2019-20ರಲ್ಲಿ ಚುನಾವಣಾ ಬಾಂಡ್ ಗಳ ಮೂಲಕ 2,555 ಕೋಟಿ ರೂ. ಗಳಿಸಿದ ಬಿಜೆಪಿ

ಹೊಸದಿಲ್ಲಿ: 2019-20ರ ಆರ್ಥಿಕ ವರ್ಷದಲ್ಲಿ ಮಾರಾಟವಾದ ಚುನಾವಣಾ ಬಾಂಡ್‌ಗಳಲ್ಲಿ ಶೇಕಡಾ 76 ರಷ್ಟು ಬಿಜೆಪಿ ಸಂಗ್ರಹಿಸಿದೆ ಎಂಬ ವಿಚಾರವು ಚುನಾವಣಾ ಆಯೋಗದಿಂದ NDTV ಸಂಗ್ರಹಿಸಿದ ಅಂಕಿ-ಅಂಶದಿಂದ ತಿಳಿದುಬಂದಿದೆ. ಒಟ್ಟಾರೆಯಾಗಿ 2019-20ರಲ್ಲಿ ರೂ.3,355 ಕೋಟಿ ಮೌಲ್ಯದ ಚುನಾವಣಾ ಬಾಂಡ್‌ಗಳನ್ನು ಮಾರಾಟ ಮಾಡಲಾಗಿದೆ, ಅದರಲ್ಲಿ ಬಿಜೆಪಿ ಆದಾಯವು  ರೂ. 2,555 ಕೋಟಿಗಳು. 

ಅದೇ ಅವಧಿಯಲ್ಲಿ, ಬಿಜೆಪಿಯ ಅತಿದೊಡ್ಡ ರಾಜಕೀಯ ಪ್ರತಿಸ್ಪರ್ಧಿ ಕಾಂಗ್ರೆಸ್‌ನ ಸಂಗ್ರಹವು  ಶೇಕಡಾ 17 ರಷ್ಟು ಕುಸಿದಿದೆ. 2018-19ರಲ್ಲಿ ಕಾಂಗ್ರೆಸ್ ಚುನಾವಣಾ ಬಾಂಡ್‌ಗಳಿಂದ ರೂ. 383 ಕೋಟಿ ಪಡೆದಿತ್ತು. 2019-20ರಲ್ಲಿ ಇದು ರೂ. 318 ಕೋಟಿಗಳನ್ನು ಪಡೆಯಿತು.

ಉಳಿದ ಪ್ರತಿಪಕ್ಷಗಳ ಪೈಕಿ ಮಮತಾ ಬ್ಯಾನರ್ಜಿಯವರ ತೃಣಮೂಲ ಕಾಂಗ್ರೆಸ್ ರೂ.100.46 ಕೋಟಿ, ಶರದ್ ಪವಾರ್ ಅವರ ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷ ರೂ. 29.25 ಕೋಟಿ, ಶಿವಸೇನೆ ರೂ.41 ಕೋಟಿ, ಡಿಎಂಕೆ ರೂ. 45 ಕೋಟಿ, ಲಾಲು ಯಾದವ್ ಅವರ ರಾಷ್ಟ್ರೀಯ ಜನತಾದಳ ರೂ. 2.5 ಕೋಟಿ ಹಾಗೂ  ಅರವಿಂದ ಕೇಜ್ರಿವಾಲ್ ಅವರ ಆಮ್ ಆದ್ಮಿ ಪಕ್ಷ ರೂ. 18 ಕೋಟಿ ಸಂಗ್ರಹಿಸಿವೆ.

2019 ರ ಮಾರ್ಚ್‌ನಲ್ಲಿ ಕೊನೆಗೊಳ್ಳುವ ಹಣಕಾಸು ವರ್ಷದಲ್ಲಿ, ಬಿಜೆಪಿಯ ಆದಾಯವು ಅದರ ಐದು ಪ್ರಮುಖ ಪ್ರತಿಸ್ಪರ್ಧಿಗಳ ಒಟ್ಟು ಮೊತ್ತಕ್ಕಿಂತ ಎರಡು ಪಟ್ಟು ಹೆಚ್ಚು. ಮಾರ್ಚ್ 2020 ರವರೆಗೆ ಮಾರಾಟವಾದ ಚುನಾವಣಾ ಬಾಂಡ್‌ಗಳಲ್ಲಿ 68 ಶೇಕಡಾವನ್ನು ಬಿಜೆಪಿ ಮಾತ್ರ ಪಡೆದುಕೊಂಡಿದೆ. ಆದರೂ, ಬಾಂಡ್‌ಗಳು ಬರುವ ಮುನ್ನವೇ ಎಲ್ಲಾ ರಾಜಕೀಯ ಪಕ್ಷಗಳ ನಡುವೆ ಪಕ್ಷವು ಅತಿ ಹೆಚ್ಚು ಆದಾಯವನ್ನು ಹೊಂದಿತ್ತು.

.