'ಅಂಕಲ್ ಶಾಂತರಾಗಿ': ಫೋಟೊಶಾಪ್ ಚಿತ್ರ ಶೇರ್ ಮಾಡಿದ ಅಮಿತಾಬ್ ಬಚ್ಚನ್ ಕಾಲೆಳೆದ ಟ್ವಿಟರಿಗರು

ಕೊರೋನ ವೈರಸ್ ವಿರುದ್ಧದ ಹೋರಾಟದಲ್ಲಿ ಒಗ್ಗಟ್ಟಿನ ಪ್ರದರ್ಶನಕ್ಕೆ ಪ್ರಧಾನಿ ಮೋದಿ ನೀಡಿದ್ದ ಕರೆಗೆ ವ್ಯಾಪಕ ಬೆಂಬಲ ವ್ಯಕ್ತವಾಗಿದೆ. ಈ ನಡುವೆ ಬಾಲಿವುಡ್ ನಟ ಅಮಿತಾಬ್ ಬಚ್ಚನ್ ಮತ್ತೊಮ್ಮೆ ನಕಲಿ ಫೋಟೊ ಟ್ವೀಟ್ ಮಾಡುವ ಮೂಲಕ ನಗೆಪಾಟಲಿಗೀಡಾಗಿದ್ದಾರೆ.

ರವಿವಾರ 9 ಗಂಟೆಗೆ ಮನೆಯಲ್ಲಿ ಟಾರ್ಚ್ ಬೆಳಗಿದ್ದ ಅಮಿತಾಬ್ ಬಚ್ಚನ್ ಆ ಫೋಟೊವನ್ನು ಟ್ವೀಟ್ ಮಾಡಿದ್ದರು. ಇನ್ನೊಂದು ಟ್ವೀಟ್ ನಲ್ಲಿ ಅಮಿತಾಬ್ ಫೋಟೊಶಾಪ್ ಮಾಡಲ್ಪಟ್ಟ ಭಾರತದ ಫೋಟೊವನ್ನು ಟ್ವೀಟ್ ಮಾಡಿದ್ದರು. ಉಪಗ್ರಹದಿಂದ ತೆಗೆದಂತೆ ಕಾಣುವ ಈ ಫೋಟೊದಲ್ಲಿ ಭಾರತ ಹೊಳೆಯುತ್ತಿದೆ.

ಬಚ್ಚನ್ ರ ಈ ಟ್ವೀಟ್ ಬಗ್ಗೆ ಟ್ವಿಟರಿಗರ ಆಕ್ರೋಶ ವ್ಯಕ್ತಪಡಿಸಿದ್ದರೆ, ಇನ್ನು ಕೆಲವರು ಬಾಲಿವುಡ್ ನಟನ ಕಾಲೆಳೆದಿದ್ದಾರೆ.

"ಶಾಂತರಾಗಿ ಅಂಕಲ್, ಅದು ಫೋಟೊಶಾಪ್ ಚಿತ್ರ' ಎಂದು ಒಬ್ಬರು ಟ್ವೀಟ್ ಮಾಡಿದ್ದರೆ, ಮತ್ತೊಬ್ಬರು "ಇದು ನನ್ನ ಸ್ನೇಹಿತ ಫೋಟೊಶಾಪ್ ನಲ್ಲಿ ಮಾಡಿದ ಫೋಟೊ. ದಯವಿಟ್ಟು ಅಂಧರಾಗಬೇಡಿ' ಎಂದಿದ್ದಾರೆ.