ಭಾರತದ ವಾಯು ಗುಣಮಟ್ಟ ತೀರಾ ಕಳಪೆ: ಸ್ವಿಸ್‌ ಸಂಸ್ಥೆ ವರದಿ

ಸ್ವಿಸರ್‌ಲ್ಯಾಂಡ್/ಹೊಸದಿಲ್ಲಿ: ಸ್ವಿಸ್ ಮೂಲದ ಸಂಸ್ಥೆ ಐಕ್ಯೂಏರ್‌ (IQAir) ಬಿಡುಗಡೆ ಮಾಡಿದ ವಿಶ್ವ ವಾಯು ಗುಣಮಟ್ಟ ವರದಿಯ ಪ್ರಕಾರ 2021 ರಲ್ಲಿ ಭಾರತದ ಗಾಳಿಯ ಗುಣಮಟ್ಟವು ತೀರಾ ಹದಗೆಟ್ಟಿದೆ.  

ವಿಶ್ವದ 100 ಅತಿ ಹೆಚ್ಚು ವಾಯು ಮಾಲಿನ್ಯ ಹೊಂದಿರುವ ನಗರಗಳ ಪೈಕಿ 63 ನಗರಗಳು ಭಾರತದ ನಗರಗಳಾಗಿವೆ ಎಂದು ವರದಿ ಹೇಳಿದೆ. ಟಾಪ್ 15 ಅತ್ಯಂತ ಕಲುಷಿತ ನಗರಗಳಲ್ಲಿ ಹತ್ತು ಭಾರತದ್ದಾಗಿದ್ದು, ಅವುಗಳಲ್ಲಿ ಬಹುತೇಕ  ರಾಷ್ಟ್ರ ರಾಜಧಾನಿಯ ಸುತ್ತಲೂ ಇವೆ. ಒಟ್ಟಾರೆ, ಮಾಲಿನ್ಯಗೊಂಡ ನಗರಗಳಲ್ಲಿ  ಅರ್ಧಕ್ಕಿಂತ ಹೆಚ್ಚು ಹರಿಯಾಣ ಮತ್ತು ಉತ್ತರ ಪ್ರದೇಶದಲ್ಲಿವೆ.

ರಾಷ್ಟ್ರ ರಾಜಧಾನಿ ದಿಲ್ಲಿ ಸತತ ನಾಲ್ಕನೇ ವರ್ಷಕ್ಕೆ ವಿಶ್ವದ ಅತ್ಯಂತ ಕಲುಷಿತ ರಾಜಧಾನಿಯಾಗಿ ಉಳಿದಿದೆ, ದಿಲ್ಲಿಯ ಮಾಲಿನ್ಯವು ಹಿಂದಿನ ವರ್ಷಕ್ಕಿಂತ ಸುಮಾರು 15 ಪ್ರತಿಶತದಷ್ಟು ಹೆಚ್ಚಾಗಿದೆ. ಇಲ್ಲಿ ವಾಯು ಮಾಲಿನ್ಯದ ಮಟ್ಟಗಳು WHO ಯ ಸುರಕ್ಷತಾ ಮಿತಿಗಳಿಗಿಂತ ಸುಮಾರು 20 ಪಟ್ಟು ಹೆಚ್ಚಾಗಿದ್ದು, ವಾರ್ಷಿಕ ಸರಾಸರಿಗೆ PM2.5 ಪ್ರತಿ ಘನ ಮೀಟರ್‌ಗೆ 96.4 ಮೈಕ್ರೋಗ್ರಾಂಗಳಷ್ಟು ಇರುತ್ತದೆ. WHO ಸುರಕ್ಷಿತ ಮಿತಿ ಪ್ರತಿ ಘನ ಮೀಟರ್‌ 5 ಮೈಕ್ರೋಗ್ರಾಂ ಆಗಿದೆ.

ಮಾರಣಾಂತಿಕ ಮತ್ತು ಸೂಕ್ಷ್ಮದರ್ಶಕ PM2.5 ಮಾಲಿನ್ಯಕಾರಕದಲ್ಲಿ ಅಳೆಯಲಾದ ಸರಾಸರಿ ವಾಯು ಮಾಲಿನ್ಯವು ಪ್ರತಿ ಘನ ಮೀಟರ್‌ಗೆ 58.1 ಮೈಕ್ರೊಗ್ರಾಮ್ ಇದೆ, ಇದು ವಿಶ್ವ ಆರೋಗ್ಯ ಸಂಸ್ಥೆಯ (WHO) ವಾಯು ಗುಣಮಟ್ಟದ ಮಾರ್ಗಸೂಚಿಗಳಿಗಿಂತ 10 ಪಟ್ಟು ಹೆಚ್ಚು. ಅಲ್ಲದೆ, ಭಾರತದಲ್ಲಿ ಯಾವುದೇ ನಗರವು WHO ಮಾನದಂಡವನ್ನು ಹೊಂದಿಲ್ಲ ಎಂದು ವರದಿಯಾಗಿದೆ.