ಟ್ಯಾಂಕ್ ಗೆ ಪೆಟ್ರೋಲ್ ತುಂಬಿಸಿದ ಬೈಕ್ ಸವಾರ ನಂತರ ಎಸಗಿದ ಅನಾಹುತವೇನು ಗೊತ್ತೇ?

ಚೀನಾ, ಮೇ 27: ಗ್ಯಾಸ್ ಸ್ಟೇಷನ್ ನಲ್ಲಿ ಬೈಕ್ ಗೆ ತೈಲ ತುಂಬಿಸಿದ ವ್ಯಕ್ತಿಯೊಬ್ಬ ಪೆಟ್ರೋಲ್ ಟ್ಯಾಂಕ್ ಗೆ ಬೆಂಕಿ ಹಚ್ಚಿ, ತಾನೂ ಆತ್ಮಹತ್ಯೆ ಮಾಡಿಕೊಳ್ಳಲು ಯತ್ನಿಸಿದ ವಿಲಕ್ಷಣ ಘಟನೆ ಚೀನಾದಲ್ಲಿ ನಡೆದಿದೆ. ಸಿಸಿ ಕ್ಯಾಮರಾದಲ್ಲಿ ಸೆರೆಯಾದ  ಈ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಅನಾಹುತದ ಸಂದರ್ಭ ಸಾಹಸ ಮೆರೆದ ಗ್ಯಾಸ್ ಸ್ಟೇಷನ್ ಸಿಬ್ಬಂದಿಯ ಬಗ್ಗೆ ವ್ಯಾಪಕ ಪ್ರಶಂಸೆಗಳು ವ್ಯಕ್ತವಾಗುತ್ತಿದೆ.

ಚೀನಾದ ಸಿಚುವಾನ್ ಪ್ರಾಂತ್ಯದ ಯಿಬಿನ್ ಎಂಬಲ್ಲಿ ಈ ಘಟನೆ ನಡೆದಿದ್ದು, ಸ್ಟೇಷನ್ ಗೆ ಬಂದ ಬೈಕ್ ಸವಾರನೊಬ್ಬ ಪೆಟ್ರೋಲ್ ತುಂಬಿಸಿದ ನಂತರ ಟ್ಯಾಂಕ್ ಗೆ ಬೆಂಕಿ ಹಚ್ಚಿದ್ದಾನೆ. ಕೂಡಲೇ ಎಚ್ಚೆತ್ತ ಗ್ಯಾಸ್ ಸ್ಟೇಷನ್ ನ ಸಿಬ್ಬಂದಿಯೋರ್ವರು ಬೆಂಕಿ ನಂದಿಸುವ ಸಾಧನದಿಂದ ಪರಿಸ್ಥಿತಿಯನ್ನು ಹತೋಟಿಗೆ ತರಲು ಯತ್ನಿಸಿದ್ದಾರೆ. ಬೆಂಕಿಯ ಕೆನ್ನಾಲಿಗೆ ವ್ಯಾಪಿಸುತ್ತಾ ಹೋಗಿದ್ದು, ಗ್ಯಾಸ್ ಸ್ಟೇಷನ್ ನಲ್ಲಿದ್ದ ಎಲ್ಲಾ ಸಿಬ್ಬಂದಿ ಬೆಂಕಿ ನಂದಿಸಲು ಪ್ರಯತ್ನಿಸಿದ್ದಾರೆ.

ಇದೇ ಸಂದರ್ಭ ಅಲ್ಲೇ ನಿಂತಿದ್ದ ಬೆಂಕಿ ಹಚ್ಚಿದ ವ್ಯಕ್ತಿ ಹೊತ್ತಿ ಉರಿಯುತ್ತಿರುವ ಬೈಕ್ ನ ಜ್ವಾಲೆಗೆ ಹಾರಿದ್ದಾನೆ. ಆತನನ್ನು ಬೆಂಕಿಯಿಂದ ಹೊರಗೆಳೆದ ಸಿಬ್ಬಂದಿ ಬೆಂಕಿ ನಂದಿಸುವಲ್ಲೂ ಸಫಲರಾಗಿದ್ದಾರೆ. ಸಂಭವಿಸಲಿದ್ದ ದೊಡ್ಡ ಅಪಾಯವೊಂದನ್ನು ತಪ್ಪಿಸಿದ ಗ್ಯಾಸ್ ಸ್ಟೇಷನ್ ಸಿಬ್ಬಂದಿಯ ಸಾಹಸಕ್ಕೆ ವ್ಯಾಪಕ ಪ್ರಶಂಸೆ ವ್ಯಕ್ತವಾಗುತ್ತಿದ್ದು, ಸಿಬ್ಬಂದಿಗೆ 65 ಸಾವಿರ ಯುವಾನ್ (6,11,000 ರೂ,) ಬಹುಮಾನ ನೀಡಲಾಗಿದೆ.

Full View