ದೇಶೀ ನಿರ್ಮಿತ ಮುಂಬೈ ಮೆಟ್ರೋ ಕೋಚ್ ಉದ್ಘಾಟಿಸಿದ ಪ್ರಧಾನಿ ಮೋದಿ

ಮುಂಬೈ, ಸೆ.7: ಮುಂಬೈನ ಮೆಟ್ರೋ ಯೋಜನೆಗಳಿಗೆ ಚಾಲನೆ ನೀಡಿದ ಪ್ರಧಾನಮಂತ್ರಿ ನರೇಂದ್ರ ಮೋದಿ, ಮೇಕ್ ಇನ್ ಇಂಡಿಯಾ ಕಾರ್ಯಕ್ರಮದಡಿ ಸ್ಥಳೀಯವಾಗಿ ನಿರ್ಮಿಸಲಾಗಿರುವ ವಿಶೇಷ ಮೆಟ್ರೋ ಕೋಚ್‌ನ್ನು ಉದ್ಘಾಟಿಸಿದರು.

ಅಕ್ಟೋಬರ್‌ನಲ್ಲಿ ಮಹಾರಾಷ್ಟ್ರದಲ್ಲಿ ವಿಧಾನಸಭಾ ಚುನಾವಣೆಯ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಶನಿವಾರ ಮುಂಬೈಗೆ ಪ್ರಧಾನಿ ಭೇಟಿ ನೀಡಿದರು. ಈ ವೇಳೆ 20,000 ಕೋಟಿ ರೂ.ಗೂ ಅಧಿಕ ಯೋಜನೆಗಳನ್ನು ಉದ್ಘಾಟಿಸಿದರು.

ಮೆಟ್ರೋ ಲೈನ್ 10(ಗೈಮುಖ್-ಶಿವಾಜಿ ಚೌಕ್), ಲೈನ್ 11(ವಡಾಲ-ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್) ಹಾಗೂ ಲೈನ್ 12(ಕಲ್ಯಾಣ್-ತಲೋಜಾ) ಹಾಗೂ ಅರೇ ಕಾಲನಿಯಲ್ಲಿ ಪ್ರಸ್ತಾವಿತ ಮೆಟ್ರೋ ಭವನಕ್ಕೆ ಶಂಕುಸ್ಥಾಪನೆ ನೆರವೇರಿಸಿದರು. ಬೆಂಗಳೂರಿನ ಭಾರತ್ ಅರ್ಥ್ ಮೂವರ್ಸ್(ಬೆಮೆಲ್)ಸಂಸ್ಥೆ ಕೇವಲ 75 ದಿನಗಳಲ್ಲಿ ರೈಲ್ವೆ ಕೋಚ್ ನಿರ್ಮಾಣ ಮಾಡಿದೆ. ಮುಂಬೈನ ಮೆಟ್ರೋ ರೈಲು ನಿಗಮವು ಇಂತಹ 500 ಕೋಚ್ ನಿರ್ಮಾಣ ಮಾಡುವ ಯೋಜನೆ ಇಟ್ಟುಕೊಂಡಿದೆ.