗೂ ರೂ.20 ಸಾವಿರದ ವರೆಗೆ ದಂಡವನ್ನು ತೆರಬೇಕಾಗಬಹುದು. ಅವರ ವಾಹನದ ನೋಂದಣಿ ಪ್ರಮಾಣ ಪತ್ರವನ್ನೂ ರದ್ದುಗೊಳಿಸಲಾಗುವುದು.

 ಭಾರತದಲ್ಲಿ ಶೇ.30ರಷ್ಟು ಚಾಲನಾ ಪರವಾನಿಗೆಗಳು ನಕಲಿಯಾಗಿವೆ. ಅದನ್ನು ತಪಾಸಣೆ ಮಾಡುವ ಅಗತ್ಯವಿದೆ. ತಾವು ಡ್ರೈವಿಂಗ್ ಲೈಸನ್ಸ್ ಪಡೆಯುವುದಕ್ಕೆ ಗಣಕೀಕೃತ ಪರೀಕ್ಷೆ ನಡೆಸುವ ಆನ್‌ಲೈನ್ ವ್ಯವಸ್ಥೆಯೊಂದನ್ನು ಆರಂಭಿಸಲಿದ್ದೇವೆ. ಪ್ರತಿಯೊಬ್ಬನೂ ಆತ ರಾಜಕಾರಣಿಯಿರಲಿ, ಅಧಿಕಾರಿಯಿರಲಿ ಅಥವಾ ಖ್ಯಾತನಾಮನಿರಲಿ-ಚಾಲನಾ ಪರವಾನಿಗೆ ಪಡೆಯಲು ಪರೀಕ್ಷೆ ತೆಗೆದುಕೊಳ್ಳಲೇ ಬೇಕು. ಅದರಲ್ಲಿ ಸಂಪೂರ್ಣ ಪಾರದರ್ಶಕತೆಯಿರುತ್ತದೆಂದು ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಪಿಟಿಐಗೆ ತಿಳಿಸಿದ್ದಾರೆ.

ಸಚಿವಾಲಯವು ಸುಮಾರು 18 ಕೋಟಿ ಪರವಾನಿಗೆಗಳ ಮಾಹಿತಿ ಸಂಗ್ರಹಿಸಿದೆ. ಅವುಗಳಲ್ಲಿ ಅಂದಾಜು 5.4 ಕೋಟಿಯಷ್ಟು ‘ನಕಲಿ’ ವರ್ಗದವುಗಳಾಗಿವೆ. ಅವುಗಳ ತಪಾಸಣೆ ನಡೆಸುವ ಅಗತ್ಯವಿದೆಯೆಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ.

ಈ ಹಿಂದೆ ಸರಕಾರ ನಡೆಸಿದ್ದ ಸುಮಾರು 6 ಕೋಟಿ ಚಾಲನಾ ಪರವಾನಿಗೆಗಳ ಸಮೀಕ್ಷೆಯಲ್ಲಿ ಸುಮಾರು 74 ಲಕ್ಷ ಪರವಾನಿಗೆಗಳು ನಕಲಿಯಾಗಿದ್ದವು.

ರಸ್ತೆ ಸಾರಿಗೆ ಮತ್ತು ಸುರಕ್ಷಾ ಮಸೂದೆಯು ಭಾರತದ ರಸ್ತೆಗಳನ್ನು ಸುರಕ್ಷಿತವಾಗಿಸಲು ಅತಿ ಮುಖ್ಯವಾಗಿದೆಯೆಂದು ಹೇಳಿದ ಗಡ್ಕರಿ, ಅಂದಾಜು 1.5 ಲಕ್ಷ ಜನರು ದೇಶದಲ್ಲಿ ಪ್ರತಿವರ್ಷ ರಸ್ತೆ ಅಪಘಾತಗಳಿಗೆ ಬಲಿಯಾಗುತ್ತಿದ್ದಾರೆ. ಪ್ರಸ್ತಾವಿತ ಕಾನೂನು ಚಾಲನಾ ಪರವಾನಿಗೆ ನೀಡಿಕೆ ಸಹಿತ ಸಂಪೂರ್ಣ ವ್ಯವಸ್ಥೆಯನ್ನು ಸುಧಾರಿಸಲಿದೆ ಎಂದಿದ್ದಾರೆ.

ಈ ಮಸೂದೆಯು ಮುಂದಿನ ಸಂಸತ್ ಅಧಿವೇಶನದಲ್ಲಿ ಮಂಜೂರಾಗುವ ಆಶಾವಾದವಿದೆ.ಪ್ರಾದೇಶಿಕ ಸಾರಿಗೆ ಸಂಸ್ಥೆಗಳ ‘ಸ್ಥಾಪಿತ ಹಿತಾಸಕ್ತಿಗಳು’ ವಿರೋಧದಿಂದಾಗಿ ಅದು ವಿಳಂಬವಾಗುತ್ತಿದೆಯೆಂದು ಅವರು ಆರೋಪಿಸಿದ್ದಾರೆ.

ಗಣಕೀಕರಣದ ಜೊತೆಗೆ 5 ಸಾವಿರ ಹೊಸ ಚಾಲನಾ ಕೇಂದ್ರಗಳನ್ನು ಆರಂಭಿಸುವ ಯೋಜನೆ ಸರಕಾರಕ್ಕಿದೆ. ರಾಜಸ್ಥಾನದ ಸಾರಿಗೆ ಸಚಿವ ಯೂನುಸ್ ಖಾನ್ ನೇತೃತ್ವದ ಸಚಿವ ಮಂಡಳಿಯೊಂದು ಸಂಚಾರ ನಿಯಮ ಉಲ್ಲಂಘನೆಗೆ ಭಾರೀ ದಂಡವನ್ನು ಪ್ರಸ್ತಾವಿಸಿರುವ ತನ್ನ ಪ್ರಾಥಮಿಕ ವರದಿಯನ್ನು ಸಲ್ಲಿಸಿದೆ. ಅಂತಿಮ ವರದಿ ಮುಂದಿನ ತಿಂಗಳು ಸಲ್ಲಿಸಲ್ಪಡಬಹುದೆಂದು ನಿರೀಕ್ಷಿಸಲಾಗಿದೆ. ಆ ಬಳಿಕ ಮಸೂದೆಯು ಸಂಸತ್ತಿನಲ್ಲಿ ಮಂಜೂರಾಗಬೇಕೆಂದು ಗಡ್ಕರಿ ತಿಳಿಸಿದ್ದಾರೆ.