ಅಮೆರಿಕದ ಗ್ವಾಮ್ ಭೂಭಾಗದ ಮೇಲೆ ದಾಳಿ: ಉತ್ತರ ಕೊರಿಯ ಎಚ್ಚರಿಕೆ

ವಾಶಿಂಗ್ಟನ್, ಆ. 9: ಇನ್ನು ಮುಂದೆ ಉತ್ತರ ಕೊರಿಯದ ಬೆದರಿಕೆಗಳಿಗೆ ಅಮೆರಿಕವು ‘‘ಆಕ್ರೋಶಭರಿತ’’ವಾಗಿ ಪ್ರತಿಕ್ರಿಯಿಸುವುದು ಎಂಬ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ರ ಎಚ್ಚರಿಕೆಗೆ ಉತ್ತರ ಕೊರಿಯ ಅಷ್ಟೇ ತೀವ್ರವಾಗಿ ಪ್ರತಿಕ್ರಿಯಿಸಿದೆ. ಪೆಸಿಫಿಕ್ ಸಾಗರದ ಗ್ವಾಮ್ ದ್ವೀಪದಲ್ಲಿರುವ ಅಮೆರಿಕದ ಭೂಭಾಗದ ಮೇಲೆ ಕ್ಷಿಪಣಿ ದಾಳಿ ನಡೆಸುವ ಸಾಧ್ಯತೆಯನ್ನು ತಾನು ಪರಿಶೀಲಿಸುತ್ತಿರುವುದಾಗಿ ಉತ್ತರ ಕೊರಿಯ ಹೇಳಿದೆ.

  ‘‘ಗ್ವಾಮ್‌ನಲ್ಲಿರುವ ಅಮೆರಿಕದ ಪ್ರಮುಖ ಸೇನಾ ನೆಲೆಗಳನ್ನು ನಿಯಂತ್ರಿಸುವುದಕ್ಕಾಗಿ ಗ್ವಾಮ್ ಸುತ್ತಮುತ್ತಲಿರುವ ಪ್ರದೇಶಗಳ ಮೇಲೆ ಮಧ್ಯಮದಿಂದ ದೀರ್ಘ ವ್ಯಾಪ್ತಿಯ ‘ಹ್ವಾಸಂಗ್-12’ ಕ್ಷಿಪಣಿಗಳನ್ನು ಹಾರಿಸುವ ಯೋಜನೆಯನ್ನು ಕೊರಿಯನ್ ಪೀಪಲ್ಸ್ ಆರ್ಮಿ (ಕೆಪಿಎ)ಯು ಪರಿಶೀಲಿಸುತ್ತಿದೆ’’ ಎಂದು ಉತ್ತರ ಕೊರಿಯ ಸೇನೆಯ ವಕ್ತಾರರೊಬ್ಬರು ನೀಡಿರುವ ಹೇಳಿಕೆಯೊಂದನ್ನು ದೇಶದ ಸರಕಾರಿ ಸುದ್ದಿ ಸಂಸ್ಥೆಯೊಂದು ಪ್ರಕಟಿಸಿದೆ.

ದೇಶದ ನಾಯಕ ಕಿಮ್ ಜಾಂಗ್ ಉನ್ ನಿರ್ಧರಿಸಿದಾಗ ಯೋಜನೆ ಜಾರಿಗೆ ಬರುವುದು ಎಂದು ವಕ್ತಾರ ತಿಳಿಸಿದರು.

ಗ್ವಾಮ್ ನಿವಾಸಿಗಳ ಕಳವಳ: ಸಮಾಧಾನಿಸಿದ ಗವರ್ನರ್

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಉತ್ತರ ಕೊರಿಯದ ನಡುವೆ ಉದ್ವಿಗ್ನತೆ ಹೆಚ್ಚುತ್ತಿರುವಂತೆಯೇ, ಪೆಸಿಫಿಕ್ ಸಾಗರದಲ್ಲಿರುವ ಅಮೆರಿಕದ ಭೂಭಾಗ ಗ್ವಾಮ್‌ನ ನಿವಾಸಿಗಳು ಭಯಭೀತರಾಗಿದ್ದಾರೆ. 

ಆದರೆ, ತಮ್ಮ ದ್ವೀಪಕ್ಕೆ ಯಾವುದೇ ಬೆದರಿಕೆಯಿಲ್ಲ ಎಂದು ಹೇಳುವ ಮೂಲಕ, ಗವರ್ನರ್ ಎಡ್ಡೀ ಕಾಲ್ವೊ ಜನರನ್ನು ಸಂತೈಸಿದ್ದಾರೆ.

ಟೋಕಿಯೊದಿಂದ ದಕ್ಷಿಣಕ್ಕೆ ಸುಮಾರು 2,400 ಕಿ.ಮೀ. ದೂರದಲ್ಲಿ ಪೆಸಿಫಿಕ್ ಸಾಗರದಲ್ಲಿ ಗ್ವಾಮ್ ಸೇನಾ ನೆಲೆಯಿದೆ. ಇಲ್ಲಿ ಸುಮಾರು 1.62 ಲಕ್ಷ ಜನರು ವಾಸಿಸುತ್ತಿದ್ದಾರೆ.

‘‘ಗ್ವಾಮ್ ಮೇಲಿನ ದಾಳಿ ಅಥವಾ ಬೆದರಿಕೆ ಅಮೆರಿಕದ ಮೇಲಿನ ದಾಳಿ ಅಥವಾ ಬೆದರಿಕೆಯಾಗಿದೆ’’ ಎಂದು ಕಾಲ್ವೊ ಬಣ್ಣಿಸಿದರು.

‘‘ಶ್ವೇತಭವನದ ಅಧಿಕಾರಿಗಳೊಂದಿಗೆ ನಾನು ಮಾತನಾಡಿದ್ದೇನೆ. ಅಮೆರಿಕವನ್ನು ರಕ್ಷಿಸಲಾಗುವುದು ಎಂದು ಅವರು ಹೇಳಿದ್ದಾರೆ’’ ಎಂದರು.