ಕ್ಷಿಪಣಿ ದಾಳಿಯಿಂದ ಅತ್ಯಂತ ಗಂಭೀರ ಪರಿಣಾಮ : ಅಮೆರಿಕಕ್ಕೆ ರಶ್ಯ ಎಚ್ಚರಿಕೆ

ಮಾಸ್ಕೊ, ಎ. 8: ಸಿರಿಯದ ವಾಯು ನೆಲೆಯ ಮೇಲೆ ಅಮೆರಿಕ ನಡೆಸಿದ ಕ್ಷಿಪಣಿ ದಾಳಿಯು ‘ಅತ್ಯಂತ ಗಂಭೀರ’ ಪರಿಣಾಮಗಳಿಗೆ ಕಾರಣವಾಗಬಹುದಾಗಿದೆ ಎಂದು ರಶ್ಯ ಶುಕ್ರವಾರ ಎಚ್ಚರಿಸಿದೆ.

ಡೊನಾಲ್ಡ್ ಟ್ರಂಪ್ ಅಮೆರಿಕದ ಅಧ್ಯಕ್ಷರಾಗಿ ವಿದೇಶಿ ಸಂಘರ್ಷವೊಂದರಲ್ಲಿ ನಡೆಸಿರುವ ಪ್ರಥಮ ಹಸ್ತಕ್ಷೇಪವು ರಶ್ಯ ಮತ್ತು ಅಮೆರಿಕಗಳ ನಡುವೆ ಬಿಕ್ಕಟ್ಟಿಗೆ ಕಾರಣವಾಗಿದೆ.

ಅಮೆರಿಕದ ಯುದ್ಧ ನೌಕೆಗಳಾದ ಯುಎಸ್‌ಎಸ್ ಪೋರ್ಟರ್ ಮತ್ತು ಯುಎಸ್‌ಎಸ್ ರಾಸ್ ಮೆಡಿಟರೇನಿಯನ್ ಸಮುದ್ರದಿಂದ ಶಾಯ್‌ರಾತ್ ವಾಯುನೆಲೆಯ ಮೇಲೆ ‘ಟಾಮ್‌ಹಾಕ್’ ಕ್ಷಿಪಣಿಗಳ ಸುರಿಮಳೆಗೈದಿದ್ದವು. ಸಿರಿಯದ ಈ ವಾಯುನೆಲೆಯಿಂದಲೇ ಸಿರಿಯದ ಸೇನೆ ಖಾನ್ ಶೇಖೂನ್ ಪಟ್ಟಣದಲ್ಲಿ ನಾಗರಿಕರ ಮೇಲೆ ರಾಸಾಯನಿಕ ದಾಳಿ ನಡೆಸಿತ್ತು ಎಂದು ಅಮೆರಿಕ ಆರೋಪಿಸಿದೆ.

ಸಿರಿಯದ ಅಧ್ಯಕ್ಷ ಬಶರ್ ಅಲ್ ಅಸದ್ ಸರಕಾರ ತನ್ನದೇ ನಾಗರಿಕರ ಮೇಲೆ ರಾಸಾಯನಿಕ ಅಸ್ತ್ರಗಳನ್ನು ಪ್ರಯೋಗಿಸಿದ ಹಿನ್ನೆಲೆಯಲ್ಲಿ ತಾನು ಕ್ಷಿಪಣಿ ದಾಳಿ ನಡೆಸಬೇಕಾಯಿತು ಎಂದು ಅಮೆರಿಕ ಹೇಳಿದೆ.

ರಾಸಾಯನಿಕ ದಾಳಿಯಲ್ಲಿ 80ಕ್ಕೂ ಅಧಿಕ ಮಂದಿ ಪ್ರಾಣಕಳೆದುಕೊಂಡಿದ್ದಾರೆ.ದಾಳಿಯನ್ನು ತಾನು ನಡೆಸಿಲ್ಲ ಎಂದು ಸಿರಿಯ ಹೇಳಿಕೊಂಡಿದೆ.

‘‘ಅಮೆರಿಕದ ಕಾನೂನುಬಾಹಿರ ಕೃತ್ಯಗಳನ್ನು ನಾವು ಬಲವಾಗಿ ಖಂಡಿಸುತ್ತೇವೆ. ಪ್ರಾದೇಶಿಕ ಮತ್ತು ಅಂತಾರಾಷ್ಟ್ರೀಯ ಸ್ಥಿರತೆಯ ಮೇಲೆ ಇದು ಬೀರುವ ಪರಿಣಾಮಗಳು ಅತ್ಯಂತ ಗಂಭೀರವಾಗಿರುತ್ತವೆ’’ ಎಂದು ವಿಶ್ವಸಂಸ್ಥೆಗೆ ರಶ್ಯದ ಉಪರಾಯಭಾರಿ ವ್ಲಾದಿಮಿರ್ ಸಫ್ರೊಂಕೊವ್ ಶುಕ್ರವಾರ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ ಹೇಳಿದರು.

ಅಮೆರಿಕದ ದಾಳಿಗಳು ರಶ್ಯ ಸೇನೆಯೊಂದಿಗೆ ಸಂಘರ್ಷ ನಡೆಸುವುದರಿಂದ ಕೇವಲ ಒಂದು ಹೆಜ್ಜೆ ದೂರವಿತ್ತು ಎಂದು ರಶ್ಯದ ಪ್ರಧಾನಿ ಡಿಮಿಟ್ರಿ ಮೆಡ್ವೆಡೆವ್ ಆರೋಪಿಸಿದ್ದಾರೆ.

ಅಮೆರಿಕದ ಪಡೆಗಳು ಕ್ಷಿಪಣಿ ದಾಳಿಗೆ ಮುನ್ನ ರಶ್ಯಕ್ಕೆ ಮಾಹಿತಿ ನೀಡಿದ್ದವು. ಹಾಗಾಗಿ, ರಶ್ಯದ ಸೈನಿಕರೊಂದಿಗೆ ಅಮೆರಿಕ ಮುಖಾಮುಖಿಯಾಗುವುದು ತಪ್ಪಿತ್ತು.

ಇನ್ನೂ ಹೆಚ್ಚಿನ ಕ್ರಮಕ್ಕೆ ಸಿದ್ಧ: ಹೇಲಿ
ಸಿರಿಯದಲ್ಲಿ ಅಗತ್ಯ ಬಿದ್ದರೆ ಇನ್ನೂ ಹೆಚ್ಚಿನ ಕ್ರಮಗಳನ್ನು ತೆಗೆದುಕೊಳ್ಳಲು ಅಮೆರಿಕ ಸಿದ್ಧ ಎಂದು ವಿಶ್ವಸಂಸ್ಥೆಗೆ ಅಮೆರಿಕದ ರಾಯಭಾರಿ ನಿಕ್ಕಿ ಹೇಲಿ ಶುಕ್ರವಾರ ಹೇಳಿದ್ದಾರೆ.
‘‘ಇನ್ನೂ ಹೆಚ್ಚಿನ ಕ್ರಮಕ್ಕೆ ನಾವು ಸಿದ್ಧರಿದ್ದೇವೆ, ಆದರೆ, ಅದರ ಅಗತ್ಯ ಬೀಳುವುದಿಲ್ಲ ಎಂದು ನಾವು ಭಾವಿಸಿದ್ದೇವೆ’’ ಎಂದು ಅವರು ವಿಶ್ವಸಂಸ್ಥೆಯ ಭದ್ರತಾ ಸಮಿತಿಗೆ ತಿಳಿಸಿದರು.