ಸತತ 20ನೇ ಪಂದ್ಯ ಗೆದ್ದ ನಡಾಲ್

ಮ್ಯಾಡ್ರಿಡ್, ಮೇ 10: ಮ್ಯಾಡ್ರಿಡ್ ಓಪನ್ ಟೆನಿಸ್ ಟೂರ್ನಿಯಲ್ಲಿ ವಿಶ್ವದ ನಂ.1 ಆಟಗಾರ ರಫೆಲ್ ನಡಾಲ್ ಫ್ರಾನ್ಸ್ ನ ಮೊನ್‌ಫಿಲ್ಸ್ ವಿರುದ್ಧ ನೇರ ಸೆಟ್‌ಗಳಿಂದ ಜಯ ಸಾಧಿಸಿದರು. ಈ ಮೂಲಕ ಆವೆಮಣ್ಣಿನ ಅಂಗಣದಲ್ಲಿ ಸತತ 20ನೇ ಜಯ ಸಾಧಿಸಿದ್ದಾರೆ.

ಮೊದಲ ಸುತ್ತಿನಲ್ಲಿ ಬೈ ಪಡೆದಿದ್ದ ನಡಾಲ್ ಬುಧವಾರ ನಡೆದ ಪುರುಷರ ಸಿಂಗಲ್ಸ್ 2ನೇ ಪಂದ್ಯದಲ್ಲಿ ಮೊನ್‌ಫಿಲ್ಸ್‌ರನ್ನು 6-3, 6-1 ಸೆಟ್‌ಗಳಿಂದ ಸೋಲಿಸಿದ್ದಾರೆ.

 ಇದೇ ವೇಳೆ, ವಿಶ್ವದ ನಂ.2ನೇ ಆಟಗಾರ್ತಿ ಕರೊಲಿನ್ ವೋಝ್ನಿಯಾಕಿ ಹಾಗೂ ಮೂರನೇ ರ್ಯಾಂಕಿನ ಆಟಗಾರ್ತಿ ಗಾರ್ಬೈನ್ ಮುಗುರುಝ ಮ್ಯಾಡ್ರಿಡ್ ಓಪನ್ ಟೆನಿಸ್ ಟೂರ್ನಿಯ ಮೂರನೇ ಸುತ್ತಿನಲ್ಲಿ ಸೋತು ಹೊರ ನಡೆದಿದ್ದಾರೆ. ಡೆನ್ಮಾರ್ಕ್ ನ ವೋಝ್ನಿಯಾಕಿ ವಿಶ್ವದ ನಂ.20ನೇ ಆಟಗಾರ್ತಿ ಕಿಕಿ ಬೆರ್ಟೆನ್ಸ್‌ಗೆ 2-6, 2-6 ಸೆಟ್‌ಗಳಿಂದಲೂ, ವಿಂಬಲ್ಡನ್ ಚಾಂಪಿಯನ್ ಮುಗುರುಝ ಅವರು ಡರಿಯಾ ಕಸಟ್‌ಕಿನಾ ವಿರುದ್ಧ 2-6, 6-4, 3-6 ಸೆಟ್‌ಗಳಿಂದ ಸೋತಿದ್ದಾರೆ. 2016ರ ಫ್ರೆಂಚ್ ಓಪನ್ ಸೆಮಿ ಫೈನಲ್‌ಗೆ ತಲುಪಿರುವ ಬೆರ್ಟೆನ್ಸ್ ಒಂದು ಗಂಟೆ ಕಾಲ ನಡೆದ ಪಂದ್ಯದಲ್ಲಿ 27ರ ಹರೆಯದ ವೋಝ್ನಿಯಾಕಿಯವರನ್ನು ಸೋಲಿಸಿದರು. ಬೆರ್ಟೆನ್ಸ್‌ಗೆ ಶರಣಾಗಿರುವ ವೋಝ್ನಿಯಾಕಿ ವಿಶ್ವದ ನಂ.1 ಸ್ಥಾನಕ್ಕೇರುವ ಕನಸು ಈಡೇರಲಿಲ್ಲ.

