ಅಳಿವಿನಂಚಿಗೆ ಸರಿಯುತ್ತಿರುವ ಜಿರಾಫೆಗಳು ಅವುಗಳ ವಾಸಸ್ಥಾನಗಳ ನಾಶ ಕಾರಣ: ವಿಜ್ಞಾನಿಗಳು

ವಾಶಿಂಗ್ಟನ್, ಡಿ. 8: ಭೂಮಿಯ ಮೇಲಿನ ಅತಿ ಎತ್ತರದ ಪ್ರಾಣಿ ಜಿರಾಫೆ ಈಗ ಅಳಿವಿನಂಚಿನಲ್ಲಿದೆ ಎಂದು ಜೀವ ವಿಜ್ಞಾನಿಗಳು ಹೇಳುತ್ತಾರೆ.

ಈ ವಿಶಿಷ್ಟ ಪ್ರಾಣಿಯ ಸಂಖ್ಯೆ ಕೇವಲ 30 ವರ್ಷಗಳಲ್ಲಿ ಸುಮಾರು 40 ಶೇಕಡದಷ್ಟು ಕಡಿಮೆಯಾಗಿದೆ. ಜಾಗತಿಕ ಅಳಿವಿನಂಚಿನಲ್ಲಿರುವ ಜೀವಿಗಳ ಅಧಿಕೃತ ಪಟ್ಟಿಗೆ ಜಿರಾಫೆಯನ್ನೂ ವಿಜ್ಞಾನಿಗಳು ಸೇರಿಸಿದ್ದಾರೆ.

1985ರಲ್ಲಿ 1,51,000ದಿಂದ 1,63,000ದವರೆಗೆ ಜಿರಾಫೆಗಳಿದ್ದವು. ಆದರೆ, 2015ರಲ್ಲಿ ಈ ಸಂಖ್ಯೆ 97,562ಕ್ಕೆ ಇಳಿದಿದೆ ಎಂದು ಅಂತಾರಾಷ್ಟ್ರೀಯ ಪರಿಸರ ಸಂರಕ್ಷಣೆ ಒಕ್ಕೂಟ (ಐಯುಸಿಎನ್) ಎಂಬ ಸಂಘಟನೆ ಹೇಳಿದೆ.

ಮೆಕ್ಸಿಕೊದಲ್ಲಿ ಬುಧವಾರ ನಡೆದ ಜೀವವೈವಿಧ್ಯ ಸಮಾವೇಶದಲ್ಲಿ, ಐಯುಸಿಎನ್ ತನ್ನ ಸಂಚಕಾರಕ್ಕೊಳಗಾದ ಜೀವಿಗಳ ‘ಕೆಂಪು ಪಟ್ಟಿ’ಯಲ್ಲಿ 35 ಜೀವಿಗಳ ಬೆದರಿಕೆ ಮಟ್ಟವನ್ನು ಹೆಚ್ಚಿಸಿದೆ ಹಾಗೂ ಏಳು ಜೀವಿಗಳ ಬೆದರಿಕೆ ಮಟ್ಟವನ್ನು ತಗ್ಗಿಸಿದೆ.

ಈ ವರ್ಷದ ಪಟ್ಟಿಯಲ್ಲಿ ಸ್ಥಿತಿಗತಿ ಬದಲಾದ ಏಕೈಕ ಸಸ್ತನಿ ಜಿರಾಫೆಯಾಗಿದೆ. ಜಿರಾಫೆಗಳ ಅಳಿವಿಗೆ ಅವುಗಳ ವಾಸಸ್ಥಾನಗಳ ನಾಶವೇ ಕಾರಣ ಎಂದು ವಿಜ್ಞಾನಿಗಳು ಹೇಳುತ್ತಾರೆ.

ನಾಳಿನ ನೊಬೆಲ್ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮಕ್ಕೆ ಬಾಬ್ ಡೈಲಾನ್ ಗೈರು

ನುಂಗಲೂ ಆಗದ, ಉಗಿಯಲು ಆಗದ ಬಿಸಿ ತುಪ್ಪವಾದ ರಾಕ್ ಗಾಯಕ

ಸ್ಟಾಕ್‌ಹೋಮ್ (ಸ್ವೀಡನ್), ಡಿ. 8: ಈ ವರ್ಷ ಸಾಹಿತ್ಯಕ್ಕಾಗಿ ನೊಬೆಲ್ ಪ್ರಶಸ್ತಿ ಪಡೆದಿರುವ ರಾಕ್ ಗಾಯಕ ಬಾಬ್ ಡೈಲಾನ್ ನೊಬೆಲ್ ಪ್ರಶಸ್ತಿ ಸಮಿತಿಗೆ ಕೊನೆಗೂ ಸವಾಲಾಗಿಯೇ ಉಳಿದಿದ್ದಾರೆ.

ಈ ಒಲ್ಲದ ವ್ಯಕ್ತಿಗೆ ಪ್ರಶಸ್ತಿ ಕೊಟ್ಟು ತಾನು ತಪ್ಪು ಮಾಡಿದ್ದೇನೆಯೇ ಎಂಬುದಾಗಿ ನೊಬೆಲ್ ಸಮಿತಿ ಗಂಭೀರವಾಗಿ ಯೋಚಿಸುವಂತಾಗಿದೆ. ಮುಂದಿನ ವರ್ಷಗಳಲ್ಲಿ ಆಯ್ಕೆ ನಿಯಮಾವಳಿಗಳ ಬದಲಾವಣೆಗೂ ಈ ಘಟನೆ ಕಾರಣವಾದರೆ ಅಚ್ಚರಿಯಿಲ್ಲ.

ಸ್ಟಾಕ್‌ಹೋಮ್‌ನಲ್ಲಿ ಶನಿವಾರ ನಡೆಯಲಿರುವ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮದಲ್ಲಿ ಭಾಗವಹಿಸದಿರಲು ಅಮೆರಿಕದ ಜನಪ್ರಿಯ ಗಾಯಕ ನಿರ್ಧರಿಸಿದ್ದಾರೆ.

ಸಾಹಿತ್ಯ, ವೈದ್ಯಕೀಯ, ಭೌತಶಾಸ್ತ್ರ, ರಸಾಯನಶಾಸ್ತ್ರ ಮತ್ತು ಅರ್ಥಶಾಸ್ತ್ರ ನೊಬೆಲ್ ಪ್ರಶಸ್ತಿಗಳ ವಿತರಣೆ ಕಾರ್ಯಕ್ರಮ ಸಾಂಪ್ರದಾಯಿಕವಾಗಿ ಡಿಸೆಂಬರ್ 10ರಂದು ಸ್ಟಾಕ್‌ಹೋಮ್‌ನಲ್ಲಿ ನಡೆಯುತ್ತದೆ. ಆದರೆ, ಸಾಹಿತ್ಯ ನೊಬೆಲ್ ಪಡೆದ ಪ್ರಥಮ ಗೀತೆ ರಚನೆಕಾರ ಈ ಬಾರಿ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮಕ್ಕೆ ಹಾಜರಾಗುವುದಿಲ್ಲ. ‘ಪೂರ್ವನಿಗದಿತ ಕಾರ್ಯಕ್ರಮ’ಗಳಿಂದಾಗಿ ತನಗೆ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಸಾಧ್ಯವಾಗುತ್ತಿಲ್ಲ ಎಂಬ ಸೂಚನೆಯನ್ನು ಅವರು ನೀಡಿದ್ದಾರೆ.

 ಅಕ್ಟೋಬರ್ 14ರಂದು ಪ್ರಶಸ್ತಿ ಘೋಷಣೆಯಾದಂದಿನಿಂದಲೂ ಡೈಲಾನ್ ಆಸಕ್ತಿರಹಿತರಾಗಿಯೇ ವರ್ತಿಸಿದ್ದರು. ಪ್ರಶಸ್ತಿ ಘೋಷಣೆಯ ಬಗ್ಗೆ ಸಾರ್ವಜನಿಕವಾಗಿ ಪ್ರತಿಕ್ರಿಯಿಸಲು ಅವರು ಹಲವು ವಾರಗಳ ಕಾಲ ನಿರಾಕರಿಸಿದ್ದರು.

ಇದರಿಂದ ಬೇಸತ್ತ ಸ್ವೀಡಿಶ್ ಅಕಾಡೆಮಿಯ ಸದಸ್ಯರೊಬ್ಬರು, 75 ವರ್ಷದ ಡೈಲಾನ್‌ರನ್ನು ‘‘ಅವಿನಯಿ ಮತ್ತು ಅಹಂಕಾರಿ’’ ಎಂಬುದಾಗಿ ಬಣ್ಣಿಸಿದ್ದರು.