ಭಾರತವನ್ನು ಎರಡನೆ ಸ್ತರದ ದೇಶಗಳಲ್ಲಿ ಮುಂದುವರಿಸಿದ ಅಮೆರಿಕಾ

ವಾಷಿಂಗ್ಟನ್,ಜೂ.29: ಭಾರತದಲ್ಲಿ ಮಾನವ ಕಳ್ಳಸಾಗಾಣಿಕೆಯ ಪ್ರಮಾಣಕ್ಕೆ ಹೋಲಿಸಿದರೆ ತನಿಖೆಗಳು,ಕಾನೂನು ಕ್ರಮಗಳು ಮತ್ತು ದೋಷ ನಿರ್ಣಯಗಳು ತುಂಬಾ ಕಡಿಮೆಯಾಗಿವೆ ಎಂದು ಮಾನವ ವ್ಯಾಪಾರ ಕುರಿತು ತನ್ನ ವರದಿಯಲ್ಲಿ ಹೇಳಿರುವ ಅಮೆರಿಕವು,ಭಾರತವನ್ನು ಎರಡನೇ ಸ್ತರದ ದೇಶಗಳ ಗುಂಪಿನಲ್ಲಿ ಮುಂದುವರಿಸಿದೆ.

ಬಲವಂತದ ಮತ್ತು ಜೀತದ ದುಡಿಮೆ ಹಾಗೂ ಅದರಲ್ಲಿ ಅಧಿಕಾರಿಗಳ ಶಾಮೀಲಾತಿ ಸೇರಿದಂತೆ ಎಲ್ಲ ರೂಪಗಳಲ್ಲಿ ಮಾನವ ಕಳ್ಳಸಾಗಾಣಿಕೆಗೆ ಕಡಿವಾಣ ಹಾಕಲು ಕಾನೂನು ಕ್ರಮಗಳು ಮತ್ತು ದೋಷ ನಿರ್ಣಯ ಪ್ರಮಾಣವನ್ನು ಹೆಚ್ಚಿಸುವಂತೆ ಅಮೆರಿಕದ ವಿದೇಶಾಂಗ ಇಲಾಖೆಯು 2018ನೇ ಸಾಲಿಗಾಗಿ ಮಾನವ ಕಳ್ಳಸಾಗಾಣಿಕೆ ಕುರಿತ ತನ್ನ ವರದಿಯಲ್ಲಿ ಭಾರತವನ್ನು ಆಗ್ರಹಿಸಿದೆ.

ಮಾನವ ಕಳ್ಳಸಾಗಾಣಿಕೆಯ ನಿವಾರಣೆಯ ಕನಿಷ್ಠ ಮಾನದಂಡಗಳನ್ನು ಭಾರತವು ಪೂರ್ಣವಾಗಿ ಪೂರೈಸಿಲ್ಲ,ಆದರೂ ಅದು ಆ ನಿಟ್ಟಿನಲ್ಲಿ ಮಹತ್ವದ ಪ್ರಯತ್ನಗಳನ್ನು ಮಾಡುತ್ತಿದೆ. ಹಿಂದಿನ ವರದಿ ಅವಧಿಗೆ ಹೋಲಿಸಿದರೆ ಸರಕಾರವು ಹೆಚ್ಚಿನ ಪ್ರಯತ್ನಗಳನ್ನು ಪ್ರದರ್ಶಿಸುತ್ತಿದೆ, ಆದ್ದರಿಂದ ಭಾರತವು ಎರಡನೇ ಸ್ತರದ ಗುಂಪಿನಲ್ಲಿ ಮುಂದುವರಿದಿದೆ ಎಂದು ವರದಿಯು ತಿಳಿಸಿದೆ.

ಅಮೆರಿಕದ ಮಾನವ ಕಳ್ಳಸಾಗಾಣಿಕೆ ಬಲಿಪಶುಗಳ ರಕ್ಷಣೆ ಕಾಯ್ದೆ-2000ರಲ್ಲಿ ಸೂಚಿಸಿರುವಂತೆ ವಿದೇಶಾಂಗ ಇಲಾಖೆಯು ಪ್ರತಿಯೊಂದು ದೇಶವನ್ನು ನಾಲ್ಕು ಸ್ತರಗಳ ಪೈಕಿ ಒಂದರಲ್ಲಿ ಸೇರಿಸುತ್ತದೆ.

 ಮಾನವ ಕಳ್ಳಸಾಗಾಣಿಕೆಯನ್ನು ತಡೆಯಲು ತನ್ನ ಪ್ರಯತ್ನಗಳನ್ನು ಭಾರತವು ಹೆಚ್ಚಿಸಿದ್ದು,ಇಂತಹ ಪ್ರಕರಣಗಳಲ್ಲಿ ಗುರುತಿಸಲಾದ ಬಲಿಪಶುಗಳ ಸಂಖ್ಯೆ ಮೂರು ಪಟ್ಟು ಹೆಚ್ಚಾಗಿದೆ ಮತ್ತು ಅದು ಸಂತ್ರಸ್ತ ಮಹಿಳೆಯರು ಹಾಗೂ ಮಕ್ಕಳಿಗೆ ಪುನರ್ವಸತಿ ಯೋಜನೆಗಳಿಗಾಗಿ ತನ್ನ ಬಜೆಟ್ ಮೀಸಲಾತಿಯನ್ನು ಹೆಚ್ಚಿಸಿದೆ ಎಂದಿರುವ ವರದಿಯು,ಕರಡು ಮಾನವ ಕಳ್ಳಸಾಗಾಣಿಕೆ ನಿಗ್ರಹ ಮಸೂದೆಯ ಚರ್ಚೆಗಾಗಿ ಮತ್ತು ಪರಿಷ್ಕರಣೆಗಾಗಿ 2017ರಲ್ಲಿ ರಚಿಸಲಾಗಿರುವ ಅಂತರ್ ಸಚಿವಾಲಯ ಸಮಿತಿಯನ್ನು ಮತ್ತು ಭಾರತದ ಗಡಿರಕ್ಷಣಾ ಪಡೆಯು ನೇಪಾಳದ ಗಡಿಯಲ್ಲಿ ವಿದ್ಯಾರ್ಥಿಗಳು ಮತ್ತು ಗಡಿ ಪ್ರದೇಶದಲ್ಲಿಯ ಸಮುದಾಯಗಳಿಗಾಗಿ ಮಾನವ ಕಳ್ಳಸಾಗಾಣಿಕೆಯ ಕುರಿತು ಅರಿವು ಮೂಡಿಸಲು ನಡೆಸಿರುವ ಹಲವಾರು ಚಟುವಟಿಕೆಗಳನ್ನು ವರದಿಯು ಬೆಟ್ಟು ಮಾಡಿದೆ.

ಕಳೆದ ಐದು ವರ್ಷಗಳಿಂದ ವರದಿಯಾಗಿರುವಂತೆ ಭಾರತವು ಬಲವಂತದ ದುಡಿಮೆ ಮತ್ತು ವೇಶ್ಯಾವೃತ್ತಿಗೆ ತಳ್ಳಲ್ಪಟ್ಟ ಪುರುಷರು,ಮಹಿಳೆಯರು ಮತ್ತು ಮಕ್ಕಳ ಕಳ್ಳಸಾಗಾಣಿಕೆಯ ಪ್ರಶಸ್ತ ತಾಣವಾಗಿದೆ ಎಂದು ವಿದೇಶಾಂಗ ಇಲಾಖೆ ತನ್ನ ವರದಿಯಲ್ಲಿ ಹೇಳಿದೆ.

 ಬಲವಂತದ ದುಡಿಮೆಯು ಭಾರತದಲ್ಲಿ ಅತ್ಯಂತ ದೊಡ್ಡ ಮಾನವ ಕಳ್ಳಸಾಗಾಣಿಕೆ ಸಮಸ್ಯೆಯಾಗಿದೆ. ಪುರುಷರು,ಮಹಿಳೆಯರು ಮತ್ತು ಮಕ್ಕಳು ಸಾಲದ ಶೂಲದಲ್ಲಿ ಸಿಲುಕಿ,ಕೆಲವೊಮ್ಮೆ ತಮ್ಮ ಹಿಂದಿನ ಪೀಳಿಗೆಯಿಂದ ಸಾಲದ ಹೊರೆಯನ್ನು ಹೊತ್ತುಕೊಂಡು ಜೀತದಾಳುಗಳಾಗಿ ಇಟ್ಟಿಗೆ ಭಟ್ಟಿಗಳು,ಅಕ್ಕಿ ಗಿರಣಿಗಳು,ಕಸೂತಿ ಘಟಕಗಳು,ಕೃಷಿ ಕಾರ್ಯ ಇತ್ಯಾದಿಗಳಲ್ಲಿ ದುಡಿಸಲ್ಪಡುತ್ತಿದ್ದಾರೆ ಎಂದಿರುವ ವರದಿಯು,ಭಾರತದ ಮಾನವ ಕಳ್ಳ ಸಾಗಾಣಿಕೆ ಸಮಸ್ಯೆಯು ಅದರ ಆಂತರಿಕವಾಗಿದೆ ಮತ್ತು ಕೆಳಜಾತಿಗಳ ದಲಿತರು,ಬುಡಕಟ್ಟು ಜನರು,ಧಾರ್ಮಿಕ ಅಲ್ಪಸಂಖ್ಯಾತರು ಮತ್ತು ವಂಚಿತ ವರ್ಗಗಳ ಮಹಿಳೆಯರು ಹಾಗೂ ಬಾಲಕಿಯರೇ ಹೆಚ್ಚಾಗಿ ಮಾನವ ಕಳ್ಳಸಾಗಾಣಿಕೆಯ ಬಲಿಪಶುಗಳಾಗಿದ್ದಾರೆ ಎಂದು ಹೇಳಿದೆ.