ವಿಂಡೀಸ್ ವಿರುದ್ಧ ಭಾರತಕ್ಕೆ ಟ್ವೆಂಟಿ – 20ಯಲ್ಲಿ ಸರಣಿ ಗೆಲುವು

ಲಕ್ನೋ, ನ.6:  ದ್ವಿತೀಯ ಟ್ವೆಂಟಿ-20 ಅಂತರ್ ರಾಷ್ಟ್ರೀಯ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್  ವಿರುದ್ಧ ಭಾರತ 71 ರನ್ ಗಳ ಜಯ ಗಳಿಸಿದ್ದು, ಇದರೊಂದಿಗೆ ಮೂರು ಪಂದ್ಯಗಳ ಸರಣಿಯನ್ನು ಭಾರತ 2 -0 ಅಂತರದಲ್ಲಿ ವಶಪಡಿಸಿಕೊಂಡಿದೆ.
 ‘ಭಾರತ ರತ್ನ ಅಟಲ್ ಬಿಹಾರಿ ವಾಜಪೇಯಿ ಏಕಾನ ಕ್ರಿಕೆಟ್ ಸ್ಟೇಡಿಯಂನಲ್ಲಿ  ನಡೆದ ಪಂದ್ಯದಲ್ಲಿ ಗೆಲುವಿಗೆ 196 ರನ್ ಗಳ ಕಠಿಣ ಸವಾಲು ಪಡೆದಿದ್ಧ ವೆಸ್ಟ್ ಇಂಡೀ ಸ್ ತಂಡ ನಿಗದಿತ 20 ಓವರ್ ಗಳಲ್ಲಿ 9 ವಿಕೆಟ್ ನಷ್ಟದಲ್ಲಿ 124  ರನ್ ಗಳಿಸಿತು.
ಭಾರತ  ಇನ್ನೂ ಒಂದು ಪಂದ್ಯ ಆಡಲು ಬಾಕಿ ಇರುವಾಗಲೇ ಸರಣಿ ಜಯ ದಾಖಲಿಸಿದ್ದು, ಟೆಸ್ಟ್ ನಲ್ಲಿ 2-0 ಹಾಗೂ ಏಕದಿನ ಸರಣಿಯಲ್ಲಿ 3-1     ಅಂತರದಲ್ಲಿ ಸರಣಿ ಗೆಲುವು ದಾಖಲಿಸಿತ್ತು.
ಇಂದು ನಡೆದ ಪಂದ್ಯದಲ್ಲಿ  ಗೆಲುವಿಗೆ ಕಠಿಣ ಸವಾಲು ಪಡೆದಿದ್ಧ ವೆಸ್ಟ್ ಇಂಡೀಸ್ ತಂಡದ ಪರ ಶಾಯ್ ಹೋಪ್ 6ರನ್, ಹೆಟ್ಮೆಯರ್ 15 ರನ್, ಡರೆನ್ ಬ್ರಾವೊ 23 ರನ್, ದಿನೇಶ್ ರಾಮ್ ದಿನ್ 10ರನ್, ನಿಕೊಲಾಸ್ ಪೊರನ್ 6ರನ್, ಫ್ಯಾಬಿಯನ್ ಆ್ಯಲನ್ 0, ಕಿಮೊ ಪೌಲ್ 20 ರನ್,  ಖಾರಿ ಪಿಯರ್ 1ರನ್ , ಒಶಾನೆ ಥಾಮಸ್ ಔಟಾಗದೆ  8 ರನ್ ಗಳಿಸಿದರು. ನಾಯಕ ಕಾರ್ಲೊಸ್ ಬ್ರಾಥ್ ವೇಟ್   ಹೋರಾಟದ ಮೂಲಕ ಔಟಾಗದೆ 15 ರನ್  ಸೇರಿಸಿದರೂ ತಂಡ ಗೆಲುವಿನ ದಡ ಸೇರಿಲ್ಲ.
ಭಾರತ ಖಲೀಲ್ ಅಹ್ಮದ್, ಭುವನೇಶ್ವರ್ ಕುಮಾರ್, ಕುಲ್ ದೀಪ್ ಯಾದವ್  ಮತ್ತು ಜಸ್ ಪ್ರೀತ್ ಬುಮ್ರಾ ತಲಾ 2 ವಿಕೆಟ್ ಪಡೆದರು.
ರೋಹಿತ್ ಶತಕ: ಭಾರತ 195/2
 ‘ಟಾಸ್ ಸೋತು ಬ್ಯಾಟಿಂಗ್ ಗೆ ಇಳಿಸಲ್ಪಟ್ಟ ಭಾರತ ನಿಗದಿತ 20 ಓವರ್ ಗಳಲ್ಲಿ 2 ವಿಕೆಟ್ ನಷ್ಟದಲ್ಲಿ 195 ರನ್ ಗಳಿಸಿತ್ತು.
ರೋಹಿತ್ ಶರ್ಮಾ ಔಟಾಗದೆ 111 ರನ್ (61ಎ, 8ಬೌ,7ಸಿ) ಮತ್ತು ಲೋಕೇಶ್ ರಾಹುಲ್ ಔಟಾಗದೆ 26 ರನ್ , ರಿಷಭ್ ಪಂತ್ 5 ರನ್  ಮತ್ತು ಶಿಖರ್ ಧವನ್ 43 ರನ್ (41ಎ, 3ಬೌ) ಗಳಿಸಿ ಔಟಾದರು.
ರೋಹಿತ್ ಶರ್ಮಾ 86ನೇ ಪಂದ್ಯದಲ್ಲಿ  58 ಎಸೆತಗಳಲ್ಲಿ 8 ಬೌಂಡರಿ ಮತ್ತು 6 ಸಿಕ್ಸರ್ ಸಹಾಯದಿಂದ 4ನೇ ಶತಕ ದಾಖಲಿಸಿದರು.ಇದರೊಂದಿಗೆ ಅಂತಾರಾಷ್ಟ್ರೀಯ ಟ್ವೆಂಟಿ-20 ಕ್ರಿಕೆಟ್‌ನಲ್ಲಿ ದಾಖಲೆಯ ನಾಲ್ಕನೇ ಶತಕ ಸಾಧನೆ ಮಾಡಿದ ವಿಶ್ವದ ಮೊತ್ತ ಮೊದಲ ಬ್ಯಾಟ್ಸ್‌ಮನ್ ಎಂಬ ಕೀರ್ತಿಗೆ ಪಾತ್ರವಾಗಿದ್ದಾರೆ.    ಅತಿ ಹೆಚ್ಚು ಶತಕಗಳನ್ನು ದಾಖಲಿಸಿದ ಪಟ್ಟಿಯಲ್ಲಿ ನ್ಯೂಝಿಲೆಂಡ್‌ನ ಕಾಲಿನ್ ಮನ್ರೊ ದಾಖಲೆಯನ್ನು ಮುರಿದಿದ್ದಾರೆ.  ಇದಕ್ಕೂ ಮೊದಲು ಅವರು 38 ಎಸೆತಗಳಲ್ಲಿ 3 ಬೌಂಡರಿ ಮತ್ತು 3 ಸಿಕ್ಸರ್ ಸಹಾಯದಿಂದ ಅರ್ಧಶತಕ ಪೂರ್ಣಗೊಳಿಸಿದ್ದರು. 
ಇನಿಂಗ್ಸ್ ಆರಂಭಿಸಿದ ರೋಹಿತ್ ಮತ್ತು ಧವನ್ ಮೊದಲ ವಿಕೆಟ್ ಗೆ 14 ಓವರ್ ಗಳಲ್ಲಿ 123 ರನ್ ಗಳ ಜೊತೆಯಾಟ ನೀಡಿದರು. ಮೂರನೇ ವಿಕೆಟ್ ಗೆ ಲೋಕೇಶ್ ರಾಹುಲ್ ಜೊತೆ 62 ರನ್ ಗಳ ಜೊತೆಯಾಟ ನೀಡಿ ವಿಂಡೀಸ್  ಕಠಿಣ ಸವಾಲು ವಿಧಿಸಲು ನೆರವಾದರು.
ವಿಂಡೀಸ್ ಪರ ಖಾರಿ ಪಿಯರ್ 49ಕ್ಕೆ 1 ಮತ್ತು ಫ್ಯಾಬಿಯಾನ್ ಆಲನ್ 33ಕ್ಕೆ 1 ವಿಕೆಟ್ ಕಬಳಿಸಿದರು.