ಅಸೈಗೋಳಿ: ಕಳಪೆ ರಸ್ತೆ ಕಾಮಗಾರಿ ಆರೋಪ:ಕಾಂಕ್ರೀಟ್ ರಸ್ತೆ ಮೇಲೆ ಮತ್ತೆ ಕಾಂಕ್ರೀಟು ತೇಪೆ!

ಕೊಣಾಜೆ, ಮೇ 31: ಕೊಣಾಜೆ ಗ್ರಾಮ ಪಂ. ವ್ಯಾಪ್ತಿಯ ಅಸೈಗೋಳಿ ಬಳಿ ಕಾಂಕ್ರೀಟ್ ಕಾಮಗಾರಿ ಕಳಪೆಯಾಗಿ ಮಾಡಲಾಗಿದೆ ಎನ್ನುವ ಆಕ್ಷೇಪದ ಹಿನ್ನೆಲೆಯಲ್ಲಿ  ಕಾಂಕ್ರೀಟ್ ರಸ್ತೆಯ ಮೇಲೆ ಎರಡನೇ ಭಾರಿ ಕಾಂಕ್ರೀಟ್ ತೇಪೆ ಹಾಕುವ ಕೆಲಸ ನಡೆದಿದೆ.
   

ಕೊಣಾಜೆ ಗ್ರಾಮ ಪಂ. ಅಸೈಗೋಳಿಯಲ್ಲಿ ಎಸ್ಸಿ-ಎಸ್ಟಿ ಕಾಲನಿಗೆ ಐದು ತಿಂಗಳ ಹಿಂದೆ ಎಂಟು ಲಕ್ಷ ರೂ. ವೆಚ್ಚದಲ್ಲಿ 160 ಮೀಟರ್ ಕಾಂಕ್ರೀಟ್ ಕಾಮಗಾರಿ ನಡೆಸಲಾಗಿತ್ತು. ಆದರೆ ಗುತ್ತಿಗೆದಾರ ಕಳಪೆಯಾಗಿ ಕಾಮಗಾರಿ ನಿರ್ವಹಿಸಿದ್ದು ಈ ಬಗ್ಗೆ ಸ್ಥಳೀಯರು ಗ್ರಾಮಸಭೆಯಲ್ಲಿ ಆಕ್ಷೇಪ ಎತ್ತಿದ್ದಲ್ಲದೆ, ಈ ಬಗ್ಗೆ ಇಂಜಿನಿಯರ್‌ಗೂ ದೂರು ನೀಡಿದ್ದರು. ಪರಿಶೀಲನೆ ಬಳಿಕ ಎರಡನೇ ಬಾರಿ ಮೂರು ಇಂಚ್‌ನಲ್ಲಿ ಕಾಂಕ್ರೀಟ್ ಹಾಕುವಂತೆ ಇಂಜಿನಿಯರ್ ಗುತ್ತಿಗೆದಾರನಿಗೆ ಸೂಚಿಸಿದ್ದರು.

ಅದರಂತೆ ಬುಧವಾರ ಎರಡನೇ ಬಾರಿ ಕಾಮಗಾರಿ ಆರಂಭವಾಗಿದೆ. ಈ ಸಂದರ್ಭವೂ ಮೂರು ಇಂಚು ಬದಲು ಎರಡು ಇಂಚಿನಲ್ಲಿ ಕಾಂಕ್ರೀಟ್ ಹಾಕಲಾಗುತ್ತಿದೆ ಎಂದು ಸ್ಥಳೀಯರು ಆಕ್ಷೇಪಿಸಿದರು. ಬಳಿಕ ಮೂರು ಇಂಚಿನಲ್ಲಿ ಕಾಂಕ್ರೀಟ್ ಹಾಕುವಂತೆ ಸ್ಥಳೀಯರು ನೋಡಿಕೊಂಡರು.

ಮಳೆಯ ನಡುವೆಯೂ ಕಾಮಗಾರಿ:
ಗುತ್ತಿಗೆದಾರ ಕಳಪೆ ಕಾಮಗಾರಿ ನಡೆಸಿದ್ದಾರೆ ಎಂಬ ಆರೋಪದಲ್ಲಿ ಕಾಂಕ್ರೀಟ್ ಮೇಲೆ ಮತ್ತೆ ಕಾಂಕ್ರಿಟ್ ಹಾಕುವ ಕೆಲಸ ನಡೆಯುತ್ತಿದ್ದೆಯಾದರೂ ಮಳೆ ಸುರಿಯುತ್ತಿರುವ ನಡೆಯುವ ಕಾಮಗಾರಿ ಮುಂದುವರಿದಿದೆ. ಇದು ಎಷ್ಟರ ಮಟ್ಟಿಗೆ ರಸ್ತೆ ಗಟ್ಟಿಯಾಗಬಹುದು ಮಾತ್ರವಲ್ಲ ಸರಕಾರಿ ಯೋಜನೆಗಳು ಈ ರೀತಿಯಲ್ಲಿ ಹಾದಿ ತಪ್ಪುತ್ತಿರುವ ಬಗ್ಗೆ ಸ್ಥಳೀಯರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಸ್ಥಳೀಯರಾದ ರತ್ನಾಕರ ಕಕ್ಕೆಮಜಲು, ಸನತ್ ಕುಮಾರ್, ಸಂಕಪ್ಪ, ಚೇತನ್ ಕುಮಾರ್, ಶೈಲೇಶ್, ಮನೋಜ್, ರವಿ ದಡಸ್ ಸಹಿತ ಇನ್ನಿತರರು ಉಪಸ್ಥಿತರಿದ್ದರು.

‘ಅಸೈಗೋಳಿಯಲ್ಲಿ ಎಸ್ಸಿ-ಎಸ್ಟಿ ಕಾಲನಿಗೆ ಹಾಕಲಾದ ಕಾಂಕ್ರೀಟ್ ಕಳಪೆಯಾಗಿದೆ ಎನ್ನುವ ದೂರಿನ ಆಧಾರದಲ್ಲಿ ಎರಡನೇ ಬಾರಿ ಕಾಮಗಾರಿ ನಡೆಯುತ್ತಿದೆ, ಪಂ. ನಿಂದ ಎಂಟು ಲಕ್ಷ ರೂ. ಪಾವತಿಯಾಗಿದ್ದು, ಎರಡನೇ ಬಾರಿ ಹಣ ಪಾವತಿಸುವ ನಿಯಮ ಪಂಚಾಯತ್ ನಲ್ಲಿ ಇಲ್ಲ’
ಕೇಶವ ಪೂಜಾರಿ, ಗ್ರಾ.ಪಂ. ಪಿಡಿಒ