ಪ್ರಾದೇಶಿಕ ಪಕ್ಷಗಳ ಒಗ್ಗಟ್ಟಿನ ಬಗ್ಗೆ ಕುಮಾರಸ್ವಾಮಿ-ನಾಯ್ಡು ಚರ್ಚೆ
Update: 2018-08-31 14:26 GMT
ಅಮರಾವತಿ, ಆ.31: ಆಂಧ್ರಪ್ರದೇಶದ ಮುಖ್ಯಮಂತ್ರಿ ಎನ್.ಚಂದ್ರಬಾಬು ನಾಯ್ಡು ಅವರು ಶುಕ್ರವಾರ ವಿಜಯವಾಡಾದಲ್ಲಿ ಕರ್ನಾಟಕದ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿಯವರನ್ನು ಭೇಟಿಯಾಗಿ ರಾಜಕೀಯ ವಿಷಯಗಳನ್ನು, ವಿಶೇಷವಾಗಿ ಪ್ರಾದೇಶಿಕ ಪಕ್ಷಗಳು...ಅದೂ ದಕ್ಷಿಣ ಭಾರತದಲ್ಲಿ ಒಗ್ಗೂಡುವ ಅಗತ್ಯದ ಬಗ್ಗೆ ಚರ್ಚಿಸಿದರು.
ದಕ್ಷಿಣದಲ್ಲಿಯ ಎಲ್ಲ ಪ್ರಾದೇಶಿಕ ಪಕ್ಷಗಳು ಒಂದೇ ವೇದಿಕೆಯಲ್ಲಿ ಸೇರಬೇಕೆಂಬ ಅಭಿಪ್ರಾಯವನ್ನು ಉಭಯ ಮುಖ್ಯಮಂತ್ರಿಗಳು ವ್ಯಕ್ತಪಡಿಸಿದರು ಎಂದು ರಾಜ್ಯ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯು ಹೇಳಿಕೆಯಲ್ಲಿ ತಿಳಿಸಿದೆ.
ಕೇಂದ್ರದಲ್ಲಿ ಪರ್ಯಾಯ ರಾಜಕೀಯ ಶಕ್ತಿಯ ಅಗತ್ಯವನ್ನೂ ಅವರು ಚರ್ಚಿಸಿದರು ಎಂದು ಅದು ಹೇಳಿದೆ. ಕನಕ ದುರ್ಗಾ ದೇವಿಯ ದರ್ಶನಕ್ಕಾಗಿ ಕುಮಾರಸ್ವಾಮಿ ಬೆಳಿಗ್ಗೆ ವಿಜಯವಾಡಾಕ್ಕೆ ಆಗಮಿಸಿದ್ದರು.