ವಿಶ್ವಕಪ್ ಗೆದ್ದರೂ ಮೆಸ್ಸಿ ಕಪ್ ಮನೆಗೆ ಕೊಂಡೊಯ್ಯುವಂತಿಲ್ಲ: ಕಾರಣವೇನು ಗೊತ್ತೇ?
ದೋಹಾ: ಫಿಫಾ ವಿಶ್ವಕಪ್ (FIFA world cup) ಫೈನಲ್‌ನಲ್ಲಿ ಫ್ರಾನ್ಸ್‌ ತಂಡದ ಎದುರು ಗೆದ್ದು ಅರ್ಜೆಂಟಿನಾದ ಲಿಯೊನೆಲ್‌ ಮೆಸ್ಸಿ (Lionel Messi) ಅವರ ನೇತೃತ್ವದ ತಂಡ ಸಂಭ್ರಮಾಚರಣೆಯಲ್ಲಿದೆ. ತಮ್ಮ ಚೊಚ್ಚಲ ವಿಶ್ವಕಪ್ ಪಂದ್ಯವಾಳಿಯನ್ನು ಆಡಿದ 16 ವರ್ಷಗಳ ನಂತರ ಮೆಸ್ಸಿ ಅವರಿಗೆ ಈ ಪ್ರತಿಷ್ಠಿತ ಟ್ರೋಫಿ ಲಭಿಸಿದೆ. ಆದರೆ ಅವರು ಅಥವಾ ಅವರ ತಂಡ ಈ ಟ್ರೋಫಿಯನ್ನು ತಮ್ಮ ದೇಶಕ್ಕೆ ಕೊಂಡೊಯ್ಯುವಂತಿಲ್ಲ.
ಮೂಲ ಫಿಫಾ ವಿಶ್ವಕಪ್ ಟ್ರೋಫಿಯನ್ನು ಜೂಲ್ಸ್‌ ರಿಮೆಟ್‌ ಟ್ರೋಫಿ ಎಂದು ಕರೆಯಲಾಗುತ್ತಿತ್ತು. ಮಾಜಿ ಫಿಫಾ ಅಧ್ಯಕ್ಷ ಜೂಲ್ಸ್‌ ರಿಮೆಟ್‌ ಅವರ ಗೌರವಾರ್ಥ ಈ ಹೆಸರು ಇಡಲಾಗಿತ್ತು. ವಿಶ್ವಕಪ್ ಪಂದ್ಯಾವಳಿಯನ್ನು ಆಯೋಜಿಸುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದ್ದರು. ಮೊದಲ ವಿಶ್ವಕಪ್ ಪಂದ್ಯಾವಳಿ ನಡೆದ 1930 ರಿಂದ ಹಿಡಿದು 1970 ತನಕ ಮೂಲ ಟ್ರೋಫಿಯನ್ನು ಗೆದ್ದ ತಂಡಗಳಿಗೆ ನೀಡಲಾಗುತ್ತಿತ್ತು. ಚಿನ್ನ ಲೇಪಿತ ಸ್ಟರ್ಲಿಂಗ್‌ ಬೆಳ್ಳಿ ಬಳಸಿ ತಯಾರಿಸಲಾದ ಟ್ರೋಫಿಯ ತೂಕ 3.8 ಕೆಜಿ ಆಗಿತ್ತು.
ಆಗಿನ ಫಿಫಾ ನಿಯಮದ ಪ್ರಕಾರ ವಿಶ್ವಕಪ್ ಅನ್ನು ಮೂರು ಬಾರಿ ಗೆದ್ದ ದೇಶಗಳು ಮೂಲ ಟ್ರೋಫಿಯನ್ನು ಇರಿಸಬಹುದಾಗಿತ್ತು. ಈ ನಿಯಮದ ಪ್ರಕಾರ 1970 ರಲ್ಲಿ ಮೂರನೇ ಬಾರಿ ವಿಶ್ವ ಕಪ್ ಗೆದ್ದ ಬ್ರೆಝಿಲ್‌ ತಂಡ ಜೂಲ್ಸ್‌ ರಿಮೆಟ್‌ ಟ್ರೋಫಿಯನ್ನು ತೆಗೆದುಕೊಂಡಿತ್ತು. ಬ್ರೆಝಿಲ್‌ನ ರಿಯೋ ಡಿ ಜನೈರೋ ದಲ್ಲಿರುವ ಬ್ರೆಝಿಲಿಯನ್‌ ಫುಟ್ಬಾಲ್‌ ಕಾನ್ಫೆಡರೇಶನ್‌ ಮುಖ್ಯ ಕಾರ್ಯಾಲಯದಲ್ಲಿ ಈ ಟ್ರೋಫಿಯನ್ನು ಪ್ರದರ್ಶನಕ್ಕಿಡಲಾಗಿತ್ತು. ಆದರೆ 1983 ರಲ್ಲಿ ಅದು ಕಳ್ಳತನವಾಗಿತ್ತು ಹಾಗೂ ನಂತರ ಅದು ಪತ್ತೆಯಾಗಲೇ ಇಲ್ಲ. ಟ್ರೋಫಿ ಕದ್ದವರು ಅದರ ಲೋಹವನ್ನು ಕರಗಿಸಿ ಮಾರಾಟ ಮಾಡಿರಬೇಕೆಂದು ಶಂಕಿಸಲಾಗಿದೆ.
ಟ್ರೋಫಿ ಕದ್ದು ಹೋಗುತ್ತಿರುವುದು ಇದು ಎರಡನೇ ಬಾರಿಯಾಗಿತ್ತು. ಇದಕ್ಕೂ ಮೊದಲು 1966 ರಲ್ಲಿ ಇಂಗ್ಲೆಂಡ್ ದೇಶದ ಆತಿಥ್ಯದಲ್ಲಿ ನಡೆಯಬೇಕಿದ್ದ ವಿಶ್ವ ಕಪ್ ಪಂದ್ಯಾವಳಿಯ ಕೆಲವೇ ದಿನಗಳಲ್ಲಿ ಅದು ಲಂಡನ್‌ ಸಾರ್ವಜನಿಕ ಪ್ರದರ್ಶನ ಸ್ಥಳದಿಂದ ಕಳ್ಳತನವಾಗಿತ್ತು ಆದರೆ ಆಗ 10 ದಿನಗಳಲ್ಲಿಯೇ ಅದನ್ನು ಪತ್ತೆಹಚ್ಚಲಾಗಿತ್ತು.
ನಂತರದ ವರ್ಷಗಳಲ್ಲಿ ವಿಜೇತರಿಗೆ ಮೂಲ ಫಿಫಾ ಟ್ರೋಫಿಯ ಪಡಿಯಚ್ಚಾಗಿರುವ ಚಿನ್ನ ಲೇಪಿತ ಕಂಚಿನ ಟ್ರೋಫಿ ನೀಡಲಾಗುತ್ತಿದೆ. ಮೂಲ ಟ್ರೋಫಿಯನ್ನು ಭದ್ರತಾ ಕಾರಣಗಳಿಗಾಗಿ ವಿಜೇತ ತಂಡ ತನ್ನ ದೇಶಕ್ಕೆ ಕೊಂಡೊಯ್ಯುವಂತಿಲ್ಲ.