ಆಸ್ಟ್ರೇಲಿಯ ಬೃಹತ್ ಮೊತ್ತ: ಭಾರತಕ್ಕೆ ಶ್ರೇಯಸ್ ಅಯ್ಯರ್ ಆಸರೆ

   ಮುಂಬೈ, ಫೆ.18: ಆಸ್ಟ್ರೇಲಿಯ ವಿರುದ್ಧ ಇಲ್ಲಿ ನಡೆಯುತ್ತಿರುವ ತ್ರಿದಿನ ಅಭ್ಯಾಸ ಪಂದ್ಯದಲ್ಲಿ ಆರಂಭಿಕ ಕುಸಿತ ಕಂಡಿರುವ ಭಾರತ ‘ಎ’ ತಂಡಕ್ಕೆ ಶ್ರೇಯಸ್ ಅಯ್ಯರ್(ಅಜೇಯ 85 ರನ್)ಆಸರೆಯಾಗಿದ್ದಾರೆ. ಆಸ್ಟ್ರೇಲಿಯದ ಮೊದಲ ಇನಿಂಗ್ಸ್ ಮೊತ್ತ 469 ರನ್‌ಗೆ ಉತ್ತರಿಸಹೊರಟಿರುವ ಭಾರತ ಅಭ್ಯಾಸ ಪಂದ್ಯದ ಎರಡನೆ ದಿನದಾಟದ ಅಂತ್ಯಕ್ಕೆ 4 ವಿಕೆಟ್‌ಗಳ ನಷ್ಟಕ್ಕೆ 176 ರನ್ ಗಳಿಸಿದೆ.

ಕೆಲವು ವರ್ಷಗಳಿಂದ ಭಾರತ ತಂಡದ ಕದ ತಟ್ಟುತ್ತಿರುವ ಮುಂಬೈ ಬ್ಯಾಟ್ಸ್‌ಮನ್ ಅಯ್ಯರ್ 93 ಎಸೆತಗಳಲ್ಲಿ 7 ಬೌಂಡರಿ ಹಾಗೂ 5 ಸಿಕ್ಸರ್‌ಗಳನ್ನು ಸಿಡಿಸಿ ಅಜೇಯವಾಗುಳಿದರು. ತಾನೆದುರಿಸಿದ ಮೊದಲ ಎಸೆತವನ್ನೇ ಸಿಕ್ಸರ್‌ಗೆ ಅಟ್ಟಿದ ಅಯ್ಯರ್ ಎದುರಾಳಿ ಆಸ್ಟ್ರೇಲಿಯ ಬೌಲರ್‌ಗಳನ್ನು ದಿಟ್ಟವಾಗಿ ಎದುರಿಸಿದರು.

ಅಯ್ಯರ್ 44 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ಬೆನ್ನಿಗೇ ಸ್ಪಿನ್ನರ್ ಲಿನ್ ಕ್ಯಾಚ್ ಕೈಚೆಲ್ಲಿದ್ದರು. ಇನ್ನುಳಿದಂತೆ ಆಸೀಸ್‌ನ ಅವಳಿ ಸ್ಪಿನ್ನರ್‌ಗಳಾದ ಲಿಯೊನ್ ಹಾಗೂ ಸ್ಟೀಫನ್ ಓ’ಕೀಫೆ ವಿರುದ್ಧ ಚೆನ್ನಾಗಿ ಆಡಿದರು. ಲಿಯೊನ್ ಬೌಲಿಂಗ್‌ನಲ್ಲಿ 3 ಸಿಕ್ಸರ್ ಸಿಡಿಸಿದ ಅಯ್ಯರ್ ಅವರು ಓ’ಕೀಫೆ ಎಸೆತವನ್ನು ಸಿಕ್ಸರ್‌ಗೆ ಅಟ್ಟಿದ್ದರು.

38ನೆ ಪ್ರಥಮ ದರ್ಜೆ ಪಂದ್ಯವನ್ನಾಡುತ್ತಿರುವ ಅಯ್ಯರ್‌ಗೆ 9ನೆ ಶತಕ ಪೂರೈಸಲು ಇನ್ನು 15 ರನ್ ಅಗತ್ಯವಿದೆ. ಭಾರತ ಎ ತಂಡದ ಪರ ಅಯ್ಯರ್ ಹೊರತುಪಡಿಸಿದರೆ ಆರಂಭಿಕ ಆಟಗಾರ ಪ್ರಿಯಾಂಕ್ ಪಾಂಚಾಲ್(36 ರನ್, 62 ಎಸೆತ) ಒಂದಷ್ಟು ಪ್ರತಿರೋಧ ಒಡ್ಡಿದರು. 48 ನಿಮಿಷಗಳ ಕಾಲ ಕ್ರೀಸ್‌ನಲ್ಲಿದ್ದ ಇನ್ನೋರ್ವ ಆರಂಭಿಕ ಆಟಗಾರ ಅಖಿಲ್ ಹೆರ್ವಾಡ್ಕರ್(4) 36 ಎಸೆತಗಳಲ್ಲಿ ಕೇವಲ 4 ರನ್ ಗಳಿಸಿ ಲಿಯೊನ್‌ಗೆ ವಿಕೆಟ್ ಒಪ್ಪಿಸಿದರು.

 ಅಂಕಿತ್ ಭಾವ್ನೆ 48 ಎಸೆತಗಳಲ್ಲಿ 4 ಬೌಂಡರಿಗಳಿದ್ದ 25 ರನ್ ಗಳಿಸಿ ಬರ್ಡ್ ಬೀಸಿದ ಎಲ್‌ಬಿಡಬ್ಲು ಬಲೆಗೆ ಬಿದ್ದರು. ನಾಯಕ ಹಾರ್ದಿಕ್ ಪಾಂಡ್ಯ 19ರನ್ ಗಳಿಸಲಷ್ಟೇ ಶಕ್ತವಾಗಿ ಬರ್ಡ್‌ಗೆ 2ನೆ ಬಲಿಯಾದರು.

 ಭಾರತ ಇಬ್ಬರು ಓಪನರ್‌ಗಳನ್ನು 63 ರನ್‌ಗೆ ಕಳೆದುಕೊಂಡಾಗ ಜೊತೆಯಾದ ಐಯ್ಯರ್ ಹಾಗೂ ಭಾವ್ನೆ 3ನೆ ವಿಕೆಟ್‌ಗೆ 57 ರನ್ ಜೊತೆಯಾಟ ನಡೆಸಿದರು.

ಆಸ್ಟ್ರೇಲಿಯ 469/7 ಡಿಕ್ಲೇರ್: ಇದಕ್ಕೆ ಮೊದಲು 5 ವಿಕೆಟ್ ನಷ್ಟಕ್ಕೆ 327 ರನ್‌ನಿಂದ ಬ್ಯಾಟಿಂಗ್ ಮುಂದುವರಿಸಿದ ಆಸ್ಟ್ರೇಲಿಯ ತಂಡ 7 ವಿಕೆಟ್ ನಷ್ಟಕ್ಕೆ 469 ರನ್ ಗಳಿಸಿ ಇನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿತು.

200 ನಿಮಿಷ ಕ್ರೀಸ್‌ನಲ್ಲಿದ್ದ ಮಿಚೆಲ್ ಮಾರ್ಷ್(75 ರನ್)159 ಎಸೆತಗಳಲ್ಲಿ 11 ಬೌಂಡರಿ, 1 ಸಿಕ್ಸರ್ ಬಾರಿಸಿದರು. ವಿಕೆಟ್‌ಕೀಪರ್-ಬ್ಯಾಟ್ಸ್‌ಮನ್ ಮ್ಯಾಥ್ಯೂಸ್ ವೇಡ್ 161 ನಿಮಿಷಗಳ ಬ್ಯಾಟಿಂಗ್‌ನಲ್ಲಿ 89 ಎಸೆತಗಳನ್ನು ಎದುರಿಸಿ 9 ಬೌಂಡರಿಗಳನ್ನು ಬಾರಿಸಿದ್ದಾರೆ. ಮಾರ್ಷ್ ಎಡಗೈ ಸ್ಪಿನ್ನರ್ ಶಹಬಾಝ್ ನದೀಮ್‌ಗೆ ಔಟಾದ ಬಳಿಕ ಆಸ್ಟ್ರೇಲಿಯ ಮೊದಲ ಇನಿಂಗ್ಸ್ ಡಿಕ್ಲೇರ್ ಮಾಡಿತು.

ಮೊದಲ ದಿನದಾಟವಾದ ಶುಕ್ರವಾರ ನಾಯಕ ಸ್ಟೀವ್ ಸ್ಮಿತ್ ಹಾಗೂ ಶಾನ್ ಮಾರ್ಷ್ ಶತಕ ಬಾರಿಸಿ ಗಮನ ಸೆಳೆದಿದ್ದರು. 2ನೆ ದಿನವಾದ ಶನಿವಾರ ಮಿಚೆಲ್ ಮಾರ್ಷ್ ಹಾಗೂ ವೇಡ್ ಆತಿಥೇಯ ಬೌಲರ್‌ಗಳನ್ನು ಚೆನ್ನಾಗಿ ದಂಡಿಸಿದರು.

ಸಂಕ್ಷಿಪ್ತ ಸ್ಕೋರ್

ಆಸ್ಟ್ರೇಲಿಯ ಪ್ರಥಮ ಇನಿಂಗ್ಸ್: 469/7 ಡಿಕ್ಲೇರ್

(ಸ್ಟೀವನ್ ಸ್ಮಿತ್ 107, ಶಾನ್ ಮಾರ್ಷ್ 104, ಮಿಚೆಲ್ ಮಾರ್ಷ್ 75, ವೇಡ್ 64, ಹ್ಯಾಂಡ್ಸ್‌ಕಾಂಬ್ 45, ಸೈನಿ 2-42)

ಭಾರತ ‘ಎ’ ಪ್ರಥಮ ಇನಿಂಗ್ಸ್: 176/4

(ಶ್ರೇಯಸ್ ಅಯ್ಯರ್ ಅಜೇಯ 85, ಪಾಂಚಾಲ್ 36, ಭಾವ್ನೆ 25, ಜಾಕ್ ಬರ್ಡ್ 2-15, ಲಿಯೊನ್ 2-72)

ವೇಡ್,ವಾರ್ನರ್‌ರಿಂದ ಕೆರಳಿಸಲು ಯತ್ನ: ಅಯ್ಯರ್

 ಮುಂಬೈ,ಫೆ.18: ಆಸ್ಟ್ರೇಲಿಯ ವಿರುದ್ಧದ ಅಭ್ಯಾಸ ಪಂದ್ಯದಲ್ಲಿ ತಾನು ಬ್ಯಾಟಿಂಗ್ ಮಾಡುತ್ತಿದ್ದಾಗ ವಿಕೆಟ್‌ಕೀಪರ್ ಮ್ಯಾಥ್ಯೂ ವೇಡ್ ಹಾಗೂ ಉಪ ನಾಯಕ ಡೇವಿಡ್ ವಾರ್ನರ್ ಕೆರಳಿಸಲು ಯತ್ನ ನಡೆಸಿದ್ದರು. ಆದರೆ ನಾನು ಅದನ್ನು ಗಂಭೀರವಾಗಿ ತೆಗೆದುಕೊಳ್ಳದೆ ಬ್ಯಾಟಿಂಗ್ ಮಂದುವರಿಸಿದೆ ಎಂದು ಶ್ರೇಯಸ್ ಐಯ್ಯರ್ ಹೇಳಿದ್ದಾರೆ.

ಈ ಆಟಗಾರನಿಗೆ ರಕ್ಷಣಾತ್ಮಕವಾಗಿ ಆಡಲು ಗೊತ್ತಿಲ್ಲ. ಕೇವಲ ಆಕ್ರಮಣಕಾರಿ ಹೊಡೆತ ಬಾರಿಸಲು ಮುಂದಾಗುತ್ತಾನೆ ಎಂದು ಹೇಳುವ ಮೂಲಕ ತನ್ನನ್ನು ಕೆರಳಿಸಲು ಯತ್ನಿಸಿದರು. ಮೊದಲಿಗೆ ವೇಡ್ ಕೆರಳಿಸಿದರೆ, ವೇಡ್‌ರೊಂದಿಗೆ ವಾರ್ನರ್ ಕೂಡ ಸೇರಿಕೊಂಡರು. ಭಾರತ ಎ ತಂಡದೊಂದಿಗೆ ಆಸ್ಟ್ರೇಲಿಯ ಪ್ರವಾಸಕೈಗೊಂಡಿದ್ದಾಗ ನಾನು ಇಂತಹ ಸ್ಲೆಡ್ಜಿಂಗ್‌ನ್ನು ಎದುರಿಸಿದ್ದೆ’’ ಎಂದು ಅಯ್ಯರ್ ನುಡಿದರು.