ಮಾಂಸ ಸೇವಿಸಿದ ಆರೋಪದಲ್ಲಿ ಮುಸ್ಲಿಂ ಕಾರ್ಮಿಕರಿಗೆ ಥಳಿತ

ಬರೇಲಿ,ಜೂ.2: ಇಲ್ಲಿಯ ಗುಡಿಯೊಂದರ ಬಳಿ ಮಾಂಸವನ್ನು ಸೇವಿಸುತ್ತಿದ್ದ ಆರೋಪದಲ್ಲಿ ನಾಲ್ವರು ಕಾರ್ಮಿಕರನ್ನು ಅಪರಿಚಿತ ಯುವಕರ ಗುಂಪೊಂದು ಥಳಿಸಿದೆ.

ಯುವಕರು ಕಾರ್ಮಿಕರನ್ನು ಬೆಲ್ಟ್‌ಗಳಿಂದ ಥಳಿಸುತ್ತಿರುವ ವೀಡಿಯೊ ಸಾಮಾಜಿಕ ಮಾಧ್ಯಮಗಳಲ್ಲಿ ವ್ಯಾಪಕವಾಗಿ ಶೇರ್ ಆಗಿದೆ.

ಬಹೇರಿಯಲ್ಲಿ ನಿರ್ಮಾಣ ಹಂತದಲ್ಲಿರುವ ಮನೆಯ ಕಾಮಗಾರಿಗಾಗಿ ಈ ಕಾರ್ಮಿಕರನ್ನು ಕರೆತರಲಾಗಿತ್ತು. ವಿರಾಮದ ವೇಳೆಯಲ್ಲಿ ಅವರು ಸಮೀಪದ ಮರವೊಂದರ ಕೆಳಗೆ ಕುಳಿತು ಊಟ ಮಾಡುತ್ತಿದ್ದು,ಅಲ್ಲಿಯೇ ಪುಟ್ಟಗುಡಿಯೊಂದಿತ್ತು. ಈ ವೇಳೆ ಆಗಮಿಸಿದ ಗುಂಪು ಪವಿತ್ರ ಸ್ಥಳದ ಬಳಿ ಮಾಂಸವನ್ನು ಸೇವಿಸುತ್ತಿರುವುದಾಗಿ ಆರೋಪಿಸಿ ಅವರನ್ನು ಥಳಿಸಿದ್ದಾರೆ.

ತಾವು ಸಸ್ಯಾಹಾರಿ ಊಟವನ್ನು ಮಾಡುತ್ತಿದ್ದಾಗಿ ಕಾರ್ಮಿಕರು ಸುದ್ದಿಗಾರರಿಗೆ ತಿಳಿಸಿದರು. ಈ ಕಾರ್ಮಿಕರ ಪೈಕಿ ಇಬ್ಬರು ಮುಸ್ಲಿಮರಾಗಿದ್ದು,ಇದು ಹಲ್ಲೆಗೆ ಪ್ರಚೋದನೆ ನೀಡಿರಬಹುದು ಎನ್ನಲಾಗಿದೆ.

ಆದೇಶ ವಾಲ್ಮೀಕಿ,ಮನೀಷ್ ಮತ್ತು ಇತರ ನಾಲ್ವರು ಅಪರಿಚಿತರ ವಿರುದ್ಧ ಎಫ್‌ಐಆರ್ ದಾಖಲಿಸಿಕೊಂಡಿದ್ದು,ತಲೆ ಮರೆಸಿಕೊಂಡಿರುವ ಆರೋಪಿಗಳ ಬಂಧನಕ್ಕಾಗಿ ಎರಡು ತಂಡಗಳನ್ನು ರಚಿಸಲಾಗಿದೆ ಎಂದು ಬರೇಲಿ ಎಸ್‌ಎಸ್‌ಪಿ ಮುನಿರಾಜ ಜಿ. ಅವರು ತಿಳಿಸಿದ್ದಾರೆ.