ಚಿಕುನ್ಗುನ್ಯಾ: ಸಾವಿನ ಸಂಖ್ಯೆ 13ಕ್ಕೆ
Update: 2016-09-17 23:56 IST
ಹೊಸದಿಲ್ಲಿ, ಸೆ.17: ದಕ್ಷಿಣ ದಿಲ್ಲಿಯ ಲಜಪತ್ನಗರ ನಿವಾಸಿ ಗುಲಾಬ್ಚಂದ್ ಗುಪ್ತಾ (70 ವರ್ಷ) ಎಂಬವರು ಚಿಕುನ್ಗುನ್ಯಾ ರೋಗದಿಂದ ಮೃತರಾಗಿದ್ದು, ಇದರಿಂದ ರಾಷ್ಟ್ರ ರಾಜಧಾನಿಯಲ್ಲಿ ಚಿಕುನ್ಗುನ್ಯಾಕ್ಕೆ ಬಲಿಯಾದವರ ಸಂಖ್ಯೆ 13ಕ್ಕೇರಿದೆ. ಈ ಮಧ್ಯೆ ಕೇಂದ್ರ ಸರಕಾರ ದಿಲ್ಲಿ ಸರಕಾರದಿಂದ ಚಿಕುನ್ಗುನ್ಯಾ ಮತ್ತು ಡೆಂಗ್ ಜ್ವರದಿಂದ ಮೃತಪಟ್ಟವರ ವಿವರ, ವೈದ್ಯಕೀಯ ವಿವರಗಳನ್ನೊಳಗೊಂಡ ವಿಸ್ತೃತ ವರದಿಯನ್ನು ಕೇಳಿದೆ. ಗುಲಾಬ್ಚಂದ್ರನ್ನು ಸೆ.7ರಂದು ದಕ್ಷಿಣ ದಿಲ್ಲಿಯ ಪುಷ್ಪಾವತಿ ಸಿಂಘಾನಿಯಾ ರಿಸರ್ಚ್ ಇನ್ಸ್ಟಿಟ್ಯೂಟ್ಗೆ ಚಿಕುನ್ಗುನ್ಯಾ ಜ್ವರದ ಚಿಕಿತ್ಸೆಗೆಂದು ದಾಖಲಿಸಲಾಗಿತ್ತು. ಚಿಕಿತ್ಸೆ ಫಲಿಸದೆ ಇವರು ಸೆ.12ರಂದು ಮೃತಪಟ್ಟಿದ್ದರು. ತೀವ್ರ ಅನಾರೋಗ್ಯದ ಜೊತೆಗೆ ಬಹು ಅಂಗಾಂಗಳ ಕಾರ್ಯವೈಫಲ್ಯದ ಕಾರಣ ಗುಲಾಬ್ಚಂದ್ ಮೃತಪಟ್ಟಿರುವುದಾಗಿ ವೈದ್ಯಕೀಯ ವರದಿಯಲ್ಲಿ ಉಲ್ಲೇಖಿಸಲಾಗಿತ್ತು ಎಂದು ಮೃತ ವ್ಯಕ್ತಿಯ ಅಳಿಯ ಸಂತೋಷ್ ಮಂಗಲ್ ತಿಳಿಸಿದ್ದಾರೆ. ಈ ವರ್ಷದಲ್ಲಿ ಅಪೋಲೋ ಆಸ್ಪತ್ರೆ ಮತ್ತು ಸರ್ ಗಂಗಾರಾಮ್ ಆಸ್ಪತ್ರೆಗಳಲ್ಲಿ ತಲಾ ಐದು ಮತ್ತು ಎಐಎಂಎಸ್ ಮತ್ತು ಹಿಂದೂರಾವ್ ಆಸ್ಪತ್ರೆಗಳಲ್ಲಿ ತಲಾ ಒಂದು ಚಿಕುನ್ಗುನ್ಯಾ ಸಾವಿನ ಪ್ರಕರಣ ದಾಖಲಾಗಿದೆ.