ರಾಜಸ್ಥಾನ: ಜಾತಿವಾದಿ ಶಿಕ್ಷಕನಿಂದ ಹತ್ಯೆಯಾದ ಬಾಲಕನ ಕುಟುಂಬವನ್ನು ಭೇಟಿ ಮಾಡದಂತೆ ಚಂದ್ರಶೇಖರ್‌ ಆಝಾದ್‌ಗೆ ನಿರ್ಬಂಧ

ಜೈಪುರ್:‌ ಶಾಲಾ ಶಿಕ್ಷಕನಿಂದ ಥಳಿತಕ್ಕೊಳಗಾಗಿ ಸಾವನ್ನಪ್ಪಿದ ದಲಿತ ಬಾಲಕನ ಕುಟುಂಬವನ್ನು ಭೇಟಿ ಮಾಡಲು ಜಲೋರ್‌ಗೆ ತೆರಳುತ್ತಿದ್ದ ಭೀಮ್ ಆರ್ಮಿ ಮುಖ್ಯಸ್ಥ ಚಂದ್ರಶೇಖರ್ ಆಝಾದ್‌  ಅವರನ್ನು ಬುಧವಾರ ರಾಜಸ್ಥಾನ ಪೊಲೀಸರು ಜೋಧ್‌ಪುರ ವಿಮಾನ ನಿಲ್ದಾಣದಲ್ಲಿ ಬಂಧಿಸಿದ್ದಾರೆ ಎಂದು ಪಿಟಿಐ ವರದಿ ಮಾಡಿದೆ.

ಇಂದ್ರ ಮೇಘವಾಲ್ ಜುಲೈ 20 ರಂದು ಮೇಲ್ಜಾತಿಯವರ ಮಡಕೆಯಿಂದ ನೀರು ಕುಡಿದಿದ್ದಕ್ಕಾಗಿ ಜಾತಿವಾದಿ ಶಿಕ್ಷಕ ಬಾಲಕನನ್ನು ತೀವ್ರವಾಗಿ ಥಳಿಸಿದ್ದನು. ತೀವ್ರ ಗಾಯಗೊಂಡಿದ್ದ ಬಾಲಕ ಚಿಕಿತ್ಸೆ ಫಲಕಾರಿಯಾಗದೆ, ಅಹಮದಾಬಾದ್‌ನ ಆಸ್ಪತ್ರೆಯಲ್ಲಿ ಕೊನೆಯುಸಿರು ಎಳೆದಿದ್ದ.

ಬುಧವಾರ ಸಂಜೆ ದಿಲ್ಲಿಯಿಂದ ವಿಮಾನ ಹತ್ತಿದ ಆಝಾದ್‌  ಅವರನ್ನು ವಿಮಾನ ನಿಲ್ದಾಣದಲ್ಲಿ ಮೂರು ಗಂಟೆಗಳ ಕಾಲ ಬಂಧಿಸಲಾಯಿತು ಎಂದು ಪೊಲೀಸರು ಪಿಟಿಐಗೆ ತಿಳಿಸಿದ್ದಾರೆ.

"ಮಾತುಕತೆಗಳ ನಂತರ, ಅವರು ಜಲೋರ್‌ಗೆ ಹೋಗುವುದಿಲ್ಲ ಎಂದು ಭರವಸೆ ನೀಡಿದರು, ನಂತರ ಅವರನ್ನು ರಸ್ತೆಯ ಮೂಲಕ ಹೋಗಲು ಅನುಮತಿಸಲಾಗಿದೆ" ಎಂದು ಉಪ ಪೊಲೀಸ್ ಆಯುಕ್ತ ಅಮೃತಾ ದುಹಾನ್ ಹೇಳಿದರು. ಜಲೋರ್‌ಗೆ ಭೇಟಿ ನೀಡುವುದರಿಂದ ನಗರದಲ್ಲಿ ಕಾನೂನು ಸುವ್ಯವಸ್ಥೆ ಹದಗೆಡಬಹುದೆಂಬ ಕಾರಣಕ್ಕೆ ಆಜಾದ್‌ ಅವರನ್ನು ತಡೆಯಲಾಯಿತು ಎಂದು ಮತ್ತೊಬ್ಬ ಪೊಲೀಸ್ ಅಧಿಕಾರಿ ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ.

ಈ ನಡುವೆ, ದಲಿತರ ಮೇಲಿನ ಅಪರಾಧಗಳನ್ನು ತಡೆಯಲು ಅಶೋಕ್ ಗೆಹ್ಲೋಟ್ ನೇತೃತ್ವದ ರಾಜಸ್ಥಾನ ಸರ್ಕಾರವು ಸಾಕಷ್ಟು ಕೆಲಸ ಮಾಡುತ್ತಿಲ್ಲ ಎಂದು ವಿರೋಧ ಪಕ್ಷಗಳು ಆರೋಪಿಸಿವೆ.

"ರಾಹುಲ್ ಗಾಂಧಿ ಮತ್ತು ಪ್ರಿಯಾಂಕಾ ಗಾಂಧಿ ವಾದ್ರಾ ರಾಜಸ್ಥಾನದಲ್ಲಿ ದಲಿತರಿಗೆ ನ್ಯಾಯವನ್ನು ಖಚಿತಪಡಿಸಿಕೊಳ್ಳಲು ಗೆಹ್ಲೋಟ್ಗೆ ಯಾವಾಗ ಸಲಹೆ ನೀಡುತ್ತಾರೆ?" ಭಾರತೀಯ ಜನತಾ ಪಕ್ಷ ಕೇಳಿದೆ.

ಘಟನೆಯನ್ನು ವಿರೋಧಿಸಿ ಬರಾನ್ ಅಟ್ರು ಕ್ಷೇತ್ರದ ಕಾಂಗ್ರೆಸ್ ಶಾಸಕ ಪನಚಂದ್ ಮೇಘವಾಲ್ ಆಗಸ್ಟ್ 15 ರಂದು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು. ನಾಗರಿಕರ ಹಕ್ಕುಗಳ ರಕ್ಷಣೆಯನ್ನು ಖಚಿತಪಡಿಸಿಕೊಳ್ಳಲು ಸಾಧ್ಯವಾಗದ ಅವರಿಗೆ ಹುದ್ದೆಯನ್ನು ಅಲಂಕರಿಸುವ ಹಕ್ಕಿಲ್ಲ ಎಂದು ಅವರು ಹೇಳಿದ್ದರು.

"ಕೆಲವೊಮ್ಮೆ, ದಲಿತರು ಮತ್ತು ಸಮಾಜದ ಕಟ್ಟಕಡೆಯ ವರ್ಗದ ಇತರರನ್ನು ಮಡಕೆಯ ನೀರು ಕುಡಿಯುವುದಕ್ಕಾಗಿ ಕೊಲ್ಲಲಾಗುತ್ತದೆ, ಇನ್ನು ಕೆಲವೊಮ್ಮೆ, ಕುದುರೆ ಸವಾರಿ ಅಥವಾ ಮೀಸೆಯನ್ನು ಇಟ್ಟುಕೊಂಡು ಕೊಲ್ಲಲಾಗುತ್ತದೆ" ಎಂದು ಅವರು ತಮ್ಮ ರಾಜೀನಾಮೆ ಪತ್ರದಲ್ಲಿ ತಿಳಿಸಿದ್ದಾರೆ. "ತನಿಖೆಯ ಹೆಸರಿನಲ್ಲಿ, ಕಡತಗಳನ್ನು ಇಲ್ಲಿಗೆ ಸ್ಥಳಾಂತರಿಸಲಾಗುತ್ತದೆ ಮತ್ತು ಕಾನೂನು ಪ್ರಕ್ರಿಯೆಯು ಸ್ಥಗಿತಗೊಂಡಿದೆ." ಎಂದು ಅವರು ಹೇಳಿದ್ದರು.

ಬಾಲಕನ ಸಾವನ್ನು ವಿರೋಧಿಸಿ 12 ಕಾಂಗ್ರೆಸ್ ಕೌನ್ಸಿಲರ್‌ಗಳು ಸಹ ರಾಜೀನಾಮೆ ನೀಡಿದ್ದಾರೆ.

ಆಗಸ್ಟ್ 13 ರಂದು ಗೆಹ್ಲೋಟ್ ಅವರು ಬಾಲಕನ ಕುಟುಂಬಕ್ಕೆ ಮುಖ್ಯಮಂತ್ರಿಗಳ ಪರಿಹಾರ ನಿಧಿಯಿಂದ 5 ಲಕ್ಷ ರೂ. ಪರಿಹಾರವನ್ನು ನೀಡಿದ್ದಾರೆ.

It's not a democratic way to arrest #ChandrashekharAzad#ReleaseChandraShekharAazad pic.twitter.com/YTGzgD1wMS

— Bhoma Ram Zoya © (@Mrzoya99) August 17, 2022