ಒಂದೇ ಓವರ್‌ನಲ್ಲಿ 4 ಸಿಕ್ಸರ್ ಸಹಿತ 32 ರನ್ ಗಳಿಸಿದ ಗೇಲ್
Update: 2019-08-03 18:13 GMT
ಗ್ಲೋಬಲ್ ಟಿ-20
ಟೊರಾಂಟೊ, ಆ.3: ಗ್ಲೋಬಲ್ ಟಿ-20 ಕೆನಡಾ ಟೂರ್ನಿಯಲ್ಲಿ ಒಂದೇ ಓವರ್‌ನಲ್ಲಿ 4 ಸಿಕ್ಸರ್ ಸಹಿತ 32 ರನ್ ಗಳಿಸಿದ ಕ್ರಿಸ್ ಗೇಲ್ ವ್ಯಾಂಕೋವರ್ ನೈಟ್ಸ್ ತಂಡ ಎಡ್ಮೊಂಟನ್ ರಾಯಲ್ಸ್ ವಿರುದ್ಧ 6 ವಿಕೆಟ್‌ಗಳಿಂದ ಜಯ ಸಾಧಿಸಲು ನೆರವಾದರು.
ಗೇಲ್ ಕೇವಲ 44 ಎಸೆತಗಳಲ್ಲಿ 94 ರನ್ ಗಳಿಸಿದ್ದು, ಇದರಲ್ಲಿ 9 ಸಿಕ್ಸರ್ ಹಾಗೂ 6 ಬೌಂಡರಿಗಳಿದ್ದವು. ಕೆಲವೇ ದಿನಗಳ ಹಿಂದೆ ಔಟಾಗದೆ 122 ರನ್ ಗಳಿಸಿದ್ದ ಗೇಲ್ ಶುಕ್ರವಾರ ಕೇವಲ 6 ರನ್‌ನಿಂದ ಗ್ಲೋಬಲ್ ಟಿ-20 ಲೀಗ್‌ನಲ್ಲಿ ಸತತ 2ನೇ ಶತಕ ದಾಖಲಿ ಸುವುದರಿಂದ ವಂಚಿತರಾದರು. ಎಡ್ಮೊಂಟನ್ ರಾಯಲ್ಸ್ ಈಗ ನಡೆಯುತ್ತಿರುವ ಟೂರ್ನಿಯಲ್ಲಿ ಸೋಲಿನ ಸರಣಿ ಯನ್ನು ಮುಂದುವರಿಸಿದೆ. ವ್ಯಾಂಕೋವರ್ ನೈಟ್ಸ್ ಅಂಕಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿದೆ.
ಗೆಲ್ಲಲು 166 ರನ್ ಚೇಸಿಂಗ್‌ಗೆ ತೊಡಗಿದ್ದ ನೈಟ್ಸ್ ತಂಡ ಕಳಪೆ ಆರಂಭ ಪಡೆದಿತ್ತು. ಆಗ ಚಾಡ್ವಿಕ್ ವಾಲ್ಟನ್ ಜೊತೆಗೂಡಿದ ಗೇಲ್ ಎಡ್ಮೋಂಟನ್ ಬೌಲರ್‌ಗಳನ್ನು ಚೆಂಡಾಡಿದರು. ಗೇಲ್ ಪಾಕಿಸ್ತಾನದ ಲೆಗ್ ಸ್ಪಿನ್ನರ್ ಶಾದಾಬ್ ಖಾನ್ ಎಸೆದ ಓವರ್‌ವೊಂದರಲ್ಲಿ ನಾಲ್ಕು ಸಿಕ್ಸರ್ ಹಾಗೂ 2 ಬೌಂಡರಿ ಸಹಿತ 32 ರನ್ ಗಳಿಸಿ ಅಬ್ಬರಿಸಿದರು. ಕಟ್ಟಿಂಗ್, ಗೇಲ್ ಅಬ್ಬರಕ್ಕೆ ತೆರೆ ಎಳೆದರು. ಇದಕ್ಕೂ ಮೊದಲು ಬ್ಯಾಟಿಂಗ್ ಮಾಡಿದ್ದ ಎಡ್ಮೊಂಟನ್ ರಾಯಲ್ಸ್ ತಂಡ ನಿಗದಿತ 20 ಓವರ್‌ಗಳಲ್ಲಿ 9 ವಿಕೆಟ್ಗಳ ನಷ್ಟಕ್ಕೆ 165 ರನ್ ಗಳಿಸಿತು. ಕಟ್ಟಿಂಗ್ 72 ರನ್ ಗಳಿಸಿ ಕೊನೆಯ ಓವರ್‌ನಲ್ಲಿ ರನೌಟಾದರು. ಮುಹಮ್ಮದ್ ನವಾಝ್ 40 ರನ್ ಗಳಿಸಿದರು.