ಬೆರ್ಟೆನ್ಸ್ ಮುಂದಿನ ಸುತ್ತಿನಲ್ಲಿ ಐದು ಬಾರಿಯ ಗ್ರಾನ್‌ಸ್ಲಾಮ್ ಚಾಂಪಿಯನ್ ಮರಿಯಾ ಶರಪೋವಾ ಅಥವಾ ಫ್ರಾನ್ಸ್‌ನ ಕ್ರಿಸ್ಟಿನಾ ಮ್ಲಾಡೆನೊವಿಕ್‌ರನ್ನು ಎದುರಿಸಲಿದ್ದಾರೆ. ಆಸ್ಟ್ರೇಲಿಯನ್ ಓಪನ್ ಚಾಂಪಿಯನ್ ವೋಝ್ನಿಯಾಕಿ ಅವರು ಸಿಮೊನಾ ಹಾಲೆಪ್‌ರಿಂದ ನಂ.1 ಸ್ಥಾನ ವಶಪಡಿಸಿಕೊಳ್ಳಲು ಮ್ಯಾಡ್ರಿಡ್ ಓಪನ್ ಪ್ರಶಸ್ತಿಯನ್ನು ಗೆಲ್ಲಬೇಕಾಗಿತ್ತು. ಆದರೆ, ವೋಝ್ನಿಯಾಕಿ ಸೋತಿರುವ ಹಿನ್ನೆಲೆಯಲ್ಲಿ ತನ್ನ ಸ್ಥಾನ ಉಳಿಸಿಕೊಂಡಿದ್ದಾರೆ.

ಎಡ್ಮಂಡ್ ಕ್ವಾರ್ಟರ್ ಫೈನಲ್‌ಗೆ

ಬ್ರಿಟನ್‌ನ ಕೈಲ್ ಎಡ್ಮಂಡ್ ಬೆಲ್ಜಿಯಂನ ಡೇವಿಡ್ ಗಫಿನ್‌ರನ್ನು ಮಣಿಸುವ ಮೂಲಕ ಮ್ಯಾಡ್ರಿಡ್ ಓಪನ್ ಟೆನಿಸ್ ಟೂರ್ನಿಯಲ್ಲಿ ಕ್ವಾರ್ಟರ್ ಫೈನಲ್‌ಗೆ ತಲುಪಿದ್ದಾರೆ. ಗುರುವಾರ ನಡೆದ ಪುರುಷರ ಸಿಂಗಲ್ಸ್‌ನ ಪ್ರಿ-ಕ್ವಾರ್ಟರ್ ಫೈನಲ್‌ನಲ್ಲಿ 23ರ ಹರೆಯದ ಎಡ್ಮಂಡ್ 6-3, 6-3 ಸೆಟ್‌ಗಳ ಅಂತರದಿಂದ ಗಫಿನ್‌ರನ್ನು ಸೋಲಿಸಿದ್ದಾರೆ. ಎಟಿಪಿ ಮಾಸ್ಟರ್ಸ್ ಟೂರ್ನಿಯಲ್ಲಿ ಮೊದಲ ಬಾರಿ ಅಂತಿಮ-8ರ ಹಂತ ತಲುಪಿದ್ದಾರೆ.

ಎಡ್ಮಂಡ್ 2015ರ ಡೇವಿಸ್ ಕಪ್‌ನಲ್ಲಿ ಗಫಿನ್ ವಿರುದ್ಧ 5 ಸೆಟ್‌ಗಳಿಂದ ಸೋತಿದ್ದರು. ಗಫಿನ್ ಕಳೆದ ವರ್ಷ ಫ್ರೆಂಚ್ ಓಪನ್‌ನಲ್ಲಿ ಕ್ವಾರ್ಟರ್ ಫೈನಲ್‌ಗೆ ತಲುಪಿದ್ದರು. ಈ ತಿಂಗಳಾರಂಭದಲ್ಲಿ ಬಾರ್ಸಿಲೋನ ಓಪನ್‌ನಲ್ಲಿ ಸೆಮಿ ಫೈನಲ್‌ಗೆ ಲಗ್ಗೆ ಇಟ್ಟಿದ್ದಾರೆ. ಎಡ್ಮಂಡ್ ಮುಂದಿನ ಸುತ್ತಿನಲ್ಲಿ ಕೆನಡಾದ ಡೆನಿಸ್ ಶಪೋವಲೊವ್ ಅಥವಾ ಮಿಲೊಸ್ ರಾವೊನಿಕ್‌ರನ್ನು ಎದುರಿಸಲಿದ್ದಾರೆ.