ವಿಶ್ವ ಆರೋಗ್ಯ ಸಂಸ್ಥೆಗೆ ನೀಡುವ ನೆರವು ಸ್ಥಗಿತಕ್ಕೆ ಅಮೇರಿಕ ನಿರ್ಧಾರ
ವಾಶಿಂಗ್ಟನ್, ಎ. 15: ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯಎಚ್ಒ)ಯು ನೋವೆಲ್-ಕೊರೋನ ವೈರಸ್ ಬಿಕ್ಕಟ್ಟನ್ನು ತಪ್ಪಾಗಿ ನಿಭಾಯಿಸುತ್ತಿದೆ ಎಂದು ಆರೋಪಿಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಆ ಸಂಸ್ಥೆಗೆ ಅಮೆರಿಕ ನೀಡುತ್ತಿರುವ ದೇಣಿಗೆಯನ್ನು ಮಂಗಳವಾರ ನಿಲ್ಲಿಸಿದ್ದಾರೆ.
ಅತ್ಯಂತ ವೇಗವಾಗಿ ಹರಡುವ ರೋಗವು ತನ್ನ ಉತ್ತುಂಗ ಸ್ಥಿತಿಯಲ್ಲಿ ಇರುವಾಗಲೇ ಅಮೆರಿಕ ಅಧ್ಯಕ್ಷರು ಈ ಕ್ರಮವನ್ನು ತೆಗೆದುಕೊಂಡಿರುವುದಕ್ಕೆ ಜಗತ್ತಿನಾದ್ಯಂತ ಭಾರೀ ಕಳವಳ ವ್ಯಕ್ತವಾಗಿದೆ.
ಮಾರಕ ಸಾಂಕ್ರಾಮಿಕ ರೋಗಕ್ಕೆ ಈವರೆಗೆ ಜಾಗತಿಕ ಮಟ್ಟದಲ್ಲಿ 1.28 ಲಕ್ಷಕ್ಕೂ ಅಧಿಕ ಮಂದಿ ಬಲಿಯಾಗಿದ್ದಾರೆ ಹಾಗೂ 20 ಲಕ್ಷಕ್ಕೂ ಅಧಿಕ ಮಂದಿ ಅದರ ಸೋಂಕಿಗೆ ಒಳಗಾಗಿದ್ದಾರೆ.
ಜಗತ್ತಿನ ಅತಿ ದೊಡ್ಡ ಆರ್ಥಿಕತೆಯಾದ ಅಮೆರಿಕದ ದಿಗಂತದಲ್ಲಿ ‘ಬೆಳಕಿನ ಕಿರಣಗಳು’ ಗೋಚರಿಸುತ್ತಿವೆ ಎಂದು ಟ್ರಂಪ್ ಹೇಳಿದ್ದಾರೆ. ಅದೇ ವೇಳೆ, ವಿಶ್ವಸಂಸ್ಥೆಯ ಆರೋಗ್ಯ ಘಟಕದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ‘‘ವಿಶ್ವ ಆರೋಗ್ಯ ಸಂಸ್ಥೆಯು ದುರಾಡಳಿತದಲ್ಲಿ ತೊಡಗಿದೆ ಹಾಗೂ ಕೊರೋನವೈರಸ್ ಸಾಂಕ್ರಾಮಿಕದ ಹರಡುವಿಕೆಯನ್ನು ಮುಚ್ಚಿಟ್ಟಿದೆ’’ ಎಂದು ಅವರು ಆರೋಪಿಸಿದರು.
ಸ್ವಿಟ್ಸರ್ಲ್ಯಾಂಡ್ನಲ್ಲಿ ಪ್ರಧಾನ ಕಚೇರಿ ಹೊಂದಿರುವ ವಿಶ್ವ ಆರೋಗ್ಯ ಸಂಸ್ಥೆಯು ‘ತಪ್ಪು ಮಾಹಿತಿ’ಯನ್ನು ಹರಡುತ್ತಿದೆ ಹಾಗೂ ಅದು ಚೀನಾದ ಮಾಹಿತಿಗಳನ್ನು ಅವಲಂಬಿಸುತ್ತಿರುವ ಕಾರಣಕ್ಕಾಗಿಯೇ ಜಗತ್ತಿನಾದ್ಯಂತ ಕೊರೋನವೈರಸ್ ಸೋಂಕು ಪ್ರಕರಣಗಳಲ್ಲಿ 20 ಪಟ್ಟು ಏರಿಕೆಯಾಗಿದೆ ಎಂದು ಟ್ರಂಪ್ ಆರೋಪಿಸಿದರು.
ಅಮೆರಿಕವು ಕಳೆದ ವರ್ಷ ವಿಶ್ವ ಆರೋಗ್ಯ ಸಂಸ್ಥೆಗೆ 400 ಮಿಲಿಯ ಡಾಲರ್ (ಸುಮಾರು 3,060 ಕೋಟಿ ರೂಪಾಯಿ) ದೇಣಿಗೆ ನೀಡಿದೆ.
ವಿಶ್ವ ಆರೋಗ್ಯ ಸಂಸ್ಥೆಯು ಚೀನಾ-ಪರ ಧೋರಣೆಯನ್ನು ಹೊಂದಿದೆ ಎಂಬುದಾಗಿ ಕೆಲವು ದಿನಗಳ ಹಿಂದೆ ಟ್ರಂಪ್ ಆರೋಪಿಸಿದ್ದರು ಹಾಗೂ ಅದಕ್ಕೆ ನೀಡುವ ಅಮೆರಿಕದ ದೇಣಿಗೆಯನ್ನು ನಿಲ್ಲಿಸುವುದಾಗಿ ಬೆದರಿಕೆ ಹಾಕಿದ್ದರು.
'ಟ್ರಂಪ್ ಬಲಿಪ್ರಾಣಿಗಾಗಿ ಹುಡುಕುತ್ತಿರುವರೇ'?
ಕೊರೋನವೈರಸ್ನಿಂದಾಗಿ ಜಗತ್ತಿನಲ್ಲೇ ಅತಿ ಹೆಚ್ಚು ಹಾನಿಗೀಡಾಗಿರುವ ದೇಶ ಅಮೆರಿಕವಾಗಿದೆ. ಅಲ್ಲಿ ಮೃತಪಟ್ಟವರ ಸಂಖ್ಯೆ 26,000ವನ್ನು ದಾಟಿದೆ. ಆರಂಭದಲ್ಲಿ ಕೊರೋನವೈರಸ್ ಬಗ್ಗೆ ಉಡಾಫೆಯ ಧೋರಣೆಯನ್ನು ಹೊಂದಿದ್ದ ಟ್ರಂಪ್, ಪರಿಸ್ಥಿತಿ ಕೈಮೀರಿದಾಗ ಬಲಿ ಪ್ರಾಣಿಗಳಿಗಾಗಿ ಎದುರು ನೋಡುತ್ತಿದ್ದಾರೆ ಎಂದು ಟೀಕಾಕಾರರು ಆರೋಪಿಸುತ್ತಾರೆ.
ವಿಶ್ವ ಆರೋಗ್ಯ ಸಂಸ್ಥೆಯ ಅಗತ್ಯ ಈಗ ಹಿಂದೆಂದಿಗಿಂತಲೂ ಹೆಚ್ಚು ಬಿಲ್ ಗೇಟ್ಸ್
ಕೊರೋನವೈರಸ್ ಸಾಂಕ್ರಾಮಿಕವು ಉತ್ತುಂಗ ಸ್ಥಿತಿಯಲ್ಲಿ ಇರುವಾಗಲೇ, ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲುಎಚ್ಒ)ಗೆ ಅಮೆರಿಕದ ದೇಣಿಗೆಯನ್ನು ನಿಲ್ಲಿಸುವ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ರ ನಿರ್ಧಾರವನ್ನು ಮೈಕ್ರೋಸಾಫ್ಟ್ ಕಂಪೆನಿಯ ಸಹಸಂಸ್ಥಾಪಕ ಬಿಲ್ ಗೇಟ್ಸ್ ಟೀಕಿಸಿದ್ದಾರೆ.
‘‘ಈಗ ಜಗತ್ತಿಗೆ ವಿಶ್ವ ಆರೋಗ್ಯ ಸಂಸ್ಥೆಯ ಅಗತ್ಯ ಹಿಂದೆಂದಿಗಿಂತಲೂ ಇದೆ’’ ಎಂದು ಗೇಟ್ಸ್ ಅಭಿಪ್ರಾಯ ಪಟ್ಟಿದ್ದಾರೆ.
‘‘ಜಗತ್ತು ಅಭೂತಪೂರ್ವ ಆರೋಗ್ಯ ಬಿಕ್ಕಟ್ಟೊಂದನ್ನು ಎದುರಿಸುತ್ತಿರುವಾಗ, ವಿಶ್ವ ಆರೋಗ್ಯ ಸಂಸ್ಥೆಗೆ ನೀಡಬೇಕಾದ ನಿಧಿಯನ್ನು ನಿಲ್ಲಿಸುವುದು ಅತ್ಯಂತ ಅಪಾಯಕಾರಿಯಾಗಿದೆ’’ ಎಂದು ಬಿಲ್ ಗೇಟ್ಸ್ ಹೇಳಿದರು.
‘‘ಅವರು ಮಾಡುತ್ತಿರುವ ಕೆಲಸದಿಂದಾಗಿ ಕೋವಿಡ್-19 ಹರಡುವಿಕೆಯು ನಿಧಾನಗೊಂಡಿದೆ. ಈ ಆ ಕೆಲಸವನ್ನು ನಿಲ್ಲಿಸಿದರೆ ಬೇರೆ ಯಾವುದೇ ಸಂಸ್ಥೆಯು ಆ ಕೆಲಸವನ್ನು ಮಾಡಲು ಸಾಧ್ಯವಿಲ್ಲ. ವಿಶ್ವ ಆರೋಗ್ಯ ಸಂಸ್ಥೆಯ ಅಗತ್ಯ ಈಗ ಜಗತ್ತಿಗೆ ಹಿಂದೆಂದಿಗಿಂತಲೂ ಹೆಚ್ಚಿದೆ’’ ಎಂದರು.
ಚೀನಾ ಕಳವಳ
ವಿಶ್ವ ಆರೋಗ್ಯ ಸಂಸ್ಥೆಗೆ ನೀಡುತ್ತಿರುವ ದೇಣಿಗೆಯನ್ನು ಅಮೆರಿಕ ನಿಲ್ಲಿಸಿರುವುದಕ್ಕೆ ಚೀನಾ ‘ಗಂಭೀರ ಕಳವಳ’ ವ್ಯಕ್ತಪಡಿಸಿದೆ ಹಾಗೂ ಕೊರೋನವೈರಸ್ ಬಿಕ್ಕಟ್ಟಿನ ಅವಧಿಯಲ್ಲಿ ತನ್ನ ಬದ್ಧತೆಗಳನ್ನು ಈಡೇರಿಸುವಂತೆ ಅದು ಅಮೆರಿಕವನ್ನು ಒತ್ತಾಯಿಸಿದೆ.
‘‘ಜಗತ್ತಿನ ಹಾಲಿ ಸಾಂಕ್ರಾಮಿಕ ಪರಿಸ್ಥಿತಿಯು ಚಿಂತಾಜನಕವಾಗಿದೆ’’ ಎಂದು ಚೀನಾದ ವಿದೇಶ ಸಚಿವಾಲಯದ ವಕ್ತಾರ ಝಾವೊ ಲಿಜಿಯನ್ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದ್ದಾರೆ ಎಂದು ಎಎಫ್ಪಿ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಜನರ ಪ್ರಾಣಗಳನ್ನು ರಕ್ಷಿಸುವತ್ತ ಗಮನ: ವಿಶ್ವ ಆರೋಗ್ಯ ಸಂಸ್ಥೆ
ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲುಎಚ್ಒ)ಯು ಜನರ ಪ್ರಾಣಗಳನ್ನು ರಕ್ಷಿಸುವತ್ತ ಹಾಗೂ ಕೊರೋನವೈರಸ್ ಸಾಂಕ್ರಾಮಿಕವನ್ನು ನಿಲ್ಲಿಸುವತ್ತ ಮಾತ್ರ ತನ್ನ ದೃಷ್ಟಿಯನ್ನು ನೆಟ್ಟಿದೆ ಎಂದು ಅದರ ಮುಖ್ಯಸ್ಥ ಬುಧವಾರ ಹೇಳಿದ್ದಾರೆ.
‘‘ಈಗ ವ್ಯಯ ಮಾಡಲು ಸಮಯವಿಲ್ಲ. ಜನರ ಪ್ರಾಣಗಳನ್ನು ಉಳಿಸುವುದು ಹಾಗೂ ಕೋವಿಡ್-19 ಸಾಂಕ್ರಾಮಿಕವನ್ನು ತಡೆಗಟ್ಟುವುದು ನಮ್ಮ ಧ್ಯೇಯವಾಗಿದೆ’’ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಮಹಾ ನಿರ್ದೇಶಕ ಟೆಡ್ರಾಸ್ ಅದನಾಮ್ ಗೇಬ್ರಿಯೇಸಸ್ ಟ್ವಿಟರ್ನಲ್ಲಿ ಹೇಳಿದ್ದಾರೆ.
ವಿಶ್ವ ಆರೋಗ್ಯ ಸಂಸ್ಥೆಗೆ ನೀಡುವ ದೇಣಿಗೆಯನ್ನು ನಿಲ್ಲಿಸುವುದಾಗಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದ ಬಳಿಕ ಅವರು ಈ ಪ್ರತಿಕ್ರಿಯೆ ನೀಡಿದ್ದಾರೆ